2014年12月29日星期一

Mini Club:酒過浮華大地

以前都曾經晌食評講過,落吧、飲酒一向都唔喺小弟強項,不過,近年機緣下接觸多咗一啲酒吧,發覺都唔再喺單單飲酒嘅地方,食物已經做得有番一定水平,而且,仲唔喺單一只有餸啤酒嘅小食,而喺有番咁上下睇頭嘅菜式,有主菜,有飯麵,兼且水準不俗。之前曾去過Mini Club嘅尖沙咀店,今晚有幸獲邀再嚟到旺角店一試大廚身手。

2014年12月24日星期三

Lab Made Cafe 分子雪糕專門店:分子雪糕過聖誕

唔喺第一次幫襯Lab Made,但新開嘅荃灣店應該最就腳,事關喺小弟出沒較多嘅地區之一。不過,是日嚟到,感覺有好多唔同,原來……荃灣店已進化為Café,分子雪糕當然唔少得,更賣埋件裝蛋糕及飲品,實在啱晒我哋啲甜品迷,下午茶又多個選擇,周六、日有時間可以過嚟迤吓!

2014年12月22日星期一

美心西餅 Maxim's Cake Shop:意外甜美

屋企人一向好少搞咩慶祝聖誕,通常各有各節目,不過,今年卻意外地同屋企人前後食咗兩個聖誕蛋糕,仲兩個都喺嚟自美心西餅。

稻香超級漁港 Pier 88:頭頭是稻

一年有幾個大節日,總會同一大班親戚筵開兩席食番餐,正所謂做冬大過年,冬至飯一定唔少得走埋一齊,以前通常貪方便,嚟嚟去去都喺嗰一、兩間,不過,近年竟轉嚟轉去,無他嘅,一班親戚對食無咩要求,邊間做得抵咪去邊間囉,當然,區域都喺圍繞番深水埗,就好似之前多彩、德興、百樂門都幫襯過,今次就揀咗李鄭屋村嘅稻香。

2014年12月20日星期六

2+2 Café:平2近人

雖然個人而言,都幾鍾意食自助餐,因為一次過由冷盤,大菜,甜品可以想試乜就試乜,想食幾多就幾多,完全唔使太多顧慮,不過,老婆「詐型」話我次次食自助餐都暴食暴飲,所以,都食少咗好多,下午茶自助餐更好耐無食添。今次,就趁過新年前嚟個最後一擊下午茶自助餐,帝都酒店嘅2+2 Café做緊主題「香芒燕會」下午茶自助餐,芒果一向啱晒小弟!

麵飽王快餐餅店 Bread King:我的星期六美孚早餐 ~ 十年如一

好耐無寫過「我的星期六美孚早餐」系列,都應該隔咗大半年有多,皆因寫得八八九九,無試新店就費事寫。有朝幫襯居所附近嘅「麵飽王快餐餅店」,心血來潮又想寫吓,翻睇記錄,原來對上一次個食評已經喺3年前嘅事。

2014年12月19日星期五

香港地 Hong Kong Day:尋找他香的故事

近來有關亞視嘅賣盤 / 清新聞特別多,其實見佢晚晚都「留聲歲月」就覺得佢遲早要摺。曾幾何時,亞視都有製作過出色嘅節目,就好似十多年前一套資訊紀錄節目「尋找他鄉的故事」,由King Sir旁述,講述晌世界各地海外華人嘅生活點滴。今晚,小弟嘅尋找他「香」的故事唔使去到海外,只喺晌奧海城嘅「香港地」啫。

2014年12月18日星期四

BV Kitchen:誰伴我廠蕩

外面已經夠冷冷寒風,入夜,嚟到觀塘工廠區,感覺更加冷清。雖然落緊毛毛細雨,感覺有點悽楚,不過,心卻喺暖和,因為唔喺得一支公晌度闖蕩,跟幾位好友高高興興嚟到BV Kitchen提早慶祝聖誕節。

2014年12月17日星期三

Burgerman:秋冬進堡

晌大角咀短短兩截埃華街,食店嘅選擇真喺好到不得了,車品品、神廚館、貴族甜品、韓淼莊、巴蜀麻辣米綫依啲較出名唔在講,仲有好多其他小店。今日走到嚟試嘅,都喺一間「小」店,指嘅喺鋪位窄長,大概得10-12個位左右嘅Burgerman。

菲爾斯曲奇專賣店 Mrs. Fields Cookies:好友狂嚐曲(廿七)

老婆同樣都鍾意食曲奇,但凡事總有例外,依個「例外」就喺美式曲奇,一來佢覺得太甜,二來佢覺得美式曲奇口感軟腍腍,唔知點咁,古古怪怪,然而小弟就乜都啱,所以,好友所贈嘅菲爾斯曲奇就可以由小弟一人獨享。

Godiva Chocolatier:公朱同好(十四)

Godiva都公認為城中數一數二出名而高質素嘅朱古力店,真喺好多謝朋友咁重手贈小弟一盒「Assorted Truffles with Gold Star Box」(雜錦松露朱古力星形禮盒),包裝小巧可愛,氹人歡喜嘅好選擇之一。

2014年12月16日星期二

白熊喫茶店 Shirokuma Café:大展熊圖

好耐無見嘅朋友約小弟食飯聚一聚,無乜理由托手踭啫,況且,地點由佢定,最好就喺咁,唔使小弟依個掛名食家去諗。餐廳定晌德福嘅白熊喫茶店,都方便我吖,準時到無問題。

香茶房 Kaorisabo:好友狂嚐曲(廿六)

自從年半前寫依個系列開始,不期然多咗收到朋友醒我嘅曲奇美食作為小禮物,亦間接讓小弟認識到更多唔同嘅曲奇品牌或小店,就好似今次介紹嘅「香茶房」,好陌生嘅名字,好低調嘅小店。

2014年12月13日星期六

莆田 Putien:有福同享

新加坡過江龍「莆田」以賣福建莆田菜為主,今年7月先落戶晌利舞臺,估唔到事隔5個月,就再晌荷里活廣場擴展版圖。12月13日仲搞咗個「手工製作示範暨公眾試吃日」,一連幾場招待公眾人士,完全免費,無任何附帶條件,唔使買乜買物,實行讓大家齊享美味福建菜,真心有福同享。

麥當勞道貳號咖啡廳 Two Macdonnell Road Coffee Shop:MacBuffet

咪誤會以為麥記搞起自助餐嚟,此麥跟彼麥不同。今次跟老婆嘅朋友行山,地域更喺少行嘅港島區,而路線仲喺第一次行嘅寶雲道,再接堅尼地道行去中環,飽覽灣仔、金鐘、中環一帶景色,加上清風送爽,心情自不然開朗。如果行過嘅朋友都知,依段路好濕碎,所以行得超輕鬆,而最終目的地其實喺去香港聖約翰救護機構總部嘅「麥當勞道貳號咖啡廳」食晏。

2014年12月11日星期四

Häagen-Dazs:哈根大師歡樂派對迎聖誕

聖誕又就快到,好多人都會打算食飯慶祝一下,如果同你講去打鞭爐迎聖誕,會唔會感覺怪咗啲?不過,如果喺雪糕火鍋,你又點睇呢?掹住食友車邊,出席咗今個寒冬Haagen Dazs嘅歡樂派對,率先一嚐多款為今個聖誕設計新推嘅雪糕甜品、飲品,以及一睹兩款充滿節日氣氛嘅雪糕蛋糕,你準備好未?Let’s Party!

2014年12月10日星期三

Marks & Spencer 食品部:公朱同好(十三)

對上一篇朱古力系列食評「公朱同好」應該已經喺幾個月前嘅事,儲咗好幾篇,又喺時候分享吓好友送贈嘅朱古力禮物喇。今次喺麵包班同學仔醒小弟嘅M&S產品「Cherry Liqueurs」(車厘子酒心黑朱古力),佢話當時買二送一,好鬼抵,所以醒一盒我試,真喺多謝晒先。

Honey Creme:甜酒遇著韓乳

雖然天氣開始轉冷,但天寒地凍食雪糕,又別有一番滋味。今晚,趁收工過嚟Honey Creme再嚐蜂巢雪糕,咁有興緻皆因推出秋冬限定新口味:百利甜酒 x 韓國牛乳軟雪糕,自不然貪新鮮,一試「酒後」嘅蜂巢雪糕。

2014年12月8日星期一

醉串 Skewed:得串進呎

幾個月前,同朋友嚟過「醉串」,試咗多款串燒,如:串燒五花腩、燒雞軟骨、燒羊架 、燒牛舌、燒鱔串、燒牛油粟米……等等,三幾個老友吃吃喝喝,談談飲食,「醉」緊要啱玩。今次再訪,喺因為見佢推出咗個熱辣辣嘅火鍋,唔使主食淨得串燒一瓣,讓人貪心啲,得吋進呎,又串燒,又火鍋。

美心西餅 Maxim's Cake Shop:魔雪水晶世界聖誕新口味

時至今日,已經有成年多,Frozen「魔雪奇緣」仍然吹得咁熾熱,周邊商品仍然不停大賣。美心西餅亦趁依股熱潮跟迪士尼合作,推出咗一系列以「魔雪奇緣」為主題嘅蛋糕及甜品,相信又有唔少小朋友嚷著叫嗲哋媽咪買嚟食呀!

大班樓 The Chairman:中菜精英班

我依啲打工仔,每個月就望月尾出糧,每日就望夠鐘收工,當然,唔少得望住個鐘等食晏。雖然晌中環返工,但都甚少寫中環食晏嘅食評,皆因小弟公司唯一最直接嘅福利就喺包伙食,今時今日而言,都算少有,所以,年中幫小弟慳番唔少,等我間唔時有點閒錢可以食好啲。就好似今次,晌廣州拼搏嘅老友回港辦點事,就相約一行3人到專做高質粵菜嘅「大班樓」食餐好嘅。

2014年12月7日星期日

Pacific Coffee Company:好友狂嚐曲(廿五)

時近聖誕,收到唔少食友送贈嘅小禮物,當中唔少仲喺曲奇嚟,啱晒啦,又可以延續吓小弟嘅曲奇食評系列「好友狂嚐曲」,先同大家分享Pacific Coffee嘅朱古力杏仁曲奇。

藍海洋美食廣場 Ocean Blue Food Court:不值一洋

雖然居住香港幾十年,其實好多地方都未曾去過,就好似今日入到嚟嘅科學園,就喺小弟嘅第一次踏足,以往,都只不過喺坐車路過。點解今次入咗嚟,因為老婆教會搞咗個科學園半日遊,其實,主要喺入去科學園個美食廣場「Ocean Blue」食餐自助午餐,兼順道遊一轉科學園。

2014年12月6日星期六

緣來素食 Destine Vegetarian Restaurant:秋山之行(三):緣來,又幾好食!

由元朗行到過嚟屯門,晌屯門Lab Made小休兼食分子雪糕,逛咗陣屯門再搭番西鐵落元朗食飯,點解要專誠過嚟食晚飯,皆因老婆嘅同事介紹佢一間素食店:「緣來素食」,反正買咗張西鐵全日通,點搭都得。

奇華餅家 Kee Wah Bakery:秋山之行(二):順道手信

行完山,又晌Lab Made食完分子雪糕,正離開屯門市廣場1期之際路經奇華,就順道打個白鴿轉,睇睇有咩零食、餅食之類可以買嚟送俾啲朋友。以賣唐餅起家嘅奇華,時至今日,啲產品已經好多元化,經常推陳出新,覺得佢喺間幾成功嘅本地餅家、本地品牌。

Lab Made 分子雪糕專門店:秋山之行(一):薯薯粟粟

入秋喺行山好季節,繼十月初倒行麥理浩徑,即喺晌麥理浩徑第10段由尾倒番轉行,今趟就再接再厲嚟新界西北再行過,因為住近西鐵入嚟依邊超方便。依次目標喺元朗大棠嘅楓香林,仲打算玩足全日,所以,中午由元朗大棠開始,經大欖自然教育徑,回走麥理浩第10段過屯門,因為天朗氣清,舒服怡人,行得爽啲。山徑出口位就喺屯門市中心,對住屯門市廣場,辛苦大半日,慰勞吓自己之餘,更順便補充一吓糖份,貪得意嚟到Lab Made,又睇吓有咩新意!

2014年12月5日星期五

RBTea:不落俗兔

已有一段日子無嚟太子依區,今晚收工後同老婆嚟到RBTea食晚餐,事緣都喺朋友所贈嘅折扣劵,就快到期,用得唔好嘥啫。

2014年12月4日星期四

泰園:泰菜.刺身.新泰度

做飲食,區區都喺個戰場,好似泰菜館,晌飲食網站查一查,單單一個細細哋嘅尖沙咀區就有成30多間,雖話有本地客,又有遊客,但競爭應該依然劇烈。為慳成本,唔少餐廳都上晒樓,今晚嚟到新開無耐嘅「泰園」,唔止上樓,嚐泰菜要有個新態度,因為泰菜館仲有刺身食,的確少有。

2014年12月3日星期三

喜利餅店 Hei Lee Cakes Shop:好友狂嚐曲(廿四)

香港唔少地區,都仲存在著一啲港式麵包鋪,前鋪後工場,無靚面門,逼逼窄窄,港式麵包、蛋撻、雞批、曲奇、酥餅……等等擺到一鋪都喺,「喜利餅店」就喺其中之一,瑟縮上環禧利街小巷一角。朋友送上一小包「提子曲奇」,就喺「喜利餅店」嘅出品。

2014年12月2日星期二

Foxtail & Broomcorn:味遊亞洲‧玲瓏8麵

麵食之大,真喺無處不在,唔好講話全世界,單單亞洲區,每個國家、每個城市都有其本土特色麵食。想一次過試到多款亞洲地區嘅麵食,又唔一定要環遊亞洲嘅,最近到訪上環嘅Foxtail & Broomcorn,就喺主打亞洲麵食,揉合傳統與新派,注入一啲創意,務求讓人對麵食有新體驗。

2014年12月1日星期一

奇華餅家 Kee Wah Bakery:非常腸粉

一踏入秋冬季,火鍋以外,另一香港地道名物就喺煲仔飯。其實依家一年四季都可以食到煲仔飯,而所有臘味產品,無論臘鴨、臘肉定臘腸,都無分季節有得供應,不過,食嘢有時又要講意境,晌冬天食煲仔飯就寧捨滋味,咁!今個冬季,你又食咗煲仔飯未?奇華作為本地老餅家,亦賣咁多傳統食品,又點會無臘腸、膶腸嘅蹤影吖。