2014年11月20日星期四

Blesscuit Bakery:好友狂嚐曲(廿三)

小弟寫食文作標題好鍾意玩吓食字,純粹貪過癮,雖唔算作得出色,但偶有佳作咁啦。第一次聽到Blesscuit個名就覺得好有心思,一間賣曲奇嘅小店,希望藉曲奇將祝福送上,Bless + Biscuit,喺咪好有意思呢!托食友福,又贈小弟一小盒曲奇,完全感受到佢嘅祝福。
曲奇分鐵盒及紙盒包裝,前者份量較多(22-49塊),而且每盒包含數款味道,售價自然較高($138-$328);至於後者,包裝簡約,份量細細(8塊)兼單一味道,不過,定價相對較親民($48-$68)。
雖然收到嘅喺紙盒裝曲奇,但卻喺最貴嘅「金鑽松露曲奇」($68),每片曲奇都喺獨立包裝,乾淨衛生。何解叫「金鑽」?曲奇表面塗上食用金粉,外觀更顯貴氣,而曲奇色澤烏黑並非嚟自松露,主要加入竹炭粉做,並非咩嘢色素,天然健康,至於味道,松露嘅幽香十分突出,好似撲緊過嚟咁;此外,曲奇做得薄,口感非常鬆脆,絕對有種意外嘅驚喜。
據食友講,Blesscuit喺藝人陳敏芝所開,掛得自己名做生招牌,自不然用料不賴,製作認真,唔單止話喺以法國牛油、法國小麥麵粉、意大利蕃茄乾、天然黑糖及不同嘅外國食材嚟做曲奇,塊塊全人手製作,暫時雖然只有十多款口味,但當中唔少味道甚具特色,如:紅莓水果茶曲奇、黑糖腰果曲奇、鯷魚曲奇、金鑽松露曲奇……等等,聽完我都心郁郁想多試幾款呀!
幸而,收到鐵盒裝嘅另一食友,再分拆包咗各款味道一片嘅曲奇俾我品嚐,所以,「祝福」喺可以分享嘅。4款口味除原先試過嘅金鑽松露曲奇(黃色包裝),仲有帶點清爽怡人有少少果香嘅紅莓水果茶曲奇(紫色包裝)、清香橙皮味又有啲煙韌嘅香橙曲奇(粉藍包裝)及濃厚拖肥而帶些鹹味嘅拖肥曲奇(粉紅包裝)。雖然各得一片,一陣風咁就食晒,但已經令人再三回味。
除咗鍾意佢個店名,亦好喜歡曲奇包裝紙上嘅文字:「baked with blessings」,再次多謝食友嘅祝福,亦祝願Blesscuit為人帶嚟更多美味曲奇及祝福!

個人評分
味道:9/10
環境:- /10
服務:- /10
抵食:- /10
平均每人消費:HK$0(禮物)

餐廳資料:
Blesscuit Bakery
天后電氣道13-41號凱旋大廈35號35B地舖
2782 1778

沒有留言:

發佈留言