2014年10月6日星期一

Kowloon East Kitchen – 東闖西撞.東九廚房

繼早前同舊同事嚟過觀塘漢和食韓燒,因為朋友喜歡四處尋幽覓食,今次就跟朋友再嚟到觀塘,一試廠廈裡Café小店嘅歐陸美饌。每次再走進工廠區,已然睇到好大嘅變化。就好似今晚所到嘅Kowloon East Kitchen,位處一幢舊廠廈,仲喺拉閘式升降機,而該廠廈對面就已經有幢新簇得緊要嘅新商廈,雙映成趣,見證工廠區嘅轉變。
成層樓都喺灰灰黑黑嘅大鋼閘,餐廳門面以白紅黑對襯,簡潔、醒目、搶眼。而走進室內,環境、氣氛完全睇唔出佢喺身處廠廈之內,同樣,一室都以白紅黑為配襯色調,鋪水泥地,少少掛畫,簡約不造作。對街一邊都安裝大扇玻璃窗,相信日間嚟都會採光十足,雖話小店,其實地方很大呢!
除咗室內,更設有戶外區,就喺廠廈一個小平台,闊落通爽。不過,始終位處工廠區,景觀自然欠奉,此外,戶外區只喺簡單得擺幾張木枱木櫈,暫時未見有花太多心思,否則,晌秋涼時節,戶外用餐感覺會好不一樣。
除咗一紙餐牌,印備餐湯、沙律、自家製意粉、頭盤、主菜、配菜之外,近門口更有個是日精選,羅列當日時令或優質食材,做法可問問店員,好值得留意一下。此外,餐廳唔收加一,而服務夠專業到位,上菜速度啱啱好,唔會一次過堆晒晌枱度,每道菜上枱時有簡單講解,店員對菜式亦有一定嘅理解,值得一讚。
bowl麵包籃
先嚟喺一大兜百吉包,即喺普普通通嘅法包,配黑醋及橄欖油,感覺實在普通咗啲,跟一陣食到嘅菜式有啲級數上嘅差別,覺得以佢哋做菜嘅質素,無理由就咁切啲法包出嚟就算架!
bowl甘筍薑湯 $30
湯類無咩選擇,只喺要同唔要,因為只得一款是日餐湯。今晚個湯甘筍薑湯,都算比較特別,較為少飲,鮮橙色嘅甘筍湯,質滑細緻,薑味超突出,內裡仲有少少薑絲,可惜嘅喺甘筍味被比下去,個人覺得要減低薑味以作平衡。每一碗份量頗多,不妨一碗兩份飲就仲好。
bowl紅菜頭沙律配羊奶芝士 $70
沙律類嘅選擇亦唔太多,只有3款,以紅菜頭感覺最高纖有益兼補血。由於羊奶芝士一向都偏鹹,所以,夾雜沙律菜或紅菜頭一齊食會好啲,再配上油醋汁,清爽味美;當然,加埋烤烘過嘅蜜糖合桃,口感立時變得唔單調。
bowl鮮蕃茄醬意大利煙肉煮蟶子 $150
幾有驚喜嘅一道蕃茄煮蟶子,一客有12隻蟶子,以井形一層疊一層排列,蟶子爽彈得嚟有咬口,除沾滿醒胃鮮活嘅鮮蕃茄醬外,茄醬內仲有粒粒意大利煙肉粒,煙肉粒又一啲都唔肥,整個醬汁唔太酸,又帶點辣,兼有唔少羅勒香,味道複雜有層次,正!
bowl什菌闊條麵配芝士忌廉汁 $90
自家製意粉又喺另一值得一嚐嘅類別,意粉基本分為4款:蕃茄醬、芝士忌廉汁香蒜欖油及香草醬,而每款可選擇淨食或加配雞肉、意大利煙肉、什菌或蝦肉。因為稍後都有幾道肉類菜式,所以,就選擇配什菌,襯番個芝士忌廉汁。
闊條麵質感柔韌,尤其闊條麵就更加有咬口,芝士忌廉汁雖然汁底杰身,但不失香滑,而且,加入唔少加什菌,如蘑菇、冬菇,好足香菌味。我哋幾個都一致對依個闊條麵讚好!
bowl香煎穀飼豬扒配蜜糖芥茉汁 $170
是日精選嘅其中一款優質食材就喺穀飼豬扒,黑板寫住U.S.D.A Pork Chop,店員解釋即喺指經過美國農業部嘅認證。一向食豬都喺要全熟,突然被問到要幾多成,真喺唔識反應,原喺依隻豬扒有機又優質,可以唔晒煮到全熟,故此,我哋揀咗七分熟。外表烤得金黃而光澤,一刀切下,豬扒肉好粉嫩,外層幾香脆,不過,又無想像中咁柔嫩,但就好有肉汁;伴以蜜糖芥茉汁,芥味好輕,托起少少豬扒香味,順帶一提喺上依道菜時,特別換上扒刀,服務上嘅細節位無馬虎。
bowl黃金烤雞 $125
再嚟一道烤雞,同樣烤焗手勢好,所以,烤得金黃,皮脆肉滑;更附有香草汁,味道頗特別,充滿露斯瑪莉香味,而且,伴有油醋沙律菜,唔怕食烤雞而覺得肥膩啦。
bowl忌廉菠菜 $30
配菜類有香蒜薯蓉、忌廉菠菜及炸薯條,因為好幾款主菜都肉多菜少,所以,要個忌廉菠菜將配菜變為一道「小菜」,啲菠菜煮得好綿,然而,忌廉味唔太重。
餐廳提供嘅飲品中,有幾款非酒精特飲都幾特別,好似Cream Soda Float、Cucumber Giner、Raseberry Cooler……等等,咖啡及茶類亦有唔少選擇。
bowlCream Soda Float $35
好多人都知黑牛就喺可樂加朱古力雪糕,其實以前嘅冰室仲有一款叫金牛,就喺忌廉加芒果雪糕。不過,Cream Soda Float則只不過喺忌廉加雲呢拿雪糕球,但已經引起不少回憶。味道如何?友人話喺滑溜版嘅忌廉汽水,口感好有趣,味道又無想像中咁甜。
bowlRaseberry Cooler $30
本來喺紅桑莓糖漿、蜜糖、鮮檸汁及薑啤嘅組合,不過,店員話今晚啱啱無薑啤,用咗雪碧代替,估計都喺若有所欠。第一眼望埋去,差點以為凍檸茶,味道據朋友描述,甜甜酸酸咁,無話太好,亦唔算得差。
bowlLatte $30
因為跟手就喺嘆甜品嘅時間,所以,我都喺揀杯鮮奶咖啡。雖然拉花唔完美,但幾醇香,奶泡亦夠豐厚,仲配搭一件朱古力曲奇添。
bowl香蕉核桃蛋糕 $30
喺餐牌上嘅基本甜品之一,香蕉味超濃郁,蛋糕口感濕潤,內有細碎合桃仁,配上新鮮忌廉,好似「牛油」咁搽晌蛋糕上,效果出奇嘅好。
bowl檸檬芝士餅 $45
店家不時推出啲「是日精選」甜品,今日就出咗兩款:檸檬芝士餅及黑朱古力班尼士。純睇外表,件檸檬芝士餅唔算做得好出色,消化餅底厚薄不均,芝士漿倒得唔圓滑,但整體賣相還令人感覺清爽。餅底有啲沙糖粒感,原來喺加咗少少沙糖再稍微烘焗嘅效果,而芝士打得頗為滑身,內有絲絲檸檬絲,只喺芝士味較輕盈。
bowl黑朱古力班尼士 $45
一般嘅班尼士本身都好濃郁朱古力味,但以黑朱古力嚟做,香濃依然,但味道少甜,以及多一份醇甘味;此外,蛋糕內無加入合桃,質感上亦乾咗啲,個人覺得算唔上班尼士,只可以叫佢喺朱古力蛋糕;雲呢拿雪糕球採用Milk Top北海道自家製雪糕,見到粒粒雲呢拿籽,真材實料,不過,雪糕有啲冰感,又唔算幼滑,影響口感。
晌香港,好多樓上鋪、廠廈食店,都屬於卧虎藏龍,好有心做菜,今晚嚟到依個東九廚房,好味唔在講,值得再嚟東闖。

個人評分
味道:8/10
環境:7/10
服務:8/10
抵食:8/10
平均每人消費:HK$250

餐廳資料:
Kowloon East Kitchen
觀塘觀塘駿業街66號巧運工業大廈5樓C室
3468 5383

沒有留言:

發佈留言