2014年10月5日星期日

大自然素食 Gaia Veggie:一素而空

本來同老婆撐枱腳嘅生日飯,因為佢要加班而改期,所以,佢今個生日嘅第一餐慶生飯反而同佢屋企人爬咗頭食先。自從佢加入「綠色星期一」行列之後,就連平常食蔬肉、素食都多咗,既然喺佢嘅生日,自然由佢決定食乜,故此,選址荃灣廣場嘅「大自然素食」,一來帶點新派有啲新意,二來對我哋嚟講就腳,搭西鐵一個站就到。
雖然一早訂枱,兼提早到場,都要等上10min,可見週日晚嘅大自然素食幾咁旺場,亦睇到時下有唔少人喜歡食素,歸根究底,素食總讓人覺得健康啲。入到店內,果真全場爆滿,原來,都已經將啲枱櫈排得逼逼狹狹,環境雖則喺咁,但總算仍不失雅致,牆上掛上一幅幅水墨畫,多添一份平和。
除咗散點餐牌,相信唔少客人貪方便而揀「自選套餐」,因為套餐中有一系列自選菜式,比散叫抵啲之餘,又甚具彈性。自選套餐分為2人($188)、4人($368)、及6人($548)選擇,包小食、湯羹及自選小菜或粉麵,另收茶芥及加一。我哋一行5人結果就要個4人自選套餐,包小食1客、湯羹1客及小菜 / 粉麵自選4款,另再額外加多碟芋頭魚及炒麵,務求生日飯食得豐富一啲,有雞有魚,老婆話點咁多怕唔怕食唔晒,唔會,有小弟同弟婦兩個包底王,一定可以一掃而空啦!
bowl醋漬車喱茄
一道極為簡單嘅餐前小食,車喱茄入口甜甜酸酸,又爆汁,食得令人好開胃。
bowl涼拌珊瑚草
自選套餐嘅小食可3揀1,沙嗲羊肉串、涼拌珊瑚草及香煎菜肉餃子,由於頭尾兩款都唔會喺真肉,亦都預期喺啲乜嘢,反對中間嘅珊瑚草少接觸而較特別,所以,一致揀嚟試試。啡啡黃黃嘅珊瑚草,入口爽爽腍腍,本身無咩味,靠啲油醋汁,整體帶點清新。
bowl竹笙鮑魚雞絲翅
滋潤湯羹同樣3揀1,竹笙鮑魚雞絲翅、蟹皇冬蓉燴翅及是日明火例湯。雖然做咗無翅之徒,承諾唔食魚翅,素翅絕對可以例外吧。雖然喺4人餐,份量5位有多,飲完仲可以添。味道普普通通,但夠足料,鮑魚、雞絲「似層層」。
自選小菜或粉麵,我哋4款都揀晒小菜,包括:三色椒蘆筍牛仔肉、松籽糖醋鴨、荷香金針雲耳蒸滑豆腐及大自然招牌鹽焗雞。
bowl三色椒蘆筍牛仔肉
三色椒只得「兩色」,無所謂,因為有好多蘆筍,蘆筍炒得十分之爽脆,素牛仔肉外觀幾可亂真,味道當然無可能有肉味,但軟腍嘅質感真有幾分「肉感」。若有留意,佢哋啲餸菜真喺做得少油,好似依碟炒牛仔肉,睇落無乜多餘油份。
bowl松子糖醋鴨
素鴨喺以腐皮裹成,外形絕對跟鴨談不上,不過切開後睇其橫切面,一層又一層嘅腐皮,跟鴨肉紋理又有幾分相似。炸好嘅腐皮,淋上五柳酸汁,加啲松子仁便成,其實做法相當簡單,但最緊要佢啲素鴨炸得唔過油,再加點酸甜汁,效果理想。
bowl荷香金針雲耳蒸滑豆腐
全然一道純素食菜式,無話咩扮鬼扮馬,荷香唔知何來,但簡單以豉油佐之,淡雅不寡,況且,雲耳、豆腐都喺有益食材,加上前菜爽口,後者嫩滑,清淡換嚟健康,划算啦!
bowl大自然招牌鹽焗雞
晌細閱餐牌時已留意到依道菜,睇佢個「雞樣」咁傳真已揸定主意要試。真喺好似整鹽焗雞咁包晒錫紙,一打開鹹香味隨隨散發,最搞嘢有雞翼,有雞脾,其實正如大部份素肉,都喺豆製品,但入口煙韌,又好有鹽焗香味,真喺幾過癮。
bowl鬆化芋頭魚 $68
芋頭魚外型明確,炸得色均,附上刀叉方便切成小件,比起用公筷夾到「散修修」嚟得合宜。芋頭魚嘅芋頭味好濃郁,無添加嘅味道,而且,芋頭搓得夠勻夠蓉,食落粉香鬆化。
bowl豉油皇雜菌炒麵 $58
豉油皇炒麵如果做得好,本身已經好好食,大自然嘅炒麵炒得唔錯,麵條光澤爽身,食完碟底又唔會淨番一灘油,豉油嘅味道亦OK,混入少少菇菌,自自然多份口感。
餐後仲有糖水奉送,綠豆沙,雖然唔值咩錢,但煲得又腍又起沙,清潤少甜,有微微臭草香,夠晒承意囉!
由於餐廳生意實在好旺,所以,盡可能都想多做一、兩輪生意,加上我哋食套餐,上菜速度又超快,而我哋都只喺純粹食餐飯,都好配合佢哋,話上糖水就順便埋單,無話晌度打晒躉。服務整體OK,快手快腳,啲侍應做嘢好爽手,食物都好有水準,都難怪咁多人幫襯。

個人評分
味道:8/10
環境:7/10
服務:7/10
抵食:8/10
平均每人消費:HK$120

餐廳資料:
大自然素食 Gaia Veggie
荃灣大壩街4-30號荃灣廣場4樓433號舖
2148 1819

沒有留言:

發佈留言