2014年9月4日星期四

百樂潮州酒樓 Pak Loh Chiu Chow Restaurant:樂此不疲

第一次到訪百樂潮州已經喺成年前嘅事,當時喺去旺角新世紀廣場嘅分店,今次獲邀再訪,喺銅鑼灣老店,雖然門面簇新,金黃流線,但仍掛著昔日守住舊店的老招牌「百樂酒樓」,喺一份有近50年嘅歷史印記。
好多老店都經歷唔少改革,百樂都不例外,入到店內見唔到一絲往日舊痕,雖然模樣都一如中菜酒樓嘅格局,大大小小嘅圓枱(唔覺有卡位),香檳色嘅椅套,感覺都比較傳統,天花中央嘅波燈可能已經喺較時尚嘅裝飾!
bowl酸菜小碟
鹹酸菜、菜脯(加豆乾)已成為潮菜嘅標記。昔日唔少潮州人晌碼頭做咕哩,一碗白粥,少少鹹酸菜加菜脯就喺一餐。
bowl滷水三拼
三拼分喺有滷水鵝片($188)、滷水鵝肉($148)、滷水千層峰($78),如果唔鍾意三拼,當然可以分開點啦。一碟過試齊幾款百樂嘅拿手滷水,點可以唔回味,滷水味道醇香沉實,鹹香適中,而鵝片啖啖肉,嫩滑味濃,蘸點白醋,鵝味突出;鵝肉連皮連骨,相比鵝片多份油脂,油香豐腴;至於千層峰喺以豬耳做成豬腳凍形式,再薄切形成一層層,甚好睇,入口冰涼有咬口,墊底仲有軟滑嘅滷水豆腐,因為滷水味唔太濃,所以,仍食到淡香豆腐味。
bowl滷水鵝肝 $120
依碟喺半隻鵝嘅份量,厚切一片疊一片,都咪話嘢少。鵝肝入口粉嫩甘腴,帶淡淡滷水香,如配一小片多士或法包又如何呢?
bowl潮式凍烏頭 $180
既然喺時價菜式,當然唔會太平,依一尾就要$180,廚師好細心,將烏頭開邊兼去埋中間主骨,令客人食起嚟好方便。烏頭肉質挺實唔霉,鮮味十足,隨魚已附上普寧豆瓣醬,蘸一丁點更能吊起魚鮮味。
bowl檸檬鴨湯 $108
單睇個賣相,個鴨湯感覺真喺普普通通,但絕對喺深藏不露,清澈嘅鴨湯,甘香而帶些微鹹檸酸幽,雖然下成隻鴨去熬製,半點油脂也沒有浮現,輕盈得嚟有種消滯感。之後,食啲鴨肉,滲有檸檬清香,又幾得意。
bowl潮陽炸雙棗 $104
雙棗即喺蝦丸及蟹丸,由於蝦丸以蝦肉撻成蝦膠做成,口感彈牙,滿有蝦味;而蟹丸以蟹肉加生粉搓成,所以,質感實淨,口感兩者好唔同,唯一共通喺兩者都炸得香口甘脆唔油膩。
bowl菊花石榴雞 $120(4件)
第一次品嚐石榴雞喺晌潮庭,當時已好欣賞依道菜式,今晚再遇,必定會細心品嚐。以煎蛋白所做嘅外皮包住雞肉粒、筍粒、冬菇粒……等等做成石榴形,淋上玻璃雞湯茨,並以小棠菜切花做裝飾,賣相已賞心悅目。蛋白外皮薄透有韌性,內餡淡雅清甜有層次,實在要慢慢細味。
bowl潮式薑米鴿 $230 / 隻
米鴿呎吋唔喺好大隻,但內裡塞滿糯米飯,一隻薑米鴿都足夠4人分享。米鴿外皮脆卜卜,好香口,肉質頗嫩滑,而糯米飯黏糯,又吸收咗鴿油,如薑味再能突出啲,相信更有特色。
bowl金華四寶菜 $108(例牌)
眼前喺兩個例牌嘅份量,所以,睇落較為多,金華喺乜應該唔使多講,而四寶菜分別喺冬菇、草菇、冬瓜及珍珠筍,小棠菜只不過喺「間場」嘅點綴。因為加有金華火腿,所以食起嚟帶點點鹹香,味道唔會太寡。
bowl潮州蠔仔肉碎粥 $55 / 碗
一碗本身都唔少,夠兩個人分享,但仍有一窩窩份量嘅選擇,分細中大,每上一級都加多$45,如果7-8人食,叫個中窩都差唔多。潮式嘅肉碎粥有點似泡飯,米粒軟軟不綿,混和好多肉碎,而蠔仔飽滿肥美,又加入咗啲柴魚,好味得再添食。
bowl乾煎糖醋麵 $128(例牌)
估唔到老店都咁搞嘢,唔喺情人節,亦唔喺元宵,竟然剪裁到個糖醋麵成心形。麵餅乾煎開後,糖(沙糖)與醋(浙醋)都按個人喜好自行添加,麵條煎得乾身,初時食唔覺油膩,食到尾就覺得幾油,需加多點醋嚟平衡一下。
bowl福果甜芋泥 $35 / 位
最後上場嘅甜芋泥,連一向嗜甜嘅小弟,望落好似好「漏」。其實整芋泥都幾花心機,又烚,又搓,又煮,芋泥其實芋香濃郁,質感軟綿,面面嘅白果亦好清甜,但有別我哋廣東嘅糊,泥始終都稠密杰身一啲,所以,未必人人都啱口味。相比之下,小弟就較喜愛上次嘅芋泥蛋白!
百樂潮州屬本港潮菜館老字號之一,既守住潮菜真味,亦不斷融入新口味,承與傳實在唔容易。

個人評分
味道:8/10
環境:7/10
服務:8/10
抵食:7/10
平均每人消費:HK$0(試食邀請)

餐廳資料:
百樂潮州酒樓 Pak Loh Chiu Chow Restaurant
銅鑼灣希慎道23-25號
2576-8886

沒有留言:

發佈留言