2014年9月10日星期三

深宵食堂:宵遙自在

有時一大班人同枱食飯,要食得開心愉快,又或夠盡慶,唔單止嘢食好,仲要睇吓喺咩飯腳。同班死佬朋友,天南地北乜都講;同班食友,就交換吓飲食情報,以及研究吓菜式、味道;同班親友,彼此關心,寒暄問暖;唯一最怕,就代公司出席友好晚宴,同枱個個三唔識七,唔知有咩好講。今晚,可以食得逍遙自在,皆因一枱都喺相熟朋友!
深宵食堂位處銅鑼灣商廈,一出電梯就見,以「食堂」為名,總有種小店嘅感覺。果然,鋪內唔大,大概廿多個座位左右,既橫又直嘅條木作為牆身木板,配深啡皮梳化,有份暖和而樸實嘅味道。
餐廳一角牆上嘅書架,放置一列安倍夜郎創作嘅日本漫畫「深夜食堂」,大抵你明白點解店主會將店名改為深宵食堂吧。睇嚟店主喺個喜歡日本漫畫之人,因為除深夜食堂,仲發現有其他漫畫。
細看餐牌,食物大致分為主食、燒物、炸物、一品料理、蔬菜、小食及另一張點菜紙嘅甜點及飲品等。牆上掛有一小塊黑板,寫住好幾款深宵推介。
先分享一下小食類,因為都喺一啲細細份,或者用作開開胃嘅前菜。

bowl辣味花螺 $58
螺肉頗為爽口,味道鮮辣,辣得嚟唔會太嗆,食起嚟幾醒神。
bowl芥茉八爪魚 $48
雖則混入芥茉,但辣度中等,唔會太攻鼻,而八爪魚幾鮮爽,口感帶煙韌。
bowl蟹肉沙律 $48
沙律菜、車厘茄、少許蟹肉、胡麻汁,幾典型嘅西日菜式。原來仲加咗黑醋汁,更酸香醒胃,為之後一串接一串嘅燒物作個清新開始。
bowl胡麻蕃茄 $48
唔使多講,好多串燒店都以此道菜式作為冷盤前菜,鮮紅清甜嘅蕃茄配濃郁胡麻汁,簡單好味。
跟住想介紹燒物,上菜次序當然唔會逐個類別上啦,不過,等大家易於理解,所以,就想每個類別歸納一齊,再逐樣分享。

bowl黑豚露筍卷 $28
聽店長介紹,佢哋好都食材都喺晌附近街市入貨,務求揀手新鮮。就好似露筍,就喺晌附近買嘅街市貨,眼前嘅黑豚露筍卷喺4客嘅份量,露筍質感纖細,爽脆無渣,黑豚肉既薄又富油香。
bowl雞泡魚干 $78
質感好似食啲肉乾咁,軟軟哋身,又燒得有少少焦香,都頗惹味。
bowl一口牛 $68 / 兩串
一口牛應該取自牛柳位置,咬落軟腍,又香又夠肉味,$68有兩串,其實都幾抵食。
bowl汁燒白鱔 $78 / 串
個人覺得喺必食推介,因為白鱔燒得皮脆,鱔肉爽口彈牙,油潤又有點點蜜糖香。
bowl煙肉荔枝卷 $32 / 串
另一個推介喺依款煙肉荔枝卷,煙肉一向被人覺得好肥好膩,但夾埋荔枝肉,一啲無油膩感,食落多咗份清甜。
講完啲串燒肉類,又講講串燒菜類,前後分別試咗兩款:茄子及秋葵。

bowl川式茄子 $68
一大條茄子開邊燒,賣相好有霸氣。茄子加咗唔少蒜粒、孜然粉,所以香氣四溢,而且,燒得恰到好處,唔會「乾爭爭」,唯一少少美中不足喺有輕微過鹹啫。
bowl燒秋葵 $22 / 4條
極之簡單嘅鹽燒做法,燒完下鹽再加啲木魚碎就完喇。秋葵屬好有益嘅蔬菜,口感帶黏黏潺潺,所以,未必人人喜歡。
bowl日式一口雞 $42
好幾款燒物都做得唔錯,炸物又如何呢?日式一口雞,雞肉嘅大細做到一啖一粒,方便入口,外皮酥香甘脆,雞肉嫩滑度亦唔差,個人喜歡唧啲檸汁嚟提味多過沾沙律醬。
餐牌上有好幾款一品料理,算當喺燒物、炸物以外嘅類別。 

bowl芝士蟹肉玉子燒 $62
未見過咁大嚿玉子燒,加埋以蕃茄醬唧成個「深」字,感覺好可愛。最估唔到,件玉子燒做到咁大嚿都仲幾柔滑,內裡喺流心芝士,不過,蟹肉似乎下得唔多。
臨講啲飽肚嘅飯麵主食之前,想分享一下佢哋嘅「深宵推介」,主要喺一啲較特別嘅菜式,或較時令嘅食材所做,一般供應都不定時。

bowl磯煮鮑魚 $98 / 隻
睇賣相已經相當吸引,鮑魚擺得精美,最窩心喺鮑魚已經切成小粒,方便食用。雖然師傅話主要食個汁,但啲鮑魚柔韌有嚼勁,細嚼下慢慢滲出鮑魚本味;此外,伴碟嘅蘿蔔醃煮過,軟腍清甜,同樣精彩。
bowl燒北極深海鱸魚 $198 / 件
深海鱸魚厚切扒燒,燒得金黃好睇,而肉質細滑,魚油豐腴,入口甘香鮮甜,甚有質素。因為喺野生貨式,所以著實唔平,而來貨又唔穩定,師傅話試賣一、兩水,睇吓食客反應先再考慮入唔入貨,所以,今晚遇到都實屬走運。但始終價格頗貴,或許會影響銷情。

bowl鵝肝什菌石窩飯 $108
食串燒志在過口癮,一般都較難食到飽,所以頂肚嘅飯麵喺時候出場。先嚟個石窩飯,一大片鵝肝,加埋什菌,睇樣已經叫人流口水,食依個飯要將鵝肝壓碎,跟其他食材與飯粒撈勻。入口不單飯粒分明,而且,油潤甘香,非常惹味,又喺小弟心水之選。
bowl貓飯 $26
見個名好有趣就好想知佢底世,原來喺白飯加木魚碎,事後被告知原來喺漫畫深夜食堂裡出現過嘅一個菜式。
習慣性,以甜點作為一餐嘅完結,雖然唔喺必然,但唔食又總喺有少少若有所失嘅感覺,哈哈!

bowl甜蜜蜜 $48
甜蜜蜜真喺用上兩個「蜜」:蜜糖及麥芽糖,配以冰凍蜜瓜,不過,麥芽糖凝固咗,好影響個口感,補充多句,相中依個喺兩份嚟,咪以為$48有咁大碟呀!
bowl冰燒菠蘿 $48 / 兩串
串燒生果中,燒菠蘿真喺開正我嗰瓣,菠蘿燒過之後,甜味更濃縮,加上新鮮菠蘿嘅清甜,少許蜜糖嘅蜜香,真喺次次食都覺得好味。
bowl朱古力燒蕉 $38
原條香蕉開邊略燒,之後再雪,再搽上朱古力漿做成脆皮,但感覺未達效果,況且,$38食一隻「燒蕉」應該點計都唔多划算。
晚上嚟散叫消費真喺幾高,所以,如果晌附近返工嘅朋友不妨考慮吓午市嚟食個晏仔,午餐定食都只不過$52-$66,已奉送前菜、味噌湯及飲品;而且,午市竟然都有供應鵝肝什菌石窩飯(非定食),仲只賣$88添。
正如文初所講,跟相熟朋友食一餐,談天又說地,輕鬆自在,當然,想嚟依個小「食堂」就唔使「深宵」先嚟,不過,越夜越人多。

個人評分
味道:8/10
環境:7/10
服務:8/10
抵食:6/10
平均每人消費:HK$330

餐廳資料:
深宵食堂
銅鑼灣耀華街百樂中心6樓
2799 3678

沒有留言:

發佈留言