2014年8月8日星期五

Venchi Chocolate:Venchi‧「搵次」再試!

早前出席過Venchi中環新概念店開幕所搞嘅開幕活動,試咗多款朱古力、意式雪糕及咖啡出品,讓小弟有個滋味超滿足嘅下午,除意式雪糕外,其他產品都甚感輿趣。炎炎夏日真喺叫人做起事嚟都散慢啲,一杯冰涼凍飲可以讓人悶熱全消。
有關Venchi嘅歷史、產品特色、種類……,上次食文都分享過,所以今次就唔多提,單刀直入講「味道」。
bowlVenchi Frappe (Mango) $48
Venchi Frappe有芒果及士多啤梨味,唔好意思,又喺要芒果,因為鍾意芒果多啲。基本上,Frappe其實就即喺奶昔,而Venchi Frappe用上店中芒果味意式雪糕嚟做,仲加入少少芒果果肉一齊打,唔單止質感綿滑,芒果味香甜自然,富奶香,又帶有少少果肉,更喺冰凍可口,的確喺消暑良伴,不過,就要乖乖付上48大洋。
bowl懷舊書型魚子醬禮盒 $228
依「本」小禮盒喺上次到訪時嘅禮物,讓朱古力嘅美味可以帶返屋企,就順道分享埋依個設計別出心裁嘅小禮盒產品。
內裡收納咗6粒共3款味道嘅「朱古力魚子醬」,何謂「朱古力魚子醬」?依個又喺店中招牌朱古力之一,據介紹,喺採用多種中美洲至南美可可豆及75%可可粉以人手新鮮製作而成嘅朱古力粒,無論手功、用料,都喺精益求精,當然,朱古力無魚子醬啦,只喺面層沾滿粒粒烤烘過嘅可可豆碎粒,貌似魚子醬啫。
bowlCrème Brulé(紅色)
3款味道其實都好好食,不過以依款Crème Brulé最得我歡心,無他嘅,焦糖軟心餡絕對喺小弟「賣飛弗」,焦糖嘅獨特濃香,雖然甜膩,但唔喺得個死甜,而喺有份焦香;而包住焦糖嘅應該喺牛奶朱古力,晌口內慢慢溶化,混和焦糖軟心,好有一種特別嘅甜蜜。至於,表層烤烘過嘅可可豆碎粒,沾滿整個外層,可可味好濃郁,口感有少少脆身,令整粒朱古力都變得更有趣。
bowlCrèam Cacao(金色)
以榛子醬代替焦糖成為餡心,都喺配以牛奶朱古力、烤烘嘅可可豆而成嘅組合,雖然味道、口感一啲都唔差,不過,榛子味唔算突出,3者中就未免顯得比較普通少少,缺乏一點點個性。
bowl75%(黑色)
依粒75%老婆超讚,其實黑朱古力小弟都啱,的而且確,餡心嘅純黑朱古力真喺好醇厚,甘苦味恰到好處,慢慢溶在口中而輕輕帶出回甘,認真順滑令人回味。
食朱古力,會令人感到開心快樂,仲要食咗幾款咁高質又咁有心思嘅朱古力,更加開心不過!Venchi,值得搵次再試!

個人評分
味道:8/10
環境:8/10
服務:8/10
抵食:8/10
平均每人消費:HK$48

餐廳資料:
Venchi Chocolate
中環士丹利街地下21號
2868 0336

沒有留言:

發佈留言