成間鋪真喺豆腐潤咁細，4張枱共15個位，部份位置真喺坐到近乎背貼背。除咗地方細，另一出名就喺服務麻麻，所以，你見佢服務一欄個評分都幾低，幾個阿姐粗聲粗氣啲，感覺就被人覺得掘咗，不過，有時等得耐想追追個麵喺點，都有可能被阿姐鬧架。但喺，今日感覺就覺得啲阿姐幾好相與。
此外，衛生又好似好咗。一坐低，除咗一杯熱茶，阿姐順手放低一對筷子，特別在於對筷子有個黑色膠箍圈住，對筷子就唔會咁易掂到枱面（但個人仍然覺得搵熱水洗洗衛生啲），而原來個黑箍喺個筷子托嚟，個設計又幾好喎。
上文講過滄浪亭主打賣上海小食及湯麵，前者有廿款之多，湯麵亦近30款，加埋新推嘅冷麵系列。老婆都喺翻兜嫩雞煨麵，小弟就鍾意試吓啲新出品，就點一客烤麩冷麵！
嫩雞煨麵 $42
睇番以前自己個食評，事隔4年，由$33加到$42，物價嘅升幅都幾犀利。由於佢哋啲嫩雞煨麵喺即場製，所以，都要耐心等候吓。嫩雞煨麵嘅靈魂喺個奶白色嘅湯底，離不開都喺搵老雞、金華火腿、瘦肉、豬骨……等等其中三幾樣嚟熬煮，入口仍然鹹香獨特，不過，印象中，質感就無以前咁厚身，感覺有啲稀薄；而麵條則保持韌勁、滑溜，份量又夠多，再配以已經去皮嘅鮮雞丁，小棠菜粒，一個女生食真喺飽到上頸。
烤麩冷麵 $42
冷麵系列雖然只列咗數款，其實仲有好多選擇，在乎咩餸料配搭個冷麵。今次想食得清少少，所以，揀咗個烤麩冷麵，仲以為真喺得烤麩，原來有青瓜絲、黑木耳，烤麩腍腍綿綿好有咬口，青瓜絲及黑木耳都好爽口，尤其黑木耳，更喺健康食材；此外，麵條加咗芝麻醬及香醋，所以，食起嚟清爽濃香，但又帶有點點酸香，估唔到幾好食。
雖然今次個嫩雞煨麵水準有少少點落，但喺，個烤麩冷麵卻有啲意外驚喜，所以，都值得繼續支持佢！
個人評分
味道：8/10
環境：6/10
服務：6/10
抵食：6/10
平均每人消費：HK$42
味道：8/10
環境：6/10
服務：6/10
抵食：6/10
平均每人消費：HK$42
餐廳資料：
滄浪亭 Tsong Long Ting
美孚美孚新村第1期百老匯街7-11號平台25-26號
2785 0212
滄浪亭 Tsong Long Ting
美孚美孚新村第1期百老匯街7-11號平台25-26號
2785 0212
沒有留言:
發佈留言