2014年8月18日星期一

奇樂香辣雞煲 K Lok Spicy Chicken Hot Pot:樂在奇中

積積埋埋,今年都食咗唔少雞鍋,上品花雕雞鍋、鮮人參藥膳雞鍋、椰青嘉美雞煲、黃金芝士雞煲……等等,不得不佩服當中層出不窮嘅創意,只要肯動腦筋,創意無界限。一向喜歡試新嘢嘅我,從食友嘅食評得知一款「鮮雞冬瓜粥鍋」,清甜下火,就帶同老婆及朋友拜訪,一嚐「奇」味。
位處山林道近尾嘅奇樂香辣雞煲,門面大大個霓虹燈「奇樂」二字,好易認。餐廳環境有點點似飯堂,粗獷水泥地,木枱膠椅,可謂無乜太多餘嘅裝修,但乾浮企理,而且設計窩心實際,如餐枱下有充電器,樓梯口有多組衣櫃,就連冷氣也刻意調低少許,不怕一邊吃一邊冒汗啦!如果你喺怕凍之人,餐廳又有披肩供應,心思處處。
餐廳嘅口號就喺「食雞煲一定係食隻雞」,故此,佢哋主打3款鮮雞:泰安雞、嘉美雞及粵皇雞,重點均在於油脂少、雞味濃、無添加餵飼。
3張點菜紙分門別類,包括牛肉、其他肉類、丸類、餃子、海鮮、瓜菜、豆品、粉麵……等等,最有趣就連小食、串燒都有,但唔知會有幾多人會嗌。
bowl麻辣青瓜、脆炸花生 $8
餐前小食,合共先收$8,都喺像徵式收費,青瓜醒辣爽脆,花生鹹香甘脆。
bowl竹蔗茅根 $48
除啤酒、汽水以外,自家製嘅竹蔗茅根或洛神花都喺上佳嘅健康選擇,揀咗前者,貪其清甜滋潤,冰凍解渴。
bowl調味架
醬料無咩太大驚喜,都喺金蒜、辣椒、芫荽、蒜茸、蔥粒、七味粉,加上我哋想食得清啲,都無太大「混醬」。值得一讚喺調味架有蓋冚,整潔衛生,而且,無論點菜紙,抑或事後收費單,都唔見有收醬料錢,讓人覺得夠大方。
bowl鮮雞冬瓜粥鍋 $198(半隻)/ $338(一隻)
除咗依個「鮮雞冬瓜粥鍋」,店方仲有仍然大熱嘅「麻辣雞煲」及近嚟較新興嘅「椰子鮮雞煲」。以半個大冬瓜去頂兼挖空中心,放晌大鐵鍋內,將冬瓜注入米水作為打邊爐之用,講嚟又奇怪,食到尾都唔見啲米水由冬瓜滲出嚟,鐵鍋內仍然喺清水一鍋,又篤過個冬瓜,證實喺穿底,何解唔晌個底滲出嚟?此外,仲有一點頗有趣,當個鍋滾起時,只有冬瓜內啲米水湯滾跳起,但鐵鍋內清水依然悠悠淡定,認真奇趣無窮,問極個店長都唔講我知點解。
雖然我哋點半隻新鮮嘉美雞嘅份量,但絕不可以小覤,足夠3-4人食用。的確雞嘅皮下脂肪好少,肉質非常鮮滑,不過,都唔好煮太耐,個人覺得滾起個湯先放雞煮,5min左右差不多,亦唔好一次放大多雞件,因為「冬瓜粥鍋」空間比正常雞煲細好多。故此,品嚐依個鮮雞冬瓜粥鍋一定唔可以心急,要慢慢涮,慢慢嘆。
bowl桶蠔 $190
當我哋點咗鮮雞冬瓜粥鍋,店長俾咗少少個人意見,就喺唔好揀太濃味嘅食物作火鍋料,否則個鍋變得濃濁。所以,海鮮類就幾合拍喇,桶蠔一客雖然只有6隻,但隻隻碩大無比,灼完都無乜點縮水,鮮甜味濃。
bowl桂花蚌 $98
仲以為碟底墊咗好多菜絲,實質大碟無欺場,桂花蚌夠新鮮,輕灼之後,口感爽脆,沾少少醬油、蔥花,味道更鮮。
bowl豬天梯 $58
本來心水揀一、兩款牛肉,不過,聽完店長建議就改選兩款豬肉類。其一就喺豬天梯,即喺豬下扒,平時甚少食嘅冷門食材,外形好獨特,入口有少少似豬軟骨,脆脆韌韌,唯美中不足喺有啲臊豬味,好似未洗得夠乾淨嘅豬肚咁。
bowl黑豚肉 $68
一客只有7片,近$10一片,唔太肥,但油脂平均,初時因為喺豬肉關係,煮過籠而有啲韌,之後煮快少少,除幾濃肉味外,肉質細緻柔滑。
bowl手打四寶丸 $98
講明「手打」,有相你睇,四寶包括牛丸、鯪魚丸、蝦丸及墨魚丸。我哋整體覺得,牛丸加咗陳皮寧舍香,牛肉味濃,但口感似牛根丸,唔喺爽口一類;鯪魚丸幾有魚香,質感鮮爽;蝦丸加入咗蟹籽,亦留番少少蝦肉,爽彈有口感;而墨魚丸濃濃墨魚味,果然真材實料。
bowl鮮腐竹 $38
鮮腐竹堆到成碟小山丘,又喺無乜搵蔬菜墊高晒,份量十足。腐竹要灼熟不用花太多時間,食落豆味濃,口感軟軟滑滑。
bowl秋葵 $30
秋葵用嚟打邊爐都算少見,其實太太幾鍾意佢滑潺潺嘅口感,更重要喺佢有益健康,上網查查就知,既清熱解毒,又對腸胃消化有幫助,據說更有治糖尿之效,防止貧血及骨質疏鬆,所以,多吃無妨。
bowl什菇菜籃 $68
太太及朋友都喜歡食菜,一份什菇菜籃樣樣有就最好不過,菜籃擺得靚靚,感覺都好啲,但講到尾,蔬菜夠新鮮就好足夠嘞。
講明「粥鍋」,臨尾梗喺滾個粥嚟食,跟店員講要粥,佢會拎一碗粥水,加入湯底煮綿少少,收收水。雖然打咗成晚邊爐,但個粥煮出嚟出奇唔濁,清新淡雅,唔肥膩,米粒少少綿,感覺頗為健康。事後再問過店員,粥水可添一、兩次,唔太過份店方都唔介意。有興趣仲可以刮少少內壁嘅冬瓜肉嚟食,好清甜,不過,唔好期望可以刮得好深,「煮」咗成晚,只喺薄薄一面煮腍咗。
整體無論個粥鍋,還是火鍋配料,都非常合心水,好適合想食清一點嘅朋友,而且,甚具質素,所以,我哋都食得樂在其中。從點菜紙,仲見佢有欄「不時不食私房菜」($498 / 位),定價或許有點高,如用料、質素夠上乘,相信值得一試! 

個人評分
味道:8/10
環境:8/10
服務:8/10
抵食:8/10
平均每人消費:HK$250

餐廳資料:
奇樂香辣雞煲 K Lok Spicy Chicken Hot Pot
尖沙咀山林道29-31號廣利樓地下4號鋪
23928433

沒有留言:

發佈留言