就連枱上嘅碗碟都精緻過人，印有花蟹嘅碗碟，叫人一望就知此處喺嚐蟹之地啦！
由於食蟹少不免要勞動雙手，所以，晌走廊位加設一段「洗手」間，真喺方便好多，唔使下下出入洗手間。
由於一早已擬定好菜式，所以，大家不用費神慢慢睇餐牌，而10多道菜式中有唔少喺店家嘅推薦，所以，大家都極之期待。
川鹵牛展 $68先嚟一道冷盤，讓大家邊食邊等，川鹵牛展雖然唔及上次食到嘅藍梅山藥、當歸冰鎮鵝翼咁特別，但絕無花巧，賣嘅喺紮實嘅味道，片片牛展切得厚薄如一，軟腍而有點冰涼爽口，鹵水香夾雜花椒川香，微辣不嗆，過過口癮真唔錯。
蒜蓉粉絲蒸蟶子皇 $48/隻
第二道嘅蟶子皇，隻隻都超過半呎長，鋪滿蒜蓉、粉絲、蔥花，熱辣辣嘅蟶子皇入口爽彈鮮甜，肉質肥美，盡吸蒜香滋味，少少蔥花帶點清新，最後，粉絲自然都唔可以錯過啦。
黑松露波菜汁蟹鉗 $68/位
對比上次食改進咗喎，雖然今次唔喺一整片黑松露刨出嚟放面咁矜貴，而喺細碎跟波菜汁打成一片，但整體效果更好。汁底有濃郁波菜味，又帶點兒黑松露香，雖然叫汁，查實可以當湯飲。至於蟹鉗比上次做得更好，味道鮮甜，肉質挺身，啖啖肉真好味。
黃金蟹蓋 $88
一個個蟹蓋焗得金黃帶半點焦燶，香氣彌漫，真喺「撒路溪錢」引死人。咪睇個蟹蓋唔喺好大，其實好足料，滔一羹入口，大概有蟹肉、蘑菇、洋蔥……等等，綿柔得嚟有咬口，底下更有唔少蟹膏，味道豐腴，鹹香細膩，實在回味。
蟹肉燕窩羹 $108/位
蟹肉燕窩羹可不便宜，但真材實料，都值得一試，以肉碎、蟹肉、蛋白及高湯做成嘅湯羹本身已鮮味十足，濃淡恰到好處，再加上養顏燕窩，自不然更合女生享用，小弟依啲粗人，要少啲燕窩又何妨！
招牌將軍令 $68/位
卒之輪到將軍令上場，同樣以位上，不愧為招牌，水準不變，蟹鉗質感鮮甜爽彈，蝦膠打得好應記一功，鋪得滿滿嘅炸金蒜，香脆帶幾分辣勁，惹味非常，難得繼續以親民價會大眾。
椒鹽雙拼 $98
上次嚟店長已介紹過，蟹、瀨尿蝦及椒鹽雙拼都喺鎮店三寶，雙拼分別喺九肚魚同鮮魷，脆漿拉得夠薄，前者嫩滑，後者軟腍，椒鹽味唔算好重，反而蒜香多咗啲，最好用嚟佐酒應該無乜人異議啩。
喜記正宗炒辣蟹 $360
之前幾道蟹菜故然可以食得斯文啲，不過，唔郁手郁腳食番個避風塘炒蟹又好似若有所失。單望對巨鉗已覺得好有睇頭，被大量金蒜籠罩，霸氣十足，蟹肉緊緻挺實，鮮甜惹味，金蒜嘅甘香無冚過晒蟹鮮，只喺拆蟹確喺麻煩啲。
蠔皇扣鮮鮑 $68 / 位
原隻鮮飽扣得軟腍，但以刀叉切開時仍有啜刀感，入口煙韌有嚼勁，配以濃濃嘅蠔皇汁，掛滿晌鮮飽身上，真喺要細意味嚐。
士多啤梨骨 $88
有別一般好似生炒骨或咕嚕肉切細粒去做，而喺以大條大條嘅肉排做，亦無蘸粉漿炸，但肉排質感鬆化；個士多啤梨茨亦調得不俗，酸香甜蜜，無嗆喉感。
蟹粉燴時蔬 $168
連時蔬嘅菜式亦加入「蟹」嘅元素，會唔會太大貪呢？清灼莧菜，再加上大量蟹粉，絕對比起上一次嘅濃湯雲耳鮮茄田園蔬菜嚟得有點豪氣。莧菜清嫩，夾雜蟹粉，無疑添多幾重濃鮮蟹味。
蟹油炒麵 $72
以自家製嘅蟹油蒜蓉王嚟炒麵，加入銀芽、韮黃，雖然簡簡單單，但麵條炒得夠乾身，惹味辣香有個性。不過，個人都喺鍾意上次另一個單尾「鮮蟹肉蠔仔泡飯」多啲！
招牌奶皇流沙包 $24 / 3隻
甜品中以奶皇流沙包喺店家自信嘅招牌，上次食過，真喺做得綿溜富奶香，包身又鬆軟，不過，今次再食雖然流沙包熱辣辣，搣開個包熱氣騰騰，但奶皇餡無上次流得咁澎湃，幸好仍然綿密清香。
依餐既品嚐到店家嘅招牌菜，又有數款海鮮菜式，最緊要都仲喺味道無走樣，依然喺水準作。
個人評分
味道：8/10
環境：8/10
服務：8/10
抵食：7/10
平均每人消費：HK$0（試食活動）
餐廳資料：
喜記蟹將軍 Heekee Crab General
銅鑼灣謝斐道440號地下及地庫
2575 7565
味道：8/10
環境：8/10
服務：8/10
抵食：7/10
平均每人消費：HK$0（試食活動）
餐廳資料：
喜記蟹將軍 Heekee Crab General
銅鑼灣謝斐道440號地下及地庫
2575 7565
沒有留言:
發佈留言