2014年7月15日星期二

百特文治 Pret A Manger:英日新味‧「卷」起滋味

麵包班同學仔啱啱去完首爾嚟,話有袋小手信醒小弟喎,咁就不如兩個麻甩佬約埋一齊,食吓嘢,吹吓水啦。地點選取IFC嘅百特文治(Pret A Manger),原因喺大家都晌中上環返工,收工行過嚟都得,走時一程地鐵又快又直接返到屋企。其次,因為剛巧收到公關送贈嘅新出品換領券,用咗佢唔好嘥,再補啲飲品、甜品,咁就變成既輕鬆、又輕怡嘅一餐。
有時朝早或晏晝經過依間分店,人多得水洩不通,不過,入夜嘅中環,除咗雲咸街、蘭桂芳、蘇豪……等會多啲人氣之外,其他地方都較為靜。故此,就算處於IFC之內,我哋嚟到,亦都見唔多人。補充多句,中上環一共有成5間百特文治,間間都收檔收得頗早,只有依間分店同中環地鐵店開到成9、10點。
今期又推出咩新元素呢?原來喺以日式食材,西式做法,首度創新推出「紫菜薄餅卷」及「壽司沙律」,未知會帶嚟咩驚喜。
百特文治最為人熟悉喺其三文治,當然佢嘅產品都幾多元化,仲有法式長麵包、薄餅卷、沙律、乳酪、熱湯、烤焗法式酥點、甜品、天然乾果包、小食、蛋糕、曲奇……等等,所以,查實薄餅卷唔喺咩新嘢,百特文治一向都有得買,口味如:牛油果烤松子仁、京式烤鴨。今次嶄新推出嘅口味,就有「山葵煙三文魚紫菜薄餅卷」及「棒棒雞紫菜薄餅卷」($44)。
bowl山葵煙三文魚紫菜薄餅卷 $44
紫菜薄餅卷,顧名思義,就喺以墨西哥薄餅卷再外加一層紫菜,紫菜一向都被認定高纖有益。卷心捲住煙三文魚、白蘿蔔、酸薑、菠菜、青瓜,醬汁以蛋黃醬加入日本芥末,所以,食起嚟無論口感還是味道,都富層次,清爽中滲出陣陣辛辣,不過,個人覺得酸薑味稍為大過芥末味,有點喧賓奪主嘅感覺。最貼心喺條紫菜薄餅卷原來一早己切開兩截,方便我哋分,亦方便客人拎嚟食。另外,選料都偏向有益健康嘅食材,貫徹店家嘅宗旨:「用料新鮮,食材天然」。
另一新品,就喺「芝麻雞肉壽司沙律」及「照燒汁三文魚壽司沙律」($45)。沙律嘅選擇晌百特文治一向都幾多,如同樣屬新口味嘅意式雞肉廚師沙律及燻牛肉沙律、公司沙律、甜薯素丸子鷹咀豆醬沙律……,今次新添款式令到選擇增至一共8款,真喺食足一個星期都可以日日唔同款呀!
bowl芝麻雞肉壽司沙律 $45
個薄餅卷試咗啲煙三文魚,所以個沙律就揀芝麻雞肉。而依次嘅新出品,晌沙律中加入壽司飯嘅元素,所以,小弟就覺得話佢喺盒飯加咗少少沙律配菜又得。盒內除壽司飯外,又有烚雞肉,中華沙律、酸椰菜及甘筍絲。壽司飯糝上少少紫菜粉,令味道無咁寡,而雞肉撒上唔少烘過嘅黑白芝麻,又淋埋個和風芝麻汁,幾濃香,卻感覺輕怡。
bowl味噌湯 $18
熱湯除是日精選,你又會唔會揀杯味噌湯嚟襯番以上兩款帶有東瀛口味嘅出品。味噌湯以咖啡杯盛載,湯味比預期濃香,唔會得個樣,麵豉味都幾十足,內裡有少少紫菜,如加少少豆腐粒就仲好。
bowl香橙番石榴熱情果汁 $22
老友都喺喜歡凍飲,要咗支香橙番石榴熱情果汁,佢話估唔到個果汁唔錯喎,第一口飲落覺得有啲怪,不過,慢慢再嗒,嗒得到3者嘅味道,感覺幾得意喎!
咪睇我哋兩個男人老狗,其實都鍾意食甜品,「同學仔」仲喺整甜品、麵包高手,所以,最後,我哋都揀啲甜品作結,咁先完整嘛。
bowl荔枝意式奶凍 $22
打橫一望就見到奶凍分成3層,上下兩層都喺帶濃濃奶香嘅意式奶凍,質感挺身,而中間淺色一層喺清爽嘅荔枝啫喱,整體味道不俗。由於我只喺滔一小羹試試,原來底下仲有一大粒鮮荔枝肉,清甜到爆。
bowl草莓乾果燕麥乳酪 $23
小弟則要杯乾果燕麥乳酪,夠晒健康吖嘛。草莓漿擺晌最底,再上有乳酪及好多乾果同燕麥,酸滑嘅乳酪混和草莓漿,更加酸香醒神;乾果同燕麥,軟硬有咬口,不過,我都喺鍾意「蘋果曲奇甜心乳酪」,因為有蘋果金寶,多份鬆脆香甜口感。
滋味,唔單食到咩好嘢,仲有喺同相熟嘅老友一齊,有講有笑,共名細味。順口都多謝老友嘅手信,滿滿一袋零食,讓小弟又食又拎,有個開心一夜!

下面平均消費一欄,為咗俾大家有個參考,純粹簡單以文中嘅單價計算,因有換領券在手,實際消費當然無咁多。

個人評分
味道:8/10
環境:7/10
服務:7/10
抵食:8/10
平均每人消費:HK$87

餐廳資料:
百特文治 Pret A Manger
中環港景街1號國際金融中心商場1樓1015號舖
2295 0405

沒有留言:

發佈留言