2014年7月3日星期四

羽壽司 Ha-Ne-Sushi:花言巧羽

對上一次嚟美孚嘅羽壽司原來已經喺兩年幾前嘅事,本來羽壽司一向唔喺我哋晌美孚食日本菜嘅首選,不過,老婆話想返美孚食壽司,仲話由佢請,唔使諗,梗喺想幫佢慳荷包啦,羽壽司變成喺不二之選囉,哈哈!
兩年幾前嚟,見佢晚市6:00pm後搞8折(會員75折),不過就由「只限星期日至四」變成「只限星期一至四」,恐怕依個都已經成為吸引客人嘅長期措施。
上次個食評無環境相,今次就補番少少先。其實個場都幾大,近門口位都喺啲散座或卡位,再入啲中間則喺迴轉壽司吧,不過,唔好客坐晌吧位,所以見佢條迴轉帶都無乜壽司擺出嚟,都喺即點、即做、即送形式多。
晚市有兩款優惠套餐,一款喺以唔同嘅壽司、刺身配小食及飯麵,做緊推廣價為$72-$136,另一款主打蕃茄蜆肉鍋,加配飯麵、小食、沙律、卷物,定價為$108-$158。兩者都送甜品一客,以及可以優惠價換取一杯特飲。本來,簡簡單單兩款套餐各揀一樣,但考慮到夾埋嘅份量頗多,擔心食唔晒,所以,就只叫咗前者個套餐,另再散叫一客卷物及一個烏冬。
既然幫佢慳錢,就揀個最平嘅Set A,有8件壽司,小食要南瓜天婦羅,飯麵選咗迷你魚生丼,並+$5要杯白桃紅芭樂,夾埋晒先$79。
bowl壽司
除有兩件三文魚壽司外,其餘6款壽司都喺唔同款式,分別有螺片、帶子、腐皮、蟹柳、甜蝦及池魚。啲壽司唔太差喎,壽司飯搓得幾好,唔太散,又唔會太實,整體魚生都新鮮、鮮甜,尤其三文魚、帶子同甜蝦,不過件螺片好韌。有成8件壽司,又有一定質素,所以,覺得幾抵食。
bowl南瓜天婦羅
雖然只有3件,但脆漿做得夠薄,南瓜本身夠粉又夠甜,正晒啦!
bowl迷你魚生丼
叫得迷你,當然細份啲,不過,又估唔到魚生嘅種類及份量又唔覺喺太縮水,驟眼一望,都有4、5種魚生,如三文、吞拿、帶子……等等,算得上好足料;而飯粒就欠咗份黏糯感,但食得出飯內加咗少少醋。
bowl白桃紅芭樂
芭樂即喺蕃石榴,個白桃芭樂汁乳白色,酸酸甜甜,雖心知都喺現成貨,但均飲到白桃及芭樂嘅味道,只喺加多$5已有一大杯,仲想點!
bowl芝麻咖喱蝦卷 $20
本應一客3件,今次老婆趁我影其他嘢手快快已經食咗件,佢話真喺幾好食喎。雖然,裡面嘅炸蝦無乜鮮味,但個幾好配搭,吉列咖喱炸蝦,做成反卷,又沾滿芝麻,所以幾香!
bowl木魚花蕃茄烏冬 $30(細) / $56(大)
老婆一向都鍾情蕃茄湯底嘅湯粉麵,所以,依個木魚花蕃茄烏冬好啱佢心水,烏冬有3款口味,並跟一隻溫泉蛋,佢揀咗炭燒雞肉串,並且要個細份。個蕃茄烏冬比預期中好,蕃茄湯底好夠濃,烏冬有韌勁,但入口又滑嘟嘟,而炭燒雞肉不過不失,反而奇就奇在晌隻溫泉蛋上,入口竟然凍嘅!
套餐所謂送嘅甜品只不過喺雪米糍一粒,由於我哋只叫咗一個套餐,店方就真喺只會俾一粒你,別期望會鬆手啲俾多粒。雪米糍喺荔枝味,雪得比較實,應該攤耐啲先食為佳。
上次嚟食嘅嘢其實都不俗,至少我俾分俾合格,只喺衰晌服務手上。今次嘅嘢食同樣唔錯,而且,仲好抵食添,兩個人夾埋連加一都唔使百四,不過,服務依然改善不大,事緣佢講明有8折,亦知道正價食品先有,所以,預咗個套餐無。點知,佢就連個蝦卷都無扣,雖然只喺慳得幾蚊,但問題喺啲服務太「求其」。「8折」!總感覺有啲花言巧語喇。

個人評分
味道:7/10
環境:7/10
服務:6/10
抵食:9/10
平均每人消費:HK$70

餐廳資料:
羽壽司 Ha-Ne-Sushi
美孚美孚新村萬事達廣場1樓N84B-85舖
3427 9595

沒有留言:

發佈留言