曲奇童話 Conte de cookie：好友狂嚐曲（十九）

小弟生於草根，為人好實際，屋邨仔捱起，所以唔太相信咩童話故事，不過，好多童話故事都有佢值得欣賞嘅地方，幾鍾意伊索寓言依本童話故事，因為個個故事背後都有寓意，有意思。早前食友試過灣仔「曲奇童話」嘅出品，醒咗一小袋俾小弟品嚐，真喺要多謝食友嘅錯愛。

熊貓一小袋裡邊有6塊曲奇（註：熊貓小袋非店方專用袋，乃食友分拆一整盒曲奇時所用嘅小膠袋），當中有一款味道重複，不過，都可以一次過試上5款味道，實在太好。哈哈，又喺沖杯咖啡，嘆吓曲奇嘅蛇王時段。

黑芝麻阿麻籽

曲奇童話嘅曲奇質感唔太脆，但口感鬆化，有少少似之前食過嘅美心曲奇，不過牛油味唔會太濃，感覺輕怡少少。而依款黑芝麻阿麻籽，喺高纖之作，非常有咬口，帶有重重芝麻香。

咖啡夏威夷果仁

咖啡配果仁一向甚有市場，咖啡味十分突出，未食都聞到，夏威夷果仁碎亦落得唔手緊，香脆好食，不過，曲奇中黑色一點點就食唔出喺乜！

雜莓

以紅桑莓、藍莓、士多啤梨乾嘅組合，因為牛油味唔太濃，所以嗒落莓乾嘅莓香都幾明顯，滲出少少酸甜味，味道唔錯。

橙杏仁

雖然睇落無雜莓味咁多果乾，不過，對比起，橙味仲更加突出，唔知做曲奇時有無加入橙汁呢？此外，內藏杏仁薄片，令口感多份香脆感。

綠茶開心果南瓜子

繼黑芝麻阿麻籽曲奇，又喺另一款好食有咬口嘅曲奇，開心果、南瓜子佈滿曲奇內，加上曲奇本身綠茶味幾重，個配搭幾好。

從食友個食評得知，店方仲有多款曲奇，例如：海鹽牛油、朱古力橙、桂花桂圓黑糖、鳳梨……等等，都喺幾好奇、幾想試嘅味道。有機會都要走訪下依個「童話」小國。

個人評分
味道：8/10
環境：- /10
服務：- /10
抵食：- /10
平均每人消費：HK$0（禮物）

餐廳資料：
曲奇童話 Conte de cookie
灣仔盧押道7-9號澳洲大廈地下B4舖
2489 2499