2014年6月22日星期日

下一站...甜品 Next Station ... Dessert:再.下一……城

之前一篇「Next Station Dessert… Mind your dollar please!」(http://garycwm.blogspot.hk/2014/05/next-station-dessertnext-station.html)已分享過當日所試嘅幾款甜品及飲品:雲呢拿泡沫配榴槤雪葩、粟子拿破崙、黑胡椒心太軟配雲呢拿雪糕、Mango Smoothie,都感受到店主對製作甜品嗰份用料有要求,製作有心思嘅用心。所以,再下一城!
都順帶講講,以前嘅「下一站...甜品」所賣嘅都有中有西,較為港式,但又頗新派,但新鋪轉型,擺明主打酒店級甜品,唔喺一般港式乜撈物撈、乜珠物珠之類,反正幾位合伙人都喺出身自萬麗海景酒店嘅甜品師,年資皆不淺,有嘅喺實力,製作自不然大膽啲、天馬行空多啲都得,無拘束,既然目標清晰,啲甜品要做到酒店水準,自不然要落足心機。全店實木枱椅,部份配置高腳枱椅,開放式廚房,一側書櫃玩味十足,幾把懷舊吊扇,比起舊店,絕對喺型格大翻新。
bowl鳥結糖芭菲 $49
賣相甚有藝術氣質,其實,芭菲屬於小弟較少接觸嘅甜品類別,芭菲主打成份喺忌廉及牛奶,所以,好重奶香,質感輕柔;據店員介紹,杏仁喺炒香打碎後加入而做成芭菲,唔怪得咁有濃郁杏仁香,有種「鳥結糖」嘅感覺,再者,杏仁打得唔太粗又唔太碎,味道、口感均富層次,不失招牌之名。就連裝飾用嘅杏仁脆片,睇得又食得。
bowl法式朱古力班戟配青檸雪芭 $56
將班戟做成「春卷」形,已見其心思。先講講個法式朱古力班戟,皮薄唔在講,有圖為証,內裡填滿朱古力慕絲、蛋黃加忌廉做成嘅Bavaroise及朱古力脆豆,其實以前舊店都有一款甜品叫「雲呢嗱Bavaroise」,可是依家無再做喇。慕絲軟滑香濃,Bavaroise食落有點似吉士,不過挺身啲,配合埋朱古力脆豆,改變咗班戟口感嘅常規。而白雪雪嘅青檸雪葩,入口冰涼酸爽,下面墊有少少脆餅碎,又可令雪葩嘅口感唔單一。
bowl暖朱古力泡沫 $56
之前一篇食評都分享過雲呢拿泡沫配榴槤雪葩(「泡沫」系列一共有4款,兩款暖泡:暖朱古力泡沫、暖拖肥泡沫及兩款凍泡:雲呢拿泡沫配榴槤雪葩、綠茶泡沫),個配搭確實幾新鮮有趣,依次就分享兩款暖泡。由櫻桃酒浸車厘子、手指餅(當然唔喺嘉頓嗰隻啦)、野莓乳酪雪糕、朱古力脆豆及暖朱古力泡沬所組成嘅「暖朱古力泡沫」,有種黑森林蛋糕變奏嘅感覺。暖朱古力泡沬嘅甜,跟野莓乳酪雪糕嘅微酸,有相互平衡嘅作用,車厘子好有酒香,不過,手指餅乾身,個人認為麻麻,唔似做意大利芝士餅時嗰種濕潤帶咖啡酒香,此外有太多朱古力脆豆亦唔喺咁好。
bowl暖拖肥泡沫 $56
上面個「暖朱古力泡沫」感覺麻麻,咁另一款暖泡「暖拖肥泡沫」又如何呢?賣相一層扣一層,已見心思,以百利甜酒所做嘅奶凍、薄薄一層特濃咖啡啫喱、鮮香蕉果肉、雲呢拿雪糕、暖拖肥泡沫及杏仁脆餅打造,效果相當理想。個暖拖肥泡沫就咁淨食會偏甜,但夾埋特濃咖啡啫喱、雲呢拿雪糕一齊食,意外個味道頗平衡。加上奶凍軟滑挺身,香蕉果肉又夠熟,味道多變,質感富層次,就算冰火感唔太強,但對此甜品已十分滿意。
bowl粟香紫薯山 $65
打開餐牌時已經喺好想試嘅甜品,因為外型獨特,加上試過佢嘅粟子拿破崙,粟子蓉做得確有一手。果然,粟子蓉粉香綿柔,濃郁粟子香味;而紫薯山底層嘅苤芽蛋白脆餅,無想像中嘅過甜,咯咯聲咁脆;中層嘅日本紫薯蓉真喺超正,入口勁紫薯味,又搓得幼細軟滑;為咗做得似座山,上層嘅雲呢拿雪糕球就變得點綴大過實際,如果可以改為一個蕃薯雪糕球就一流嘞!其他裝飾用嘅小粒紫薯蓉、薄脆少甜嘅紅色脆糖,都落足功夫,絕對擺到似足件藝術品。
一個滿足嘅下午,源於多款滿意嘅甜品!美味,值得跟朋友一同分享。

個人評分
味道:9/10
環境:8/10
服務:8/10
抵食:8/10
平均每人消費:HK$70

餐廳資料:
下一站...甜品 Next Station ... Dessert
旺角黑布街13號地舖
2668 8355

沒有留言:

發佈留言