2014年6月23日星期一

齒來香蛋卷:為齒而來

食友遊走西環,拜訪多間老店,仲特意為小弟帶來一包特製鮮椰汁鳳凰蛋卷作「手信」,鳳凰蛋卷出自屹立晌西營盤第三街逾40年歷史嘅「齒來香」,除主打馳名嘅蛋卷及鳳凰蛋,據食友講仲有多款懷舊本土特色餅食。
收到包好嘢,就益吓同事一齊分享。食友話佢啲蛋卷及鳳凰蛋卷喺即場人手製作,喺講求生產效益嘅當下,依啲家庭式手作仔真喺絕無僅有,絕對喺如假包換嘅香港製造,唔單止食佢嘅味道,仲有一份心意及真誠。
一包有11件,件件大細不一,蛋卷皮色澤亦都不一,可見全手製嘅痕跡。打開包裝已聞到好有蛋香,最有心思喺,蛋卷皮加入已炒香嘅黑芝麻,所以,每啖咬落去都喺蛋香及芝麻香共融。
依家啲鳳凰蛋卷味道出到五花八門,而齒來香嘅特製鮮椰汁鳳凰蛋卷還原基本,只以椰絲為餡。蛋卷首要喺夠脆,佢哋嘅出品,豈止合格有餘,一咬明白到嗰份超脆感,而且,落咗勁多椰絲,好食到不得了!
多謝食友嘅餽贈,想懷舊,想嚐鮮,又或只想支持本土老店,都值得為「齒」而來!

個人評分
味道:9/10
環境:- /10
服務:- /10
抵食:- /10
平均每人消費:HK$0(禮物)

餐廳資料:
齒來香蛋卷
西環西營盤第三街66號福滿大廈地下
29759271

沒有留言:

發佈留言