美心MX Maxim's MX：我的星期六美孚早餐 ~ 抵食之選

之前，寫咗唔少小弟晌美孚區食早餐嘅食評，一向晌屋企多過出街食早餐，事緣都喺公司實行5日制之後，星期六朝早得閒咗，就決定偷懶唔煮而多咗出去食。前前後後以「我的星期六美孚早餐」都寫咗好多篇，雖然照樣有星期六落去食，但少咗出文，因為多數都離屋企較近嘅快餐店或美心，真喺又無咩好寫。不過，今次美心MX嘅早餐，又想講番幾句。

美心經常晌啲免費報紙派$2 / $3現金券，我就喺經常嘅受惠者，同老婆兩個減一減，雖然只喺夾埋$4，但平均每人都喺食咗廿蚊鬆啲，比去麥記食個扭扭粉餐或早晨全餐仲要平好多。跟附近嘅茶記比，亦都喺平啲！其實唔喺想講張現金券，只喺近來聽食友講剔咗現金券會被OR改為試食活動喎，我諗我依篇點都唔會啦，哈哈。

更有營系列 $23

睇番差唔多兩年前嘅食評，「更有營系列」分3款：菠菜蕃茄甘筍麵、菠菜雞肉餃子蕃茄甘筍麵、菠菜豬肉餃子蕃茄甘筍麵（$19.5-$21），配餐飲。依家都一樣有3款：什菇粟米蕃茄麵、肉片粟米蕃茄麵、魚塊粟米蕃茄麵（$23-$24），配啡茶，近兩年日子，加咗$3，個人嚟講可接受啦。什菇、粟米、蕃茄麵又的確算喺較健康嘅組合，味道方面，清清淡淡，不過不失，但別太期望蕃茄麵好有蕃茄味，至少質感唔差，有咬口感。

港式早餐系列 $22

近依兩年左右，個港式早餐系列都無點轉變過，都喺蛋白麥皮、羅宋湯通粉、火腿湯通粉、雪菜肉絲湯米，跟火腿煎蛋，配厚多士或蘿蔔糕，包啡茶，當然，嗰時賣$20-$20.5，依家就加少少到$22-$23.5啦。小弟揀蛋白麥皮，要厚多士，飲咖啡，老實講，樣樣都喺好基本嘢，又唔喺話特別用咩貴料，又或有咩獨特煮法，心想只喺求一餐平平穩穩，慳慳哋又唔使自己郁手嘅早餐啫。無太多要求，就唔會有太多訴求，哈哈！

其實，今次又再寫吓美心，最主要都喺想講吓事隔近兩年，兩款同類嘅早餐加幅都唔大（至少以我個人而言），用埋佢啲$2現金券，兩公婆夾埋先$41，「抵食」當然唔及晌屋企自己煮，但食完輕輕鬆再行吓荔枝角公園，不知幾爽啦。

個人評分
味道：6/10
環境：6/10
服務：6/10
抵食：8/10
平均每人消費：HK$20.5

餐廳資料：
美心MX Maxim's MX
美孚蘭秀道1-15及2-24號美孚新邨五期地下N10-N12號舖
2743 2793