一室紅黑配襯，較帶中國色彩，但保持中高檔次格調，無咁酒樓格局。大中細圓枱，人多人少嚟都無問題，個人就較鍾意另一邊二人或四人方枱，比較靜局，騷擾度低，而且配置梳化椅，讓人坐起嚟舒服得多，加上天花掛有數個「雀籠」吊燈，更添特色。
小弟為人最怕煩，是夜搞手已度好所有菜式，所以，成晚都食得輕鬆，可以好好享受眼前美食！
藍梅山藥
先以兩個風味小食熱熱身，第一個「藍梅山藥」，本身嘅配搭及賣相，都創意十足。山藥即喺淮山，平時煲湯見唔少，都喺一片片，依家切成條狀，入口爽爽哋，再淋上鮮甜藍莓醬，估唔到個配搭都OK喎，再者，山藥有助消化、健脾益胃，喺一道有營冷盤。
當歸冰鎮鵝翼
當歸遇上鵝翼，唔知會產生咩化學作用，不過，試過之後，鵝翼冰涼爽快，但當歸味唔重，火花唔算好大。
招牌將軍令
以位上嘅「招牌將軍令」，巨型炸蟹鉗座晌大量金蒜之上，猶如軍令如山咁架勢。蟹鉗質感鮮甜爽彈，啲金蒜炸得香脆不油，仲帶幾分辣勁，惹味非常。事後講起，正值店方做緊推廣令，每隻都只喺賣$68，認真抵食。
豉椒炒蜆
未炒蜆，最緊要令啲蜆吐沙，否則炒得點好都嘥料，喜記晌依個步驟無偷懶，小弟一粒都食唔到有沙。炒蜆屬中辣程度，蜆肉都夠飽滿，吉殼唔多，只喺鹹咗少少。
椒鹽雙拼（九肚魚拼鮮魷）
搵九肚魚同鮮魷做椒鹽，一向都大把捧場客，依家一客就試勻兩味，最好不過。據店長介紹，除蟹及瀨尿蝦外，依道菜喺鎮店三寶之一，果然夠火喉，脆漿夠薄，九肚魚入口好滑，鮮魷則軟綿綿，晌依個成日講健康嘅年代，椒鹽味道恰到好處，鹹香唔過火位，明顯少鹽咗。
黑松露菠菜汁鮮蟹鉗
單單菠菜汁鮮蟹鉗已有賣點，加埋黑松露片，立時矜貴不少。鮮蟹鉗肉質鮮甜，帶點菠菜香，剩餘嘅菠菜汁可當湯飲，唔會嘥，不過，蟹鉗有啲煮過籠，出現少少嚡嘅情況。此外，對上3道菜都喺味濃之物，顯得依道鮮蟹鉗有啲「寡」嘅感覺。
鮮蟹肉蒸釀冬菇
每個冬菇都釀滿鮮蟹肉，蟹肉非常幾多，入口軟綿，而冬菇大隻厚肉地，淋上蟹肉茨汁，相當不俗。
濃湯雲耳鮮茄田園蔬菜
雲耳、鮮茄、黃牙白，配個濃湯底，簡單嘅組合，嚟得清淡健康，食咗咁多濃味油炸嘢，都喺時間清清味蕾。
金牌牛肋骨
其貌不揚嘅牛肋骨，絕對值得俾個金牌佢，據介紹個做法喺以美國牛肋骨先燉後炸，所以，表面脆脆，但肉質鬆化，一啖有兩重口感，再配個以牛骨推成嘅蒜蓉汁，香氣四溢。人少嚟當然有散叫，眼前份量喺兩個例牌。
招牌蟹油炒麵
之前晌尖沙咀店都已經食過一次，感覺相當唔錯，就算抄番上次個評語都相差無幾。麵條炒得夠乾身，除銀芽、韮菜，面頭一層自家炒製嘅蟹油蒜蓉喺靈魂所在，既惹味，又鮮香，辣味仲會慢慢滲出嚟，有個性。
鮮蟹肉蠔仔泡飯
諗住個蟹油炒麵夠招牌啦，點知另一道鮮蟹肉蠔仔泡飯亦都出色。鮮蟹肉粥底本身已夠鮮甜，加埋飽滿蠔仔，鮮味加倍，再滔入脆炸米粒內，口感豐富，鮮香有層次。
香滑流沙包
見到甜點登場，就知去到尾聲。先嚟一大籠香滑流沙包，熱辣嘅流沙包，必然要趁熱食。搣開包心，鹹蛋奶黃餡瀉出亂竄，綿溜富奶香，包身又鬆軟，正呀！
楊枝甘露
第二道甜品喺楊枝甘露，雖然柚子飽滿，但略嫌佢奶味較重，芒果味失衡，多啲芒果汁應該效果理想好多。
杞子桂花糕
同場加映嘅杞子桂花糕，色澤琥珀，外觀晶瑩剔透，最啱心水喺唔太甜，而且，幾有桂花香味。
整晚菜式多樣化，冷盤、小炒、熱葷、蒸釀……樣樣皆有，試到師傅做菜唔同技巧，功夫相對紮實。而且，兩道蟹鉗菜式，加兩道蟹肉菜式，及一味蟹油炒麵，唔做親手拆蟹，都品嚐到蟹嘅滋味，方便好多。當然，菜式配搭或出菜次序仍有少許改善空間，但個人而言，已覺得甚具水準，就算唔喺嚟慶生，都值得同朋友過嚟一試啦！
題外話，個招牌蟹油炒麵及杞子桂花糕喺額外送嘅，而平均每人消費亦未包酒水，因為酒水嘢可大可少，計埋難作參考。
題外話，個招牌蟹油炒麵及杞子桂花糕喺額外送嘅，而平均每人消費亦未包酒水，因為酒水嘢可大可少，計埋難作參考。
個人評分
味道：8/10
環境：8/10
服務：8/10
抵食：9/10
平均每人消費：HK$300
味道：8/10
環境：8/10
服務：8/10
抵食：9/10
平均每人消費：HK$300
餐廳資料：
喜記蟹將軍 Heekee Crab General
銅鑼灣謝斐道440號地下及地庫
2575 7565
喜記蟹將軍 Heekee Crab General
銅鑼灣謝斐道440號地下及地庫
2575 7565
沒有留言:
發佈留言