2014年4月23日星期三

Prime Bar & Restaurant:意外錯過,又意外再嚟過!

早前晌Groupon見到有間新開無耐嘅酒吧餐廳做團購,$138優惠券可換領2人6道菜歐洲聯菜晚餐(原價$730)或$268優惠券可換領4人10道菜歐洲聯菜晚餐(原價$1,344),足足二折,仲要喺已經包埋加一,抵到無朋友,好心動想買,不過,最終意外地錯過咗,邊間咁筍?咪就喺位處太和嘅Prime Bar & Restaurant囉!
雖然意外錯過,但又意外再嚟過,事緣喺朋友嘅死黨所開,知我份人為食,預埋我一齊嘆番餐高興一下之餘,又以客人身份俾俾意見。俾意見就唔講得,小弟依啲「殿堂」虛銜嚟啫,不過,晌飲飲食食上,就樂意彼此交流啦。
一室黑、銀、紅,高腳櫈,既然喺酒吧,當然晌裝修上會型格摩登啲。幾邊牆壁都裝有大電視,直播足球賽事已經喺指定動作,遲啲巴西世界盃,就更加氣氛熱鬧。
餐廳雖然有做團購晚餐,但晚市主要都以散叫為主。一手接過餐牌,型呀!電子發光餐牌,一打開唔怕昏昏暗暗睇唔清楚。菜式分5大類:小食 / 前菜、薄餅、沙律、意粉、主菜,而飲品就唔使多講,身為一間酒吧,就一定選擇多多!
電子發光餐牌,型呀!

小食/前菜類屬餐牌中較多嘅選擇類別,一共有10款,試咗當中4款,溫水蛋脆包及米紙卷甚有驚喜。

bowl溫水蛋脆包配黑醋魚子 $88
一客有兩個溫水蛋脆包,食法喺用刀由上而下由溫水蛋心直插入脆包之內,讓蛋汁流入包中。巨大立方粒脆包磚果真烘脆過,一咬就跟食多士一樣,不單外脆內軟,而且有蒜蓉香味;最精彩就喺對上嘅溫水蛋,蛋汁滲入包內,更游走到包外,再蘸點黑醋魚子,感覺喺滋味滿瀉。
bowl紐約水牛城雞翼 $98
雞翼揀嚟超大呎碼,份外有睇頭,外層炸得金黃,一咬酥脆香口;而內裡富肉汁,再沾啲秘製醬汁,濃香惹味。側旁嘅沙律菜,原來添加咗黑醋,真喺做得唔馬虎。
bowl脆炸魚柳薯條 $128
炸魚柳橫陳晌木托盤上,除有懷舊曲紋薯條之外,仲有一小片鮮檸檬及自家製黑松露沙律汁,仲以為跟傳統嘅他他醬,真喺又一個心思位。雖然菜式簡單,但感受到師傅嘅功夫,粉漿厚度恰到好處,一咬應聲裂開,好鬆脆,最得我歡心喺唔會一口油。而魚柳做得嫩滑,有少少意想不到,配支英國啤,應該更襯喔!
bowl脆炸虎蝦牛油果米紙卷 $138
雖然虎蝦去咗蝦頭,但僅憑蝦身,一樣估得出隻虎蝦至少有10吋以上長。做成天婦羅虎蝦之後,加入牛油果,再以薄透嘅越南米紙捲實,點一點泰式甜酸醬,爽彈嘅虎蝦肉寧捨鮮味,然而米紙卷令口感多添一份韌勁。
Prime Bar所做嘅披薩都標明喺又薄又脆嘅類型,4款披薩都較為屬於經典款式。

bowl黑松露野菌薄皮披薩 $108
又薄又脆?果然,大概直徑8吋嘅黑松露野菌薄皮披薩,薄得交關,鬆脆得要緊,有少少食餅乾嘅感覺。精彩在後頭,餅面鋪得滿滿多種野菌,又加入黑松露醬,仲永無手緊,實在唔芳香馥郁都好難,值得推介。
bowl鮮帶子牛油果沙律 $108
點咗個鮮帶子牛油果沙律,點解得牛油果?落漏咗鮮帶子?非也,帶子晌晒沙律菜下面,話鮮帶子,其實喺煎帶子,粒粒帶子都大過5蚊銀,又煎得外層帶點脆,不過,一客就只得3粒。而沙律菜下咗胡麻汁,加入大量有營有益嘅牛油果,及少少車厘茄,感覺健康清新。
bowl香芒虎蝦沙律 $138
依道亦喺非常好味嘅沙律,沙律菜改用油醋撈過,配以清甜嘅呂宋芒、烤虎蝦、松子仁,令整個沙律富香味,口感富層次。
bowl卡邦尼意大利麵 $88
「卡邦尼」喺朋友嘅「飛弗」,所以,喺意粉類嘅內定之選。意大利煮得有咬口,所有麵條亦都掛滿醬汁,醬汁奶香幼滑,但感覺蛋香味唔算好強,幸而配料十足,啖啖都食到煙肉及磨菇。
bowl黑松露野菌意大利麵 $108
繼個披薩之後,依個意大利麵亦喺小弟嘅真心推介,既然個披薩做得好食,無理由換咗意粉就差架。意粉混有大量黑松露醬及野菌,上枱已有一陣陣菌香,而意粉咬口又沾得滿滿黑松露醬,真喺令人回味。
bowl焗德國咸豬手 $168
一大隻鹹豬手,大廚窩心咁將佢先切開細件,方便客人食用。豬手外皮非常之脆,肉質亦都燒得軟腍,而皮與肉之間層脂肪,未必人人可接受,因為肥膩到啜咀。而附上兩小兜醬汁:薑橙醬、芥茉蜜糖醬,兩者都各有特色,前者更喺首次試,所以,份外特別;至於伴菜嘅酸椰菜,如果更酸多一啲嘅話,夾住豬手嚟食,更清膩,感覺更好。
bowl燒嫩羊扒 $288
依幾件BB羊扒,極具質素,食落肉嫩羶香,唔喺配薄荷醬,反而跟燒汁,效果都唔差。羊扒身後嘅伴菜,唔喺普通沙律菜,仲有車厘茄,烤矮瓜、薯仔,簡簡單單佐以陳醋,已經好好食。整道菜賣相、味道的確有水準。
bowlFlamingo $42(歡樂時光)/ $58(正價)
小弟一向唔好酒,除非喺高興事,所以,今晚揀杯非酒精雞尾酒好嘞。Flamingo喺用菠蘿汁、紅莓汁、檸檬汁加梳打溝成,色澤帶點橙黃,味道以菠蘿汁為主導,酸香清爽。
餐廳本身都有提供午市套餐,主要都喺歐陸菜,包餐湯、主菜、飲品,定價$48-$68,仲免加一服務費,額外加多$12仲有份精選沙律。平日當然入唔到嚟試啦,但星期六、日過開嚟大埔行山或踩單車,都可以諗諗佢。
今晚食咗多款菜式,實在滿腹滋味,對其水準確喺意料之外。

個人評分
味道:8/10
環境:8/10
服務:8/10
抵食:8/10
平均每人消費:HK$350

餐廳資料:
Prime Bar & Restaurant
大埔太和路15號太和中心37號舖
3565 4258

沒有留言:

發佈留言