2013年11月23日星期六

Fat Angelo's:肥安嘅董事午餐

雖然小弟一向都偏向鍾意試新嘢,但對有啲食肆都有少少偏愛,間唔時都會返兜,Fat Angelo’s喺其中一家,皆因其大眾化價錢,但又算喺質、量兼備,正所謂大件夾抵食。
其實,未結業前,都有幾多人幫襯佢,就以今次星期六午餐時間為例,都近乎「全院滿座」,又好多一家大細嚟食。講環境,比起好多中檔次西餐廳唔輸蝕,紅磚牆,紅枱布,甚有意大利家庭式小店古雅風格。
午餐分3個價位:
 - Lunch Combos $88:包新鮮麵包、田園沙律、餐飲可揀一般啡茶、汽水,主菜就較為大路嘅薄餅、意粉。
 - Executive Set Lunch $148:包新鮮麵包、田園沙律、意式雜菜湯、餐飲可揀優質咖啡、紅茶、汽水,一客意式雪糕,主菜會特別少少,如紐西蘭西冷扒、迷迭香燒雞、燒美國豬肋骨。
 - The Directors Table $198:下面再詳述,所有午餐都另收加一服務費。
The Directors Table 
今次豪少少請老婆食晏,就喺揀依個「董事午餐」。$198包啲乜?包新鮮麵包、餐飲可揀啤酒、餐酒、添加汽水、優質咖啡、紅茶,再加埋意式風味冷盤沙律,蟹肉濃湯,高級別主菜3揀1,甜品4選1,稍後介紹埋有咩主菜、甜品可揀,你就會認為個餐超晒值。
bowl麵包籃
貴為中檔次嘅美式意大利餐廳,麵包籃唔會咁港式一兩片蒜蓉包,或一兩個餐包仔,兩大個農夫包,煙韌實在,沾黑醋、橄欖油,簡單好食。
bowl蟹肉濃湯
橙紅嘅濃湯,果然濃郁,裡面真喺有少少蟹肉,絕無欺場,只喺有啲啲鹹,否則就完美喇。
bowl意式風味冷盤沙律
初時見佢個名「意式風味」覺得好虛,何謂意式風味?個冷盤沙律一上枱,完全明晒,沙樂美腸、巴馬火腿、羊奶芝士粒、黑橄欖、青橄欖、大茴香片,加少少沙律菜,真喺非一般午餐田園沙律。較鹹嘅沙樂美腸捲住沙律菜食,味道一流,柔軟中有爽脆,鹹味中有清甜,而火腿又油潤鹹香,真喺一道有睇頭,又豐富嘅沙律。
主菜定明3揀1,分別喺美國頂級熟成去骨牛扒、龍蝦香辣鮮茄新鮮天使幼麵及脆烤羊架配香橙酒薄荷香草醬。其實,3款睇見都心郁,樣樣都想試,總之搵埋姨仔一齊嚟食,就唔使傷腦筋。最後,同老婆揀咗前兩者:牛扒及天使麵。

bowl美國頂級熟成去骨牛扒
雖然賣相欠奉,但份頂級牛扒實在大件,應該喺8安士嘅份量,只簡單伴薯條。要咗5乘熟,不過,出嚟嘅效果應該過咗少少,肉內半點血水都無,但仍帶粉嫩,入口亦非常軟腍,相信都只喺過咗少少;此外,件扒經過熟成,肉味真喺好強,加上面頭燒得焦香,確實件扒整得有水準。
bowl龍蝦香辣鮮茄新鮮天使幼麵
又喺無乜花巧嘅賣相,不過,望住開邊嘅波士頓龍蝦(半隻),咁有睇頭,賣相都只喺其次。龍蝦裡面有好多膏,肉質亦幾爽口;天使麵以新鮮蕃茄煮製,好鮮活,又帶點辣。不過,天使幼麵就無啦啦轉咗意粉,意粉咬口不俗,但服務上就有啲唔妥當,因為真喺可能有啲客食天使麵OK,但就唔鍾意食意粉,為免有咩爭吵都喺事先說明多啲!
本來仲有甜品要上,我哋連農夫包都只喺食咗一個,已感覺頗飽,所以,兩件蛋糕甜品就打包拎走,飲埋杯餐飲就結帳。

bowl熱檸水.熱咖啡
老婆嘅餐飲就例牌熱檸水,小弟就要慣常嘅熱咖啡。檸水中嘅檸檬喺切角,感覺無咁好篤,但就附上一壺熱水,可以多沖一至兩杯;小弟杯咖啡幾醇香,所提供嘅牛奶都喺溫熱嘅。
甜品一共有4款選擇,包括:意大利芝士餅、紐約芝士餅伴雜莓、特濃朱古力餅配焦糖醬及自家製意大利雪糕。雪糕比較難帶走,結果就要咗紐約芝士餅同特濃朱古力餅,店方好細心,唔單止個別用個大膠盒盛載,而且,仲加番啲士多啤梨、藍莓嚟擺番好少少個賣相。

bowl紐約芝士餅伴雜莓
紐約芝士餅個外觀焗得唔錯,表面幾平滑,而芝士味挺香濃,底下消化餅底厚薄啱啱好,啲雜莓醬又做得幾新鮮酸甜。
bowl特濃朱古力餅配焦糖醬
「特濃」加「焦糖」勁啱口味,朱古力餅質感挺實,朱古力味好豐厚濃郁,不失特濃之名,配以焦糖醬,濃香更上一層樓,當然,唔嗜甜就咪揀佢啦。
今餐真喺滿足,雖然食個晏二百幾蚊一位對我哋嚟講有啲貴,不過,偶一為之都可以啦,一生人做唔成董事,食個董事午餐善待自己都要嘅!

個人評分
味道:8/10
環境:8/10
服務:8/10
抵食:8/10
平均每人消費:HK$220

餐廳資料:
Fat Angelo's
荃灣荃華街3號悅來坊商場地下G3號舖
2409 8448

沒有留言:

發佈留言