2014年4月2日星期三

Crostini Bakery & Cafe:好友狂嚐曲(十六)

曾經晌觀塘打過幾年工,都有留下少少搵食足跡,不過,都已經喺十多年前嘅事。離開咗之後,觀塘區就不斷變天,轉變非常之快,平日,已甚少踏足此區。今次能晌度留低一次搵食腳印,多得食友送贈,購自Crostini Bakery & Café嘅曲奇。
上番官網睇睇,估唔到一連3間店舖都開晌觀塘區,算喺一般營銷策略上嘅異數,可能店主貪其方便易於巡鋪啩。寶藍色紙袋盛載嘅喺伯爵茶杏仁曲奇(Earl Grey Tea & Almond Cookies),紙袋設計精簡,而拎起嚟非常墜手,足有220g重,食用期近一個月。
內裡以透明透袋包裝,無咩封口拉條,加上成份未見有列明任何防腐劑,所以,開封後最好盡快食用。而每件曲奇大概一蚊銀大細,數一數,啱啱好有80塊,絕無吹水,睇唔出有成咁多喎。
雖然無伯爵茶,但沖杯紅茶,食啲曲奇,晌工作中偷吓閒,確喺可以減減壓。由於曲奇較為細塊,可以一口一件,曲奇入口好鬆脆,見佢好多伯爵茶葉碎,但茶味唔算好濃,感覺幽香,而內裡又混有杏仁粒,口感脆脆,牛油又唔太重,整體而言幾好食,真喺好易一件接一件,眨吓眼一個人都食咗半包喎。
食友仲夾埋店方嘅蛋糕小單張,有個裝,亦有件裝,款款獨特,賣相又似模似樣,異常吸引。最可惜店舖都開晌觀塘,就算從官網所知,最新分店晌九龍灣德福插旗,仍然喺少去嘅東九,期望有朝一日會晌油尖旺或西九見到佢。
再次多謝食友心意,讓小弟嘅「好友狂嚐曲」得以延續!

個人評分
味道:8/10
環境:- /10
服務:- /10
抵食:- /10
平均每人消費:HK$0(禮物)

餐廳資料:
Crostini Bakery & Cafe
觀塘成業街7號寧晉中心地下53A舖
2392 7968

沒有留言:

發佈留言