agnès b. CAFÉ L.P.G.：輕生何解？

自己一向都較少刻意去某一間餐間搵食，事事隨遇而安啦，就好似今次咁，有食友叫到，就嚟到IFC嘅agnès b.CAFÉ L.P.G.嘆杯咖啡食件餅，閒聊一下寫食評嘅心得。講真，所謂「殿堂」食家，虛銜啫，達到指定要求就升級架啦，況且，小弟當寫食評喺種興趣，只喺想跟別人分享一啲飲食上嘅經歷，所以，講唔上咩心得啦，哈哈！

其實，依間分店喺一門三傑，順路往前行喺一連3個舖位作唔同嘅店舖：agnès b. CAFÉ L.P.G.、agnès b. DÉLICES、agnès b. le pain grillé，簡單嚟分，第1間喺主打賣咖啡、蛋糕、輕食；第2間喺專賣朱古力產品；而第3間喺提供法式餐點，如前菜、全日早餐、主菜……等等。今次嘆啡食餅當然喺幫襯CAFÉ L.P.G.啦，而鋪面對出嘅走廊就喺用餐位置。要不是傍邊挨住商場內嘅玻璃圍欄，碎花地磚，雲石枱配木椅，倒有幾分法國街頭小茶座。 

雖然時近傍晚，凍櫃內嘅法式蛋糕仍有好多選擇，而且，客人數目亦唔多，歸根究底，依間店個位置有少少避，IFC本身人流已經唔算多（返放工除外），仲要間店晌3/F，二樓已覺得少人行，更何況三樓。 

danielle $38 

之後晌另一篇agnès b.嘅食評都已經講過，佢哋啲蛋糕每件都有自己個名，所指嘅「名」唔喺話芒果慕絲，藍莓芝士、焦糖軟心……等等，而真喺有個名字俾佢，例如：Amelie、Carla、Marthe、Paris、Vanille……，仲要個個都喺女生名字，也許女生特別愛甜。先試嘅喺danielle，名牌介紹時成份分別有：French cream liqueur、chocolate、chocolate sponge cake、feuilletine。

由上而下，一層隔一層，清晰可見。最面層喺一朕薄薄咖啡甜酒漿，跟住兩層黃色喺柔滑非常嘅百利甜酒慕絲，再夾在中間喺鬆軟嘅朱古力海綿蛋糕，底下以朱古力脆片做成酥脆嘅餅底。「danielle小姐」有別一向法式蛋糕嘅重甜，算喺恰到好處。

chloé $38 

半球形嘅chloé嬌小輕巧，唔切開你都唔知佢喺點，不過，名牌所標示嘅成份：hazelnut、chocolate、feuilletine、sponge cake，已多少露出端倪。

表面裝飾所做嘅朱古力水線及榛子果仁，唔算好特別，不過，榛子仁鬆脆喺一個事實。垂直往中間切開，同樣一層疊一層，榛子慕絲內混入榛子碎，濃香可口，加埋海綿蛋糕、朱古力脆片餅底，既軟綿，又鬆脆，口感不俗。 

榛子鮮奶咖啡 $40 

鮮奶咖啡始終喺個人最心水，加入榛子糖漿，令咖啡中滲出榛子香味，雖然無咩拉花、畫圖，但味道要緊嘛，奶泡跟咖啡比例恰好，味道醇香口感柔順，對小弟而言，夠晒滿意啦。朋友都喺飲咖啡，不過，無影相就唔多講喇。

閒談中都分享到人生，小弟做人「符符碌碌」，對人生無太多要求，凡事隨遇而安，一早起身無病無痛，就要感恩啦！隨時行得走得，你估真喺必然架咩！人生要怨嘅嘢可以大把，輕生何解？咪就喺過一個輕鬆人生，樣樣計住計住，又點輕鬆到呢？所以，我成日都覺得自己喺擁有半杯水嘅人，而唔喺無咗半杯水囉！

個人評分

味道：8/10
環境：7/10
服務：7/10
抵食：8/10
平均每人消費：HK$78

餐廳資料：
agnès b. CAFÉ L.P.G.
中環港景街1號國際金融中心商場二期3樓3093舖
2805 0723