2014年3月25日星期二

阿麥廚房 Mackie Kitchen:麥麥耕耘

年輕人總有好多夢,能為自己嘅夢而努力,實在值得尊重;若然夢想成真,更喺可喜可賀,不過,到咗小弟依個年紀,「夢」發過就算,「想」只喺要安安穩穩咁生活就可以了。今晚,掹食友車邊嚟到「阿麥廚房」試菜,唔單店主年輕,幾位掌廚人更喺後生得緊要,感受到佢哋為自己嘅夢默默耕耘,想返起以前有個廣告標語:「只要有夢想,凡事可成真。」
從門面已睇得出阿麥走歐陸小店路線,木系門面,再晌地上擺放少少盆栽及雜誌架,襯上白紗窗簾。透過偌大嘅玻璃窗,可窺探當中嘅悠閒氣息。內裡裝修簡約,數盞吊燈及壁燈,加上枱上嘅蠟燭燈,營造柔和嘅用餐氣氛。此外,牆上掛咗一幅幅外地景點大相,以及店主旅行時嘅景點照,帶嚟多點寫意嘅感覺! 
除散叫以外,晚市套餐較為划算,4道菜晚餐包括前菜、餐湯、主菜及甜品,附送啡茶,定價都喺$143 - $238 +10%,而前菜同餐湯可加錢升級,平貴任擇,部份主菜亦不乏特色。由於是晚試菜菜式一早安排好,少了半點操心。
bowl香煎帶子配柚子沙律伴柑橘汁醋汁 $88
Pen - Fried Scallops with Grapefruit Salad with Citrus vinaigrette sauce
第一道上場喺一道好清新嘅沙律頭盆,沙律菜入口爽脆,帶微酸嘅柑橘醋汁,酸香細緻,加埋微微酸澀多汁嘅柚子肉,叫人份外醒神;而中間嘅香煎帶子,厚肉甘香,墊上薄薄嘅蘿蔔仔薄片,配上海膽及黑魚籽,頓時鹹鮮富層次,實在很有心思嘅組合。
bowl酥皮焗蟹盒 $98
Crab Meat au Gratin
外層嘅「飛佬皮」(filo pastry,有叫做「紙酥皮」)脆得交關,咔嚓作響,內裡有好多蟹肉,軟綿富口感,味道又香濃。店主介紹時,話不單拆新鮮蟹肉,而且加埋蟹膏、忌廉、洋蔥嚟整,再晌表面糝上少少芝士,真喺唔單真材實料,仲心機處處,亦喺小弟今晚最欣賞嘅菜式,絕對值得捱介。
bowl黒松露野菌忌廉湯 $48
Cream of Black Truffle
忌廉湯本身質感都滑身,但因為實在勁多野菌碎粒,帶點粗粒感,及有少少飽肚感;再加入埋黒松露醬,菌香濃郁突出,香味四溢。
bowl焗波士頓龍蝦配扁意粉伴海鮮汁 $178
Linguini with Seafood sauce and Baked Boston Lobster
一客扁意粉有半隻開邊波士頓龍蝦,以烤焗形式處理,無咩太多調味,務求食出龍蝦鮮甜原味,細心位喺連個蝦鉗都拆咗殼,咁就成隻龍蝦都食得方便俐落,再者蝦肉本質爽彈,實在味美。而扁意粉煮得有啲未透嘅感覺,少少硬心,兼且鹹咗少少,但個海鮮汁底就非常濃鮮。
bowl黑松露麵包蟹意大利飯 $168
Edible Crab Risotto with Black Truffle
依個麵包蟹意大利飯,有種似曾相識嘅感覺,同樣晌銅鑼灣一間樓上餐廳品嚐過,細問之下,原來主廚曾晌該餐廳工作過,所以,再次將此招牌菜帶到嚟阿麥當中,而且定價仲要平近3乘(以散叫價計)。最好都喺兩三個朋友分享,因為意大利飯內充滿鮮拆蟹肉、蟹膏同菌粒,加埋芝士、黑松露醬,雖然飯粒煙韌,味道幽香,始終一個人食會覺得有啲滯膩之感。
試過幾道前菜、主菜之後,又去到餐飯嘅尾聲,店主為我哋預備好兩款甜品:雪葩及芭菲。

bowl柑味雪葩 $48
Mandarin Sorba
雪葩分為檸檬及柑味,可惜前者賣晒,只好試試柑味雪葩如何?冰鎮嘅柑味雪葩,半個柑皮包住滿滿雪葩,冰涼清爽,柑味頗出,酸香中甜味較重,但不失為一份平衡番先前兩道味濃主菜嘅調和劑。
bowl焦糖芭菲 $48
Camerel Parfait
芭菲類甜品屬小弟較少接觸嘅甜品類別,以忌廉、牛奶、芝士做成嘅原味芭菲,奶香味好濃重,而質感卻好輕柔,入口即化。配合埋焦糖脆脆及脆果仁,跟芭菲形成強烈嘅對比,幾有趣嘅甜品。
如果嫌一般啡茶太普通,店主晌飲品方面都下咗啲苦工,例如有:特色咖啡、川寧茶、果味冰茶、特色牛奶、四季保健飲品……等等。
bowl熱情果乳酪 $38
小弟向來喜歡試新嘢,所以揀嚟一杯特飲「Yogurt Drink」,有士多啤梨、熱情果及紅桑莓(覆盆子)3款味道。眼前依杯「熱情果乳酪」,比想像中少酸,反而入口清香,冰涼,好啱夏天享用。
廚師晌廚房裡默默煮,我哋就密密食,因為今餐店主為我哋所預備嘅實在太多、太豐富,再次多謝款待,令各人食得心滿意足。

個人評分
味道:8/10
環境:8/10
服務:8/10
抵食:8/10
平均每人消費:HK$0(試食邀請)

餐廳資料:
阿麥廚房 Mackie Kitchen
銅鑼灣加路連山道9號地舖
2808 0351

沒有留言:

發佈留言