整間餐廳分開幾部份用餐區，包括圍繞正中央開放式廚房嘅吧位，邊食邊欣賞廚師嘅手勢，最適合點「廚師發辦」（Omakase）時跟廚師交流；此外，開放式廚房對開喺一排靠窗嘅4人或6人枱，亦都舒適開揚，而餐廳另一邊尾，亦有多張4人枱，騷擾度會仲少啲；如果想私隱度高啲，半開放嘅個室，甚至榻榻米個室就最啱嘞。由於大部份裝潢均以木材建構為主，配以適切嘅燈光，加上環境寛敞，而且，晌度食飯都喺斯文客居多，所以，讓人感到份外幽靜舒適！
中央開放式廚房吧位
開放式廚房對開4人或6人枱散座
半開放個室
榻榻米個室
前菜三點 $70喺為每個光顧嘅客人所作嘅「開場白」，3款餐前小吃做得小巧的骰，更喺不定期轉款，可謂次次有驚喜。由左至右分別喺豚肉露筍卷配青瓜、脆米炸蝦、蝦膠鵪鶉蛋。露筍咬落仲喺好清爽，令到啲豚肉一啲都唔膩；炸蝦本身無問題，不過作為一道小冷盤，攤凍嘅脆米一啲都唔脆卜卜，有種韌勁，唔多好食；而蝦膠包住鵪鶉蛋，有啲心思喎，入口蝦膠爽彈，鵪鶉蛋又粉甜，我都幾鍾意。
雖話餐廳主打沖繩料理，其實翻翻餐牌，不難發現選擇不少，包括刺身、壽司 / 卷物、前菜 / 沙律、湯、煮物、燒物、揚物、飯麵、清湯火鍋、日式壽喜火鍋、甜品。當然沖繩料理所佔嘅比重一定唔少啦，足有兩大版共十多款菜式，而且，以上類別亦有部份菜式加入沖繩食材元素，如沖繩苦瓜、沖繩AGU豬、沖繩本部和牛、沖繩冰葉……等等，所以，沖繩菜式又豈止十多款呢！此外，沖繩黑毛和牛亦喺近年來重點推廣之一。
兩大版沖繩料理
沖繩黑毛和牛推廣
菠蘿牛油果軟殻蟹沙律 $130
唔使多講，實推介嘅沙律，因為菠蘿、牛油果、軟殻蟹都喺心水喜愛嘅食材，況且，用料不賴嘅話，好難會做得差。菠蘿用上新鮮貨，牛油果又夠熟，加埋軟殻蟹、青瓜絲，輕怡嘅沙律醬，體現簡單就是美！
壽司（左口、赤身、油甘魚腩） $150
雖然唔喺以賣壽司為主，但壽司出品一樣有水準。飯粒鬆軟而捏得實淨，唔會一夾就散開，而且，無論壽司飯，抑或魚生，呎吋、厚度剛好，一啖一件；再者，壽司飯及魚生之間，已加咗日式芥末，輕輕蘸點醬油就可以喇。3款魚生都鮮味無窮，特別鍾意油甘魚腩，肥美豐腴，正！
廚師推介刺身五點 $1,100（時價）
刺身類別，除咗散點，仲有特選五點、七點、九點刺身拼盤，即喺包含5、7、9款嘅刺身拼盤，如果唔介要再貴一啲，嚟一份「廚師推介刺身五點」又如何？晌吧位前有塊小黑板，寫住當日推介時令靚魚，是晚就有左口魚、金目鯛、深海池魚、牡丹蝦。
我哋份刺身拼盤一上枱，賣相就叫人睇得悅目，廚師所推介嘅五點刺身，由12點位順時針數，就喺拖羅、金目鯛、牡丹蝦、北寄貝及深海池魚，中心位仲有啲日本海帶，各款刺身色澤亮麗，可謂閃耀登場。說實話，食刺身唔算喺小弟嘅專長，但入口刺身嘅新鮮度毋庸置疑，而且，當中粉嫩嘅拖羅質感細緻，大大件嘅牡丹蝦清甜鮮爽，味道獨特嘅深海池魚脂肪平均，確喺水準上乘，等價交換就喺要奉上千兩。
沖繩美之島珍味石燒 $380
石板都不特止，加埋火熱嘅卵石，果真熱力逼人，而且整道菜都好重下，真喺佩服位男侍應可以單手提起放下。石板有豬手、雞腎、維也納腸，，再配上濃厚嘅醬汁，加埋少少配菜：薯角、露筍、蕃茄、南瓜，樣樣都好啱食。豬手膠質非常之重，肉質好腍好香；雞腎無想像中咁韌，又帶輕輕辣香，又幾好食喎；而維也納腸腸衣煙韌有彈力，亦唔會一口肥肉，真喺唔錯。
炸冰葉海膽天婦羅 $120
是晚最驚喜嘅菜式，印象中沖繩冰葉都喺好似第一次接觸，冰葉沾上薄薄一層的炸漿，入口好脆，一啲都唔油，火喉控制恰到好處，而冰葉仍然濕潤，又帶點草香味，夾晌中間嘅海膽，份量多，又甘甜，輕沾點海鹽，味道更一流，值得推介！
苦瓜茶漬飯 $70
多款重口味嘅料理之後，一道「苦瓜茶漬飯」可講得喺「苦盡甘來」。以沖繩特產苦瓜茶嚟泡茶，加入飯糰，再配以超薄嘅炸沖繩苦瓜片，帶人走入淡雅甘香嘅回憶。沖繩苦瓜特色之一，就喺苦味低，甘味重，苦瓜茶入口甘香，飯糰浸透苦瓜茶之後，令飯粒食落有種回甘嘅滋味，而炸苦瓜片香脆非常，為茶漬飯收畫龍點晴之效。
甜品 $55
店方甜品選擇唔多，只有抹茶布甸（$45）及沖繩特色雪糕拌黑糖年輪蛋糕（$55）。由於小弟有少少抱恙，太冰冷嘢不宜入口，所以眼前嘅黑糖、紅芋、鹽味曲奇雪糕都無福消受。幸好，小弟之前晌同集團嘅其他餐廳，都已經試過依幾款雪糕，個人推介始終都喺黑糖，因為味道突出，甜味原始唔做作；其次紅芋（即喺紅蕃薯）亦不俗，有蕃薯嘅粉甜，味道實在。
一邊食住日本料理，一邊跟朋友談談旅行軼事，想著，幾時會親訪沖繩？一看這日本南部小島之美！
個人評分
味道：9/10
環境：9/10
服務：8/10
抵食：7/10
平均每人消費：HK$0（試食邀請）
味道：9/10
環境：9/10
服務：8/10
抵食：7/10
平均每人消費：HK$0（試食邀請）
餐廳資料：
Okinawa Dining BRIDGES
銅鑼灣開平道1號Cubus 6樓
3428 2131
Okinawa Dining BRIDGES
銅鑼灣開平道1號Cubus 6樓
3428 2131
沒有留言:
發佈留言