2014年2月12日星期三

Joey's:好友狂嚐曲(十四)

隔咗幾個月,又喺時候延續吓小弟嘅「好友狂嚐曲」曲奇食評系列,當然,先多謝食友們嘅寵愛,久唔久送上曲奇零食慰勞小弟,仲要次次都出自唔同品牌或餅店,讓小弟見識各家長短,多謝多謝!今次收到喺Joey's嘅出品。
淡黃色手抽紙袋內,喺一包150g嘅雜錦曲奇,透明包裝,最鍾意喺包裝袋嘅密封拉鍊,唔使一次過清晒佢,食用期限一個月左右。
帶咗返公司,本來打算跟同事分享,但最後「縮骨」自己一個人分兩日下午茶食晒,因為,一包有成14款唔同口味,部份味道仲多於一粒,好想試晒全部,唯有獨食!
以下對逐款曲奇寫低食後感,唔好以為小弟咁叻,識晒啲曲奇名字,只喺食友細心,送上曲奇同時,更附上一張曲奇單張,印有26款曲奇嘅名字、外觀,以及成份,我就可以簡單啲按圖索驥。
bowlDark Brownie Cookie
唔止加咗朱古力粉,仲加埋朱古力,唔怪之得朱古力味咁濃郁,但又唔覺甜,有朕甘苦味,鬆脆好食。
bowlSunshine Lemon
肥膩嘅牛油又搭上檸檬,完全唔同晒,牛油曲奇中滲出鮮檸清香,最有心思喺混入檸檬條,煙韌而更有檸檬香味!
bowlEngland Earl Grey 
伯爵茶應該屬於幾經典嘅茶味曲奇,茶味芳香淡雅,輕柔滲出,喺細膩品嚐嘅作品。
bowlStrawberry Kiss
跟Sunshine Lemon同屬一類型曲奇,不過,始終檸檬味較為突出,所以,相比之下,Strawberry Kiss會令人感覺普通咗。
bowlMocha Cashews
又有朱古力嘅香濃,又隱約有咖啡芳香,好味更在於香脆嘅腰果,有味道,有口感,正呀!
bowlDouble Happiness
何來「雙囍」?因為加入咗夏威夷果仁同開心果仁,鬆脆可口,口感豐富。
bowlMacadamia Nuts with Black Sugar
雖然只有夏威夷果仁,但改用黑糖嚟做曲奇,甜味沉實醇香。
bowlJapanese Matcha Cookie
一身翠綠色影晌成碟曲奇裡面最搶眼,簡單加上抹茶粉製作,抹茶味香,悠然回甘。
bowlOatmeal & Raisin
樣衰巖巉絕對喺佢嘅標記,但燕麥片配提子乾,煙韌咬口,輕甜鬆化,相信喺有營之選。
bowlWalnut Butter
同Double Happiness差唔多,以牛油曲奇為本,夾雜脆口嘅合桃碎,而合桃唔會碎濕濕,可惜份量唔多。
bowlMixed Berries Snowall
有別其他曲奇嘅鬆脆,依個雪球入口帶點柔韌,內裡大致混入藍莓及紅莓乾,煙煙韌韌。
bowlChocolate Chips Rocky
依件「洛奇」無一身黝黑身形,因為曲奇只喺牛油黑糖味,內加朱古力碎粒,不過,碎粒好少,唔突出。
bowlOlive Ring
唔睇張單張都唔知,全部曲奇唯一一款非牛油曲奇,以橄欖油代替,仲要用蛋白加全麥粉,食落得確無咁香,不過,想食得健康喺有少少犧牲吓嘅。
bowlGuihua Oolong
方形嚟自英倫嘅伯爵茶味都唔錯,而球形嚟自中國嘅桂花烏龍又點睇?桂花及烏龍都唔算突出,味道嚟得較為清淡,一試無妨。
從其他食評所見,Joey’s仲有其他產品,有機會要試吓佢啲蛋糕先得!

個人評分
味道:8/10
環境:- /10
服務:- /10
抵食:- /10
平均每人消費:HK$0(禮物)

餐廳資料:
Joey's
西灣河西灣河街100-104號地下A1號舖
2949 9999

沒有留言:

發佈留言