2014年1月10日星期五

喜來稀肉 Seorae:起來嬉肉

繼早前去咗辛安東奶奶雞試韓國菜,相隔無耐,又有幸嚟到新開業嘅喜來稀肉試韓燒,跟豬牛肉嬉戲,晌這個寒冬一韓再韓。喜來稀肉位處金巴利道篤尾,地下鋪面只喺餐廳入口及用作等位之用,真正用餐區要上二樓先見,一條金巴利道已有10間韓國餐廳,再加埋對下一截短短嘅金巴利街又開咗近10間韓國食店,所以搵韓食,過嚟金巴利道、金巴利街,無出共右!
一踏入門口,就見到佢個大名及其發展史,真喺有眼不識泰山,原來依間過江龍晌2008年開業,1年間2009年已火速開設咗100間店,3年後仲突破到200間店,今時今日晌韓國本土已有230多間分店,2013年尾卒之落戶香港,咁我哋唔使老遠跑過韓國幫襯啦!
雖然鋪面細細,但上到2/F又好唔同晒,全層樓可容納近百人。石屎牆身、水泥地下,基本上可以睇為無裝修,但有種年輕、不拘小節嘅感覺。圍爐圓枱,4人方枱,悉隨專便,較特別喺對正樓梯嘅磚牆「個室」,6人長枱,私隱度多點;但最深印象喺枱與枱之間甚闊落,晌依家香港鋪租飛升嘅年代,何止吋金呎土,但仍肯安排枱櫈寬敞多啲,實屬難得。食烤肉,客人最擔心喺抽風問題,如果做得唔好,食完烤肉會搞到一身肉味,而店方晌每張枱上都架設獨立可伸縮抽風爐,加上對街一邊窗戶全開,所以,今晚唔覺煙霧彌漫,不過,到夏天先可能喺對個抽風系統嘅考驗。
此外,所有座櫈都可以打開櫈面,將孭袋、背囊放晒入去,方便實用。但喺,由於全部座位都無挨背,所以,可能有啲人會覺得無咁舒服。如想有得挨吓,磚牆個室會喺個合適選擇。
打開餐牌,分為豬肉類、牛肉類及一品菜,雖然頁尾印有酒類餐牌,但因為未有酒牌,所以無法供應,而且非酒精類飲品選擇少,故暫時容許客人自攜飲品。除中英韓文對照之外,兼且圖文並茂,最有趣喺豬肉類、牛肉類有埋個「解剖」公仔,等你知吓個部位晌邊度。
「喜來稀肉」(서래갈매기)第一次聽個店名覺得好古怪,其實個店名何解?最近,上去佢個網頁八吓(www.seoraester.co.kr),原來晌首爾瑞草區盤浦洞有個因法國人聚居嘅Seorae村而成為東西方文化交融嘅地方,而店方為對Seorae嘅思念及舊日情懷,開拓咗此品牌,取名韓文「서래」(音譯),中文「喜來」,而因為店方主打亮點喺護心肉(갈매기),一般成年豬只有200-300克護心肉,算喺稀少,所以中文就意譯為「稀肉」,實質就直指護心肉的意思!
bowl牛肉蘿蔔湯
題外話似乎講多咗,喺時候講講嘢食吧!傳統韓食特色,就喺一起手嚟三小碟、六小碟嘅前菜,而今次晌喜來,一嚟就喺三大碟:大豆芽生菜、韓式泡菜及生洋蔥絲,另外再加多「一碗」牛肉蘿蔔湯。無錯,喺一碗!當以為先嚟一碗,跟住仲有,隔咗好耐都唔見,細問之下原喺真喺全枱既得一碗,又無添飲服務,好彩無一個人飲晒。「青靚白淨」嘅蘿蔔湯估唔到佢都帶點陣陣辛辣,蘿蔔切得薄透,飲落幾清甜,不過肉香欠奉。
bowl大豆芽生菜
簡單嘅涼伴,口感清爽有點微辣,作為前菜食又得,作為烤肉之間嘅間場食都得,可有助清清味蕾。
bowl韓式泡菜
一睇就知喺常見嘅韓式泡菜,大白菜好爽脆,辣度強勁辛香,真喺醒腦醒神,雖然有得無限添加,但一碟試試已夠晒皮喇。
bowl生洋蔥絲
無限添加嘅大豆芽生菜同韓式泡菜兩者就明顯可以作為前菜,而生洋蔥絲唔怕辛辣可以就咁齋食,否則放晌鐵板燒一燒再夾埋啲肉一齊食,都喺好嘅配搭。輕燒過嘅洋蔥絲特別香,配合烤肉,以生菜包裹寧捨唔同。
準備入到今餐正題,就喺韓式烤肉。甫坐低,侍應已準備為你開爐起火,晌特製嘅烤板上,外圍喺3條凹槽,一條用嚟烤蒜粒,另外兩條則用作烤蛋漿。蒜粒同蛋漿喺侍應自動為每枱客人添加,前者唔使多講,都喺作為食烤肉嘅配料,而後者喺透過爐嘅溫火慢慢烘熟,一般而言,當烤肉食完,啲蛋漿亦應該熟透,可以食得,其實大可不時撩一撩啲蛋漿睇吓咩情況,最好食都喺半生熟,底部熟透容易起上嚟,上層仍帶有蛋漿液就最正。再者,第一輪蛋漿一邊喺「原味」蛋味濃,另一邊喺加有泡菜碎嘅「辛辣味」夠惹味,兩者都各有韻味,由於蛋漿可以多添一次,所以我哋就索性加埋食剩嘅泡菜同生洋蔥絲,一樣好食有特色!
食烤肉,除咗食原味之外,蘸佐料亦有助提升肉香,店家就會每日提供一套3款嘅佐料:韓式甜辣醬、豆辦醬、欖油海鹽,人人口味不同,隨個人喜好沾咩都無所謂。小弟認為,如有啲檸檬醋或酸汁之類就更好,既可解膩,又可提味,或者咁樣可能唔正宗,如果效果好又何妨一試喎!
3大類食物中,豬肉類揀咗招牌嘅護心肉同五花肉,牛肉類則睇中特級牛頸及真雪花牛肉,而一品菜則選上魚籽石頭窩拌飯及蔥餅,下面就等小弟跟大家逐一分享。

bowl護心肉 $150 / 200g
咩叫「護心肉」,按店方餐牌介紹喺豬橫隔膜同肝之間嘅一組肌肉肉筋,不過,一般成年豬究竟只有200-300克定400-500克護心肉呢?因為主餐牌內嘅簡介寫喺200-300克,而擺筷子羹嘅餐墊紙卻寫著400-500克,無論邊個數值正確,總之護心肉都喺屬於較罕有部份。
 一般成年豬究竟只有200-300克定400-500克護心肉呢?
因為喺一組肉筋,所以形狀比較細小,半隻至一隻成人手指長左右,無乜脂肪,但黐住少少筋膜,燒過後入口肉質柔韌有彈性。
bowl喜來五花肉配特製醬汁 $120 / 150g
一客150克嘅五花肉有4大片,睇落就一半膏一半肉,肥瘦分明,厚薄均勻,色澤頗新鮮。由於肥膏不少,唔喺人人都啱,如果想試,可利用店方提供嘅鉸剪裁細佢,再夾埋生菜食,感覺肉質爽彈,富油香而不膩,如加埋洋蔥、蒜頭,效果唔錯。順帶一提,生菜籃可以添加一次。
bowl特級牛頸 $190 / 150g
牛頸一客有成13件,件件切得四四正正,油花細緻分佈平均,色澤紅潤。牛頸肉質腍滑,牛味出眾,加上油花平均,食落份外甘香。
bowl真雪花牛肉 $200 / 150g
雪花牛肉跟特級牛頸好相似,感覺只喺大細問題,同樣油花細膩,色澤紅潤。由於較為大件,我哋將佢放晌烤板正中間快辣兩面,再放晌爐邊燒好陣,務求做到封鎖肉汁而唔會燒過籠,雪花牛肉果然油香嫩滑,有少少細嚼靚扒嘅感覺。
bowl魚籽石頭窩拌飯 $88
賣相亮麗鮮艷,石頭窩飯之上,放滿飛魚籽、泡菜碎、生洋蔥碎、芝麻、紫菜碎,撈勻晒食先叫得做拌飯吖嘛。飯粒軟熟,配以不同口感及味道嘅配料,食味紛陳,有脆有軟,有辣有香;再者,窩底有少少飯焦,焦香煙韌,好有特色嘅一個拌飯,值得推介。
bowl蔥餅 $80
對比起個拌飯,蔥餅自不然有少少比下去嘅感覺。蔥餅以蛋漿煎成,內藏好多大蔥及蝦仁,蔥香突出,不過,略嫌「餅身」有啲糊,尤其底層煎得唔夠乾身,欠缺香脆。
是晚全場爆滿,實在人氣非常,而且身旁鄰枱都喺韓藉人士,韓文滿場飛,頗有置身韓國嘅感覺。

個人評分
味道:8/10
環境:8/10
服務:7/10
抵食:7/10
平均每人消費:HK$0(試食邀請)

餐廳資料:
喜來稀肉 Seorae
尖沙咀金巴利道79-81號金栢閣1樓連地下
27236692

沒有留言:

發佈留言