沙嗲王 Satay King：沙嗲王 x Soda Card博客試新菜

沙嗲王觀塘店仲喺晌未寫食評嘅年代幫襯過，而荃灣店亦都有幫襯，至於今次嚟試新菜式嘅銅鑼灣店就第一次到，一出𨋢門一片阿拉伯風情，唔講唔知，原來沙嗲王經營已有20多年歷史，滋味無國界，以菜式多元化、多國化見稱，中、西、越、泰、意、法、葡、日樣樣都有。

店內樓底高，地方闊落，天花掛有唔少別緻嘅吊燈，又有唔少卡位，二人、四人、六人枱，近窗一邊又有街景睇下。店舖整體裝修設計加插好多古時代文物，但又唔俗套，睇起嚟又幾年輕化。

今次嘅試食活動，喺因為沙嗲王剛啱加入咗Soda Card而搞，咁Soda Card又喺乜東東嚟？簡單而言，佢就喺將店舖傳統嘅會員制變成數碼化，當中參與商戶有零售，有食店，有消閒過百間，並建立一套個人化獎賞計劃，拋棄舊有以消費金額模式，改以次數計算，人人平等，務求商戶及消費者各取所需。就以今次沙嗲王為例，每打卡一次都有積分，獎賞包括免費甜品、飲品、薄餅、飯麵買一送一……等等，著數多多！

雖則沙嗲王滋味無國界，但依日晏晝要試嘅菜式亦已一早準備好，真喺多謝店方嘅細心安排。當中包括4道前菜，4道主菜，以及2道甜品，而飲品方便，餐廳亦大方讓我哋隨意挑選。

店內基本主餐牌

是日試菜餐牌

熱薑汁蜜 $27
由於身體有少少抱恙，唔敢飲凍嘢，所以目標鎖定晌熱飲堆中，如熱蜂蜜柚子茶、熱薑汁蜜、熱柑桔檸蜜……等等。最後揀咗熱薑汁蜜，因為依個配搭未試過，滋潤嘅蜜糖中滲出淡淡薑味，飲一啖很暖和身體，冬日暖身之選。

跟住4道前菜好快輪流登場，有沙律、蝦餅、薄餅及芝心餅，味道嚟自唔同地域，果然多元化。

魚籽薯仔沙律 $29
依款沙律喺新登場出品，以羅馬生菜、火箭菜及水耕菜苗墊底，鋪上薯仔沙律，加入魚籽、溏心蛋點綴，賣相幾清新閃亮。沙律菜新鮮爽脆，薯仔沙律跟魚籽撈勻食，粉甜嘅薯仔多點鹹鮮之餘，有啲卜卜脆口感，而溏心蛋做得不俗，「流心」效果一流。整道沙律味道清新開胃，都只喺賣$29，確喺抵食。

自家製越式蝦餅 $58

一客6件越式蝦餅，配以泰式酸辣醬。蝦餅質感彈牙，滲出淡淡蝦鮮味，偶有食到少少蝦肉，不愧真材實料。不過，個人覺得炸得未夠香透，再炸耐少少，不單色澤更金黃，味道更香口，此外，入口較油膩亦喺要改善嘅地方。

娘惹牛肉Pizza 

屬於將推出嘅新出品，故未有定價，不過，以現有售賣嘅4款薄餅而言（$30-$35），應該都喺三、四十蚊範圍。沙嗲王嘅薄餅特色喺「６吋酥皮薄餅」，雖然喺厚批，但口感超鬆脆，配以微辣惹味嘅娘惹牛肉，烘得軟綿絲溶嘅芝士，依個意大利、馬來西亞混合菜式大可帶俾你意外驚喜。

北海道芝心餅配韓國酸辣椒

依個亦喺另一道新出品，不過，與其話喺新出品，可能叫作強化版更貼切，因為餐牌內己有北海道芝心餅，餅面加有韓國紫菜碎及芝麻，定價$22 / 件，兩件起，而依家就改襯韓國酸辣椒嚟代替紫菜碎。其實原有嘅北海道芝心餅已經好好食，外層香脆，入口煙糯，而內裡北海道牛乳芝士既滿滿又滑溜，流心效果明顯，又有淡淡牛乳香，搭埋紫菜碎、芝麻粒，真喺一流。至於改以韓國酸辣椒又如何？味道帶少少酸，亦無想像中咁辣，有食友笑言似榨菜，確實口感有啲爽脆，喜歡試新嘢嘅朋友不妨一試。

幾款前菜、小食嘅味道及特色兼備，再趁空翻翻店方嘅餐牌，原來佢哋已經開始選用大量無污染及有機食材，例如蔬菜統營處嘅水耕菜苗，有機米，但難得定價都仲喺頗親民。

其實4款前菜份量不少，尤其薄餅及芝心餅，不過，跟住落嚟嘅4款主菜，有米線、拉麵、焗飯、炒飯，亦都喺份量十足嘅菜式，可謂挑戰緊我哋嘅食量。哈哈，若非小弟今日狀態不足，理應可以幫大家包底。

冬蔭功札肉鮮蝦米線配日本溏心蛋 $52
雖然唔喺咩新出品，但亦喺餐牌內嘅廚師推介菜式。雲南米線一向喺港人熱愛，依碗以冬蔭功作為湯底嘅米線，唔比泰菜館嘅冬蔭功差，一樣集酸、辣、鮮於一身，呷一口，濃郁而富層次。而配料有札肉、鮮蝦、溏心蛋、蕃茄、銀芽，幾樣都用料不賴，好似札肉咁夠挺實，鮮蝦又大隻又爽彈，溏心蛋如上文沙律所講，甚具水準。再者，米線食落滑溜有彈性，令人唔會忽略依個大配角，襯埋啲冬蔭功湯入口，淡味嘅米線都變得唔同晒！

溏心蛋．溫泉蛋 $8

講起「溏心蛋」，就唔可以唔提埋佢嘅堂兄弟「溫泉蛋」，晌餐牌中亦都有介紹，仲叫佢哋喺粉麵飯嘅最佳拍檔，可以當小食咁獨立散叫。不過，店方有貼心嘅建議，就喺溏心蛋最合適配搭湯粉類，而溫泉蛋則配搭飯類或意粉為佳。

沙嗲安格斯肥牛拉麵配日本溏心蛋 $59

另一款廚師推介菜式，就喺依個拉麵，以香濃惹味嘅沙嗲湯底，配安格斯肥牛片，襯日式拉麵，再加多半隻溏心蛋。因為沙嗲湯做得濃稠，拉麵一掛而上，令拉麵份外好食，況且，拉麵本身質素不俗；而安格斯肥牛片柔軟唔嚡，沾上沙嗲寧捨惹味。

自選麵 $49

如果唔喜歡指定嘅米線，又有個「自選麵」嘅多元組合，晌4款湯底中（沙嗲、咖喱、冬蔭功、清湯）任擇一款，再晌9款配料如勁脆厚切豬扒、薄切荷蘭豚肉、日式奇脆雞……等等（溫馨提示一下，配料勁脆厚切豬扒及美國安格斯肥牛要額外加錢，前者多收$5，後者再補$10）隨心揀一樣，然後選擇喜愛麵條（4款選擇：拉麵、米線、檬粉、粉絲），就成自家麵食，更可加配日本溏心蛋，仲彈性到揀半隻$4或全隻$8都得。

鮮茄芝士焗厚切豬扒飯 $63

焗飯採用有機米，自然食得更安心，眼前個焗豬扒飯實在大堆頭，鮮茄醬汁做得茄味酸香鮮活，配合濃香嘅芝士，小弟覺得喺焗豬飯嘅神韻。豬扒果然厚切，兼且大件，肉質鬆化，認真唔錯；而底下嘅炒飯底未及飯粒好分明，但個人認為又唔喺太差，果真各人口味不同，所以，食味分享只作參考，哈哈。

泡菜安格斯肥牛炒飯

將推出嘅新出品，同樣未有定價，根據其他現有炒飯嘅定價，加埋用上安格斯肥牛，大概六十蚊左右吧！依個炒飯似乎幾得大家歡心，因為飯粒炒得分明、油潤又乾身，味道帶點辛辣，個性突出；而肥牛粒軟腍有肉味，飯面嘅一撮泡菜，脆口辛香，喜愛泡菜嘅人應該對此炒飯甚欣賞。

意大利即磨咖啡 $23

去到甜品時段，還是點多一杯即磨咖啡，方能更好慢慢享受甜品嘅滋味。雖然只喺賣$23一杯，但咖啡質素唔馬虎，醇香馥郁。

Platinum 芝士蛋糕 $30

$30一件芝士餅其實幾抵食，賣相無乜添太多花巧，只有少少點綴。蛋糕口感柔滑，芝士味唔太濃，較為清淡，不過略嫌個消化餅餅底稍為厚實。

雪糕蘋果批 $25

相比之下，小弟就極為欣賞依份蘋果批，一來用酥皮做成嘅批底，又香又脆；二來蘋果醬煮得香甜細緻；再者，所加嘅一片烘蘋果片，薄脆又富玉桂香味，三者配合得宜，非常好食。所以，球雲呢拿雪糕也只喺成為「大茄」一角。

再次多謝沙嗲王嘅安排，讓小弟重溫佢哋嘅美食之餘，也率先試咗數款新菜；此外，亦多謝Soda，讓我多了解它們的系統，從而將來搵食就唔會錯過更多「著數」！

個人評分
味道：8/10
環境：7/10
服務：8/10
抵食：9/10
平均每人消費：HK$0（試食邀請）

餐廳資料：
沙嗲王 Satay King
銅鑼灣軒尼詩道489號銅鑼灣廣場一期9樓
2893 6667