2014年1月18日星期六

功夫點心 Kung Fu Dim Sum:糕心莫測

過完新曆新年,好快又到過農曆年,其實早晌12月已見各大商號、酒家、餐廳、餅店推出林林總總嘅賀年糕品,傳統嘅有蘿蔔糕、芋頭糕、年糕、馬蹄糕……等等,新派嘅更加多不勝數,甚麼亞麻籽綠茶棗皇糕、紫薯玉露糕、發財蠔豉蓮藕糕、富貴櫻花蝦金腿馬豆糕抹茶開心果糕、紫米黃薑糕、燕窩楊枝甘露糕、山楂草莓乳酪糕 ……真喺層出不窮、創意無限。「功夫點心」貴為點心專門店,師傅做糕無難度,賀年糕品依個賺錢大餅又豈會唔分番一啖吖。小弟有幸喜獲店方送贈兩盒賀年糕品,都喺極傳統嘅臘味蘿蔔糕及椰汁年糕,屋企人都鍾意食糕,最啱就煲啖粥,食粥餸糕又一餐。
bowl臘味蘿蔔糕 $88
各門各派都有自己做糕嘅方程式,而功夫點心嘅臘味蘿蔔糕晌標榜新鮮香港製造,不含人工香料,惹味鮮肉臘腸,嚴選頂級蝦米,配以粗條蘿蔔。一盒淨重900g嘅臘味蘿蔔糕十分墜手,定價$88算經濟實惠。打開包裝,糕面以蝦米居多,臘腸只佔少部份,怕肥肉嘅人就啱晒。再切開糕身,粗條蘿蔔清晰可見,唔使估估吓足唔足料。
煎香後嘅蘿蔔糕,個人覺得質感喺有少少削身,不過,入口咬落一條條蘿蔔肉,清甜有口感,加上煎得焦香嘅蝦米同臘腸,味道不俗。是晚,就喺煲咗生菜鯪魚球粥嚟餸蘿蔔糕!
bowl椰汁年糕 $78
同樣一盒淨重900g,標榜新鮮香港製造,絕無添加色素。為免啲年糕煎後黐埋一舊舊,我哋都會沾蛋漿嚟煎。加埋煎餃子,配蠔豉螺片瘦肉粥,已喺我哋一餐極飽肚嘅早午餐。年糕煎得外香內軟,多得我老婆煎糕手勢好,雖然椰汁味未有預期般香濃,但都可以話香甜不膩,簡單而味道紮實。
雖然功夫點心唔喺咩城中名店,所出嘅賀年糕品亦只喺傳統款式,唔搞咩花臣嘢,但定價合理又足料,不妨一試!

個人評分
味道:7/10
環境:7/10
服務:7/10
抵食:7/10
平均每人消費:HK$0(試食邀請)

餐廳資料:
功夫點心 Kung Fu Dim Sum
深水埗福榮街72號地下
2880 9906

沒有留言:

發佈留言