粵軒 Canton Room：禮多人不怪，料多我啱晒！

由於近期收多咗賀年糕品，加埋大陸親友醒咗兩條金華火腿，所以依兩星期嘅早餐除十穀粥以外，就喺金華火腿白粥搭年糕，繼續賀年糕品當早餐。先後食過蘿蔔糕、年糕、芋頭糕，都喺較傳統嘅糕品，各家出品都各有賣點。今早嘅早餐，就喺友人所贈嚟自六國酒店中菜廳粵軒嘅瑤柱蘿蔔糕。

早前到酒家取貨之時，知道原來今年該店只推出3款賀年糕點，除瑤柱蘿蔔糕外，仲有椰汁年糕及黃金馬蹄糕，務求貴精不貴多，期望做得有水準回饋食客多年支持，而且，更以劃一意頭價$138發售。

蘿蔔糕以金黃色紙盒包裝，盒面金線勾畫出初菊單線圖案，配以棗紅色酒店名稱，再襯以棗紅底金字不織布環保袋，既有中國傳統色彩，又有懷舊情感。

瑤柱蘿蔔糕

無論晌粵軒門外嘅「樣辦」，抑或拎到返屋企嘅「實貨」，同樣都喺用料十足，絕不欺場。單單糕面已放滿臘腸、瑤柱絲、蝦米，仲加埋蝦乾，寧捨有咬口，咁多料加埋一齊認真豐富至極；而糕身內亦藏有唔少瑤柱絲同蝦米，再者，蝦米揀嚟大粒嘅，特別鹹鮮。此外，糕身挺實唔削，富蘿蔔清香，況且，內裡更有絲絲蘿蔔，可謂真材實料。

依底瑤柱蘿蔔糕貨真價實，定價中等，但以咁多料計，又喺酒店出品，自用送禮都諗得過啦。

個人評分
味道：8/10
環境：7/10
服務：8/10
抵食：8/10
平均每人消費：HK$138

餐廳資料：
粵軒 Canton Room
灣仔告士打道72號六國酒店1樓
2866 3806