博多一幸舍：幸福滿舍，不用走到博多！

講到飲食，其實香港人都幾幸福，唔單只晌香港搵到唔同國家、唔同地區嘅美食，仲有唔少外國知名嘅餐到香港開業，好似晌日本博多地區非常有名氣嘅三大博多拉麵：一風堂、一蘭、一幸舍，都相繼晌度開店，唔使越洋跑到博多老遠，也能夠一嚐佢哋嘅手勢，唔好話對拉麵迷，就算對一般食客，都喺個好消息啦。一風堂早前試過，一蘭太多人最怕排隊，有10年歷史嘅一幸舍都要試吓啦。

鮮紅色嘅門面，幾搶眼，一室木枱木櫈，牆身紅白配襯，令人感覺幾醒目。此外，一側牆上掛有木刻嘅菜牌，另一側就掛有博多一幸舍在世界各地進註嘅大地圖，數一數，原來以亞洲計都已經有超過20間。

點菜紙有中文及日文版，字大清楚。上截喺點拉麵，一共有5款味道，分別喺：博多濃厚豚骨拉麵、博多新清豚骨拉麵、黑拉麵、紅拉麵及神炎辛辣豚骨拉麵，湯底、麵嘅軟硬度都可按個人喜好而選擇，此外，一啲拉麵配料如：叉燒、溏心蛋、溫泉蛋、木耳絲、筍乾……等等，都可以額外加錢多要；至於點菜紙下截，仲有小食、飯類、飲品供應。

中文版

日文版

博多一口餃子 $30
一客餃子有5隻，煎得個底幾甘香，又唔太油，咬落挺脆口，菜肉餡料幾鮮甜，不過，肉汁唔多，啲餃皮夠薄，但感覺偏腍。配上帶微酸嘅餃子專用醬油，仍然都覺得唔錯。

博多炸雞塊 $30

一客3件嘅炸雞塊，都幾大件，據店員介紹佢哋嘅炸雞塊以雞脾肉做，仲專燈以雞皮包住嚟炸，所以，雞塊外層十分酥脆甘香，內裡雞肉又幾滑吓，沾丁點淮鹽，更鹹香惹味。

博多新清豚骨拉麵 $68

博多一幸舍出名自有其道理，個豚骨湯自家熬製就當然喺基本，之前睇過雜誌介紹，話佢哋個湯頭會反覆熬煮，令個湯有豐富骨膠原，黏度亦相對高，所以，要細嚐一下先。依碗新清豚骨拉麵，個湯濃而不濁，一啲都唔油膩，但又有濃郁豚骨香，幾有種豬骨湯嘅「清新感」。配料有叉燒、筍乾、青蔥，額外加隻溏心蛋，叉燒較為細片，溏心蛋喺原隻，稍後再講，而麵條朋友要軟嘅，佢話軟得嚟又幾咬勁，伴住啲湯食，味道唔錯。

黑拉麵 $78

即喺黑芝麻炸蒜油味，濃味嘢啱我，碗麵送到嚟，個湯確喺幾烏卒卒，好彩無跳隻黑蟋蟀出嚟啫。個湯頭好香炸蒜味，反之黑芝麻味就似乎弱啲，而且，唔算好油，又唔太黏口，小弟覺得都唔錯喎；配料有叉燒、青蔥，多加芽菜、溏心蛋及溫泉蛋。叉燒據講用咗豬肩肉，既少肥，又鬆化；多蔥多芽菜，食落更爽口；溏心蛋做得「一流」，一咬即流，蛋黃凝香好食，蛋白部份亦喺做到啱啱好，正；而溫泉蛋一樣有水準，蛋汁滑溜，賣相、質感俱佳。至於麵條要咗硬，當然唔喺硬心煮唔熟嗰隻啦，咬落更柔韌。

「一幸舍」有令人幸福嘅意思，舍即喺家，比喻希望一家人幸福，一家公司裡嘅員工幸福，都祝願晌依個掙扎嘅年代，人人都可以幸福滿瀉！

個人評分
味道：8/10
環境：7/10
服務：8/10
抵食：7/10
平均每人消費：HK$130

餐廳資料：
博多一幸舍
銅鑼灣登龍街39號地下
2515 9366