稻香 Tao Heung：稻日如年

早前同屋企人去過稻坊嘆茶，該次食文已講過越嚟越少幫襯稻香系嘅食肆，因為，質素上有點點每況愈下嘅感覺，食物雖然不斷推陳出新，成日都大賣廣告做宣傳，不過，似乎只喺一味鬥平，唔太講質素。雖然喺咁，仍然茶客不少，午市、下午茶市依樣座無虛席。今次我，太太，加埋個朋友嚟荃灣城市中心稻香，純粹完咗崇拜就腳貪方便。

環境、服務唔多講，大家心裡有數，比上不足，比下有餘，叫做食餐晏仔，我哋都無太多要求。兩張點心紙，一張基本嘅，另一張喺星期六、日及假期專用，目標都喺搵啲平平哋，正如老婆經常掛口邊嘅小點策略，哈哈！

奶皇馬拉卷 $11.8

外觀絕對失禮嘅奶皇馬拉卷，一客4件，擺得求其，幸好喺味道唔差，蒸得軟綿，有啲奶皇香氣。

灼肉丸五色蔬 $14.8

無乜幾多粒嘅肉丸，撩開晒啲菜先見有幾粒，入口都有少少爽。五色蔬就只有翠玉瓜、木耳、粟米條，都唔知何來五色，唯一可取，就喺個點心較為健康。

三式腸 $17.8

上次晌稻坊都有試依道點心，一客腸粉有齊鮮蝦腸、牛腸及叉燒腸，腸粉皮比起稻坊嗰次仲要厚，較粉又唔多滑溜，幸而餡料十足。

咖喱牛肉酥角 $10.8

喺假日推廣價，一客兩大件，估唔到做得有板有眼，酥皮層幾酥脆香口，睇橫切面就知有幾鬆脆；我都知家下啲牛肉幾貴，不過，咖喱牛肉餡喺咪少得太可憐呢？

香煎艾餅 $11.8

時有聽個艾草依種植物，不過，就唔太認識，個艾餅以艾草搓成，色澤碧綠，煎後外皮有點焦香，入口煙糯，原來中間仲有豆沙，清甜好食，當甜品都唔錯。

XO醬炒蘿蔔糕 $18

蘿蔔糕切成粒狀加XO醬炒成，不過，蘿蔔糕唔夠挺實，炒出嚟有啲散，而且，XO醬下得手緊，唔夠濃香惹味，只喺似一碟煎香咗嘅蘿蔔糕。

飄香榴槤卷 HK$13.8

難得同枱3個人都食得下榴槤，所以，膽搏膽試一籠。嘩！真喺唔得，個樣唔得，個質感唔得，個味道更加唔得，直情喺一籠趕客點心嚟，極度推介……唔好點，睇見有啲渡日如年嘅感覺 – 想死。

3個人食咗7樣嘢，連茶錢，加一，都唔使百三蚊，除開平均每人四十零蚊，坐足過幾兩個鍾，抵到咁，仲想點（當然，撇除個榴槤卷而言）！

個人評分
味道：6/10
環境：7/10
服務：7/10
抵食：7/10
平均每人消費：HK$43

餐廳資料：
稻香 Tao Heung
荃灣眾安街68號荃灣城市中心一期4樓A舖
8300 8125