山區裡的走走趯趯: 麵屋武藏虎洞 Menya Musashi Kodou：黑虎耐勞

2013年10月12日星期六

麵屋武藏虎洞 Menya Musashi Kodou：黑虎耐勞

我依類「雜務經理」，晌公司乜都要做，認真克苦耐勞，所以一到週六唔使返工，心情特別爽，加埋有幸出席晴報讀者嘅試食活動，優先品嚐新出有坑紋嘅沾汁麵，感覺更爽。事發地點，就晌海運LCX嘅麵屋武藏　虎洞。據介紹，原來佢早晌1996年東京開業，憑獨特製作技巧造就經常大排長龍嘅超人氣拉麵店，客人絡繹不絕。今回與其他讀者或博客聚首一堂，彼此交流，輕鬆悠閒咁品嚐一頓週末午膳，實在愉快體驗！

麵屋武藏喺首次光臨，入門口左邊喺半開放式廚房加吧位，可欣賞到日藉師傅淥麵嘅功架，而再入啲除牆上掛咗唔少武士畫作，加上一室黑與白，好有武士嘅剛烈味道，給人感覺份外型格。近門口有多張2 / 4人梳化卡位，梳化椅背特高，增加多少少私隱度，亦可減少食客間嘅騷擾；

半開放式廚房加吧位

全場最正，要數到餐廳最入，靠著一列落地大玻璃嘅維港海景位，既開揚，又有景，讓人舒服不過。題外話，究竟「武蔵」何解？宮本武蔵，江戶時代初期嘅劍術家、兵法家、藝術家，店方就以宮本武藏嘅理念「勇於嘗試，推陳出新」嚟不斷突破，真喺唔使下下過日本都嘆到麺屋武蔵嘅招牌靚麵！

拉麵、沾汁麵故然喺店方嘅主打，仲有飯、沙律、炸物、小食。雖然今次試食活動喺一試全港獨有嘅有坑紋沾汁麵，但麺屋武蔵亦有幾款小食名物，都一樣有機會試到。

麺屋武蔵嘅介紹

白虎系列

赤虎系列

黑虎系列

武藏煎餃子 $35

一客5隻煎餃，全由人手每日新鮮包製，餃皮搓得挺薄，煎得香脆，菜肉比例平衡，又富肉汁，配上餃子專用蘸汁，確喺好食！

爆炸男爵沙律 $38

沙律一共有3款選擇：大根水菜沙律（$48）、爆炸男爵沙律（$38）、豆腐三色豆沙律（$42），以中間嘅爆炸男爵沙律最具話題性。以沙律菜、青瓜絲、車厘茄為沙律底，配以油醋汁，而最大驚喜喺加入大量脆炸咗嘅北海道男爵薯仔絲，以及一隻溫泉玉子，撈勻之後，食落沙律中嘅清爽，又夾雜薯絲嘅卜卜脆，口感有層次、有趣味，味道帶微酸，卻又有一陣陣蛋黃凝香，實在好食，果然喺店中人氣沙律，好值得推介！

唐辛子烏賊 $48

燒製好嘅墨魚，淋上加入唐辛子（我哋就稱為辣椒）、檸檬汁做嘅醬汁，辣辣哋，又有點檸檬味，幾惹味，此外魷魚肉質軟腍，送啤酒應該最夾。少少題外話，墨魚（或烏賊，或花枝）跟魷魚一唔一樣？原來喺有分別，外型大致相同，只喺墨魚有扁塊芒果形石灰質嘅硬骨（摘自維基百科）。

跟住落嚟，輪到沾汁麵出場，款款都喺賣$75，其實今時今日晌香港，沾汁麵都唔喺咩新鮮嘢，麺屋武蔵一向都有賣，不過依次新推嘅喺「有坑紋」嘅麵條，透過坑紋提高掛汁效果。麺屋武蔵最著名嘅喺佢啲湯底，分別白虎（極濃厚豚骨湯底）、赤虎（香濃豚骨湯底加入超過10種辣醬製成嘅辣油）及黑虎（濃厚豚骨湯底加入燒香後嘅長蔥及玉蔥製成嘅黑蒜油），意外發現，原來仲有一款「蕃茄」底架，只限湯拉麵：蕃茄豚骨湯拉麵（$80），唔使講都知香濃豚骨湯底外加入咗咩啦。

沾汁麵系列

蕃茄豚骨湯拉麵（左）、御飯類（右）

如果未食過沾汁麵都唔怕，枱上嘅溫馨提示「建議沾汁麵的進食方法」，大可參考吓！

黒虎沾汁麵 $75

小弟份外鍾意蒜香之類味道，所以心水就喺「黒虎」，黑漆漆嘅「湯底」（抑或叫「汁底」好呢？）一上枱喺好香，負責人介紹時話個湯會較鹹，最傳統喺食完麵時，加啲木魚湯撞番淡先至好飲晒佢，唔建議就咁飲，但我又膽粗粗試咗兩啖，竟然又OK喎，可能小弟食嘢抵得鹹。每碗麵都會包一大塊叉燒、竹筍、蔥花、半熟玉子，叉燒少肥，軟腍鬆化，好啱食；竹筍入口爽脆，而蔥花夠多，好啱我；半熟玉子掂喎，好溏心，蛋黃綿柔、香滑，不過有食友反映佢哋隻蛋流心度不足，或許喺個別例子，但都喺有需要加強少少個穩定性。試試沾麵又如何，麵條粗身中間帶有一條坑紋，入口較煙韌，有咬口，個人反而覺得個「湯底」質地夠稀，而且比較油，影響咗麵條掛湯嘅表現。