2013年10月16日星期三

華御結 Hana-musubi:再御歸來

之前晌一次試食活動當中認識「華御結」依個「御結」專賣店,藉此,對「御結」(即喺飯糰)多咗份認識同了解,令小弟對「御結」唔喺一舊飯咁簡單。小弟份工比較hea,「難得」加班收得晏,所以,索性今次收工過嚟上環店,買返去當晚餐食,重溫一下日本傳統家庭料理嘅愛心飯糰。
因為已經喺收工時段,所以,貨架嘅產品買少見少,真喺所餘無幾。御結得番櫃面10款,少量手卷,3款熱湯中,和風豚肉味噌湯亦都售罄。此外,仲有健康沙律、和風單品料理、壽司、刺身丼、日式甜品及飲品,同樣,都喺剩番唔多。
套餐點都抵少少,所以揀華御結「營養均衡」套餐,包括自家製湯水,以SetA為基礎,再多配搭其他食品成為SetB, C, D。
Set A($39)任選2款御結加細碗裝自家熱湯(250ml);
Set B($49)任選2款御結加細碗裝自家熱湯(250ml),再另加1個御結或任何細盒裝和風單品料理1款;
Set C($59)任選2款御結加細碗裝自家熱湯(250ml),再另加1個手卷、任何大盒裝和風單品料理1款或任何和風沙律1款;
Set D($69)任選2款御結加細碗裝自家熱湯(250ml),再另加1款刺身美食。
2個御結加個細湯一定唔夠我同老婆食,所以,加多客手卷,要咗Set C。估唔到,都夠我哋頂一餐喎,唔使煮真喺慳好多時間,當然事後仲有啲零食、糖水再墊一墊啦。
bowl和風豆乳骨膠原雞丸湯(細)
所有湯品散買價為$18(細碗裝12安士)、$25(中碗裝15安士)、$32(大碗裝18安士),跟餐就喺細碗裝,不過,一般嚟講,12安士好夠飲。雞骨湯底加入豆乳,具唔具骨膠原當然睇佢唔出,但色澤濃白,質感濃稠,味道清甜;而配菜有點豆角、冬菇,雞肉丸自然喺主角,店員介紹喺新鮮手打,肉丸外表粗糙,亦唔喺彈牙一類,但感受到無乜溝粉,應該真材實料。
bowl紀州特產酸梅御結(散賣價$12)
御結分白米飯系列及調味飯系列,前者以白米飯包著唔同餡料,再以紫菜包裹,售價為$10-$15;後者則飯粒已作出調味,並混和餡料做成,售價為$15-$16。紀州特產酸梅御結屬前者,而包裝膠紙底部有教你點樣撕開膠袋,唔使整污糟雙手都方便食用。
店方標明採用百份百日本米,之前嘅試食,就記得佢哋介紹過喺用上日本新潟越光米。飯粒渾圓,黏糯有咬口,紀州酸梅酸香開胃,不過,嫌佢實在有啲偏少,而外層嘅紫菜依然脆身。
bowl香辣迷你帶子冬菇御結(散賣價$16)
冬菇粒已經混和入調味飯當中,而飯粒又帶微微辛辣,食落有咬口,味道辛香;迷你帶子即喺元貝仔,大概1毫子大細,不過,有幾粒喎,絕無欺場交足貨,元貝仔入口軟綿綿,不愧店長推介啊!
bowl香蔥吞拿魚蓉手卷(散賣價$22)
相比起御結,手卷自然飯粒多好多,同樣,晌包裝袋上都有教大家點將塊紫菜包住啲飯,為保持紫菜爽脆,分開包裝,食時先包番埋,確喺有此必要。第一次包可能有少少雞手鴨腳,不過,慢慢嚟都唔喺咩難事一件。吞拿魚刴到起蓉,加埋蔥絲、白芝麻,配合脆卜卜嘅紫菜、咬口嘅飯粒,真喺唔錯,當然,吃期望吞拿魚蓉好多,食到底就變咗齋飯;而內附一小包日本芥辣及醬油,沾一點讓你食得刺激及濃香一啲,亦喺臨尾食到手卷底嘅良伴嚟。
今次個組合實際計落未喺抵到盡,但比起散買已平咗$9,如果仲想抵盡啲,當然,御結要揀調味飯系列,因為每個值$15、$16,而白米飯系列只有少部份喺貴價啲。不過,好想試個紀州酸梅,又唔可以下下都以「攞到盡」心態嘅。另外,每件產品均由營養師細心計算,都有列明所含熱量,小弟依類跑山區嘅人,多多熱量都受得起,所以一於少理,不過,要健美嘅女生們,或要控制體重嘅人士,就要多加留意喇!

個人評分
味道:7/10
環境:6/10
服務:6/10
抵食:6/10
平均每人消費:HK$30

餐廳資料:
華御結 Hana-musubi
上環皇后大道中181-183號新紀元廣場2樓204號舖
2885 2011

沒有留言:

發佈留言