古法烘焙 Gu Fah Bakery：叁加壹唔算數

早陣子試過古法烘焙嘅「回憶之味道」－馬仔（低糖、黑糖），今回趁iSquare新店開張，就試試佢嘅雜錦錦盒，仲要喺有幾樣烘焙酥餅未試過添，可惜中秋啱啱過咗，或者下年考慮買嚟當送禮賀中秋。其實都曾經買過古法烘焙嘅產品當小手信送俾食友，貪佢款式特別，味道有特色，不過都喺獨立一款酥餅嘅小盒裝。依家出埋大盒嘅禮盒裝，包裝應節、大方得體，過時過節，新年中秋，又多個選擇囉！

新店地方更闊落，外觀更光猛通透。

知道古法烘焙個老闆Eric做生意身體力行，事事親力親為，新店開張，當然要支持吓嘅。禮盒裝其實共有3款，除所買嘅「叁加壹錦盒」（$188）外，仲有其餘兩款：「幸福錦盒」（$168）及「如意錦盒」（$228），前者「幸福」包括原味蛋卷4件、杏仁餅2件、老公餅4件、豆沙老婆餅4件、鳳梨酥2件；至於後者「如意」則包括原味蛋卷4件、杏仁餅2件、杏仁批8件、合桃酥2件、黑白芝麻酥2件、老公餅2件、豆沙老婆餅2件、鳳梨酥2件。

左至右：「叁加壹錦盒」、「如意錦盒」、「幸福錦盒」

「叁加壹錦盒」$188
「幸福」及「如意」嘅酥餅組合都幾近似，只喺「如意」有多幾款嘢，但價錢又再貴啲；反而「叁加壹」嘅組合好唔同，「叁加壹」唔算喺條數，睇佢哋個樣你就明何謂叁加壹嘞，當中包括叉燒批5件、杏仁批6件、白芝麻批6件、黑芝麻批6件，全部都喺脆批，件件都喺獨立包裝，存放時間可以耐啲，無咁易潮化，只喺無咁環保啫。此外，見盒底標明「本產品通過HACCP管理體系認證、ISO9001:2008質量體系認證」，品質應有一定保證，讓買家多份安心，值得支持嘅本土製作。

叉燒批

外型其實唔喺幾討好，不過又幾似個四、五頭鮑魚咁款喎，哈哈！由於成份落咗唔少香料，例如南乳、李錦記叉燒醬、香蔥粉、五香粉……等等，所以味道隱約中有唔同香味，以南乳及叉燒香較明顯，加上入口非常鬆脆酥化，內裡又有粒粒白芝麻，確喺不俗嘅酥餅小食。

杏仁批

記得舊年初初出依個杏仁批，店員話經常斷貨，如今再唔會「摸門釘」喇，因為既然好賣，在商言商，就自不然加大力度去生產啦。難得喺產量大咗，但質素無下降到，手功加心機之作，口感仍然超鬆脆，面層蛋白脆糖配杏仁，唔過甜但又有杏仁香，如果加多兩、三片杏仁片就更多啦。

白芝麻批

白芝麻批及黑芝麻批跟杏仁批做法如出一轍，只喺以芝麻粒代替咗杏仁片。先試白芝麻批，整條批身同樣質感鬆脆，而面層蛋白脆糖黐得白芝麻滿滿，而白芝麻又經炒過，所以芝麻香挺突出，唔知喺咪下糖多咗，我食到依件有少許過甜，不過飲啖茶OK番晒啦。

黑芝麻批

最後所試嘅黑芝麻批，鬆脆度無走樣，依然鬆脆十足，黑芝麻同樣黐滿批面，亦都好夠芝麻香，而且，因為芝麻夠晒多，比起杏仁批咬口感更重。

幾件批，配杯唐茶，喺是日悠悠閒下午茶嘅配搭，雖然只得一支公，但樂得寫意！

個人評分
味道：7/10
環境：8/10
服務：8/10
抵食：7/10
平均每人消費：HK$188

餐廳資料：
古法烘焙  Gu Fah Bakery

尖沙咀彌敦道63號iSQUARE 國際廣場7樓704號舖
6387 0874