2013年9月28日星期六

稻坊 Tao Square:坊失失早午茶

通常星期六同家人飲早茶(其實早午餐一餐過)多數晌萬事達廣場間百樂門,因為近所住屋苑多啲,而走到過嚟曼克頓山嘅稻坊,就真喺一時興起。而且,依家都越嚟越少幫襯稻香系嘅食肆,因為,質素上有點點每況愈下嘅感覺,不過,又未至於太差。
閒話唔多講,時近11:00am,個肚打晒鑼,幾張點心紙剔剔剔,講明點心即叫即蒸,需時廿多分鐘,遞完剔好嘅點心紙都仲要等,唔快手又點得。
bowl酥皮叉燒餐包 $13.8
大大個,漲卜卜,不過餡料好少,而且嚟到都唔熱,唔似即叫即做,幸而味道唔錯,外皮酥脆。對上一次嚟都有叫,簡單嚟講,就喺迷你「菠蘿叉燒包」。
bowl三式腸 $19.8
即喺一碟腸粉有齊蝦腸、牛腸及叉燒腸,適合多心嘅人又或鍾意唔同口味嘅家庭,唔使叫幾碟腸粉咁多。雖然腸粉皮拉得有啲厚,但尚算滑溜,又無話太削,餡料又落得足,無欺場。
bowl鯪魚球灼西生菜 $19.8
老婆同姨仔一向最鍾意食菜,當然依個加埋鯪魚球嘅西生菜就更啱晒大家。估唔到啲鯪魚球幾夠味,有蔥香,又有陳皮香,口感爽彈,意外哋咁好。
bowl甘筍汁流沙包 $9.8
屬優惠美點,只賣$9.8一籠,仲要喺流沙包,點都要嗌番一籠。橙黃色嘅包身,幾養眼,又夠軟熟,咬開流沙澎湃,有鹹蛋黃香,不過無乜甘筍味喎。
bowl鹹水角拼春卷 $13.8
雖然油炸點心香口好味,但疑於唔多健康嘅原因,有依個雙拼可以點少一碟就有兩款炸嘢點心食。春卷普普通通,夠香夠脆都收貨;鹹水角亦都唔差,外皮雖有少少厚,但咬落煙糯唔太黏牙。
bowl海蝦肉丸粥 $19.8
晌酒樓,平時皮蛋瘦肉、柴魚花生就食得多,見有個海蝦肉丸粥就不妨試一試。粥底幾綿,4粒豬肉丸加2隻海蝦,算唔失禮架。豬肉丸幾彈牙,海蝦就唔得,未去殼,食起嚟啲啲麻煩,最弊喺唔多爽。
bowl滋補藥膳雞腳 $12.8
依個雞腳就差少少,雞腳本身有啲甩皮甩骨,藥味又頗淡口,只喺因為食得多豉椒鳳爪先改一改試吓個藥膳雞腳。
bowl沙嗲金錢肚 $19.8
金錢肚炆得好腍又入味,沙嗲汁又惹味,但咪睇佢好似好大碟,下面墊咗炸魚片,第一眼仲以為喺豆腐,比起上次墊蘿蔔大手筆咗。
bowl香煎地瓜餅 $13.8
一向都甚好蕃薯,有時烚蕃薯食都可以當到一餐。個地瓜餅口感唔得,入口有少少硬實,而且蕃薯味好弱,唔值得叫。
bowl鬆軟叉燒包 $13.8
舅仔好鍾意叉燒包,當然點一籠俾佢啦。不過,漏咗單,追完又追,最遲嚟就喺籠包,認真慌失失。而個包包身確喺幾鬆軟,叉燒餡亦唔少,調味不俗,最緊要上到枱時熱辣辣,中式包點咁先好食。
計埋早茶$6位,另收加一,埋單唔使兩舊水,坐足兩粒鐘,一家人閒話家常,怪不得喺週六、日好多香港人嘅家常節目。

個人評分
味道:7/10
環境:7/10
服務:6/10
抵食:8/10
平均每人消費:HK$50

餐廳資料:
稻坊 Tao Square
荔枝角寶輪街1號曼克頓山商場(曼坊)1樓102舖
8300 8140

沒有留言:

發佈留言