2013年9月19日星期四

德興酒家 Tack Hsin Restaurant:無要求、只想平,德興幫到你!

晌中國人社會中,一年裡面有幾個日子都做做節食番餐,冬至、團年就唔在講,仲有端午、中秋,又或老人家搞壽宴……等等,都會相約圍內親友一聚。因為大部份親友都家住深水埗區,食邊間佢哋就最無乜意見,就腳、經濟實惠就可以,故此好多時都會嚟黃金中心嘅德興,無要求、只想平,就喺咁簡單。

向來都甚少傷腦筋諗食乜,都喺例點全包宴,每圍全包價$1,660(星期五、六、日、假期及其前夕),包茶芥、加一、啤酒兩樽、果汁兩渣,我哋一圍多過12人,都無額外多收茶錢。如果星期一至四仲抵,每圍都喺全包價$1,330。順帶一提,每逢過節嚟食飯,啲枱櫈照例拍到逼一逼,只可以講相熟嘅部長晌服務上搭夠。

bowl金豬全體賀喜慶
首先出場有全體乳豬,外皮燒得卜卜脆,不過,相信隻豬仔都幾懶郁,皮下脂肪勁厚勁肥,咬落一口油。
bowl荷塘帶子珊瑚蚌
以帶子、珊瑚蚌跟翠玉瓜、蓮藕同炒,碟頭幾夠份量,帶子都算大粒,珊瑚蚌入口爽爽脆脆,而翠玉瓜、蓮藕亦都帶脆口感,味道不俗。
bowl鮮雜果桂林蝦丸
做得好hea嘅一道熱葷,啲炸蝦丸做好「求其」放上碟,而鮮雜果沙律又喺hea做放晌一旁。還好嘅喺蝦丸唔太差,幾爽彈,只喺細粒無睇頭,有啲炸得稍為燶添。
bowl羅宋西式一字骨
成晚賣相最唔得嘅一道菜,查實佢味道唔錯,酸酸辣辣,辣得嚟唔霸道,唔似麻辣嗰啲咁重口味,不過,外觀就算未至於似廚餘,都甚似湯渣囉。
bowl紅燒竹笙雞絲翅
個雞絲翅稀杰度差唔多,不過料少,竹笙少,雞絲又少,啲翅就梗加唔在講,有啲將貨就價嘅感覺。
bowl翡翠玉環瑤柱脯
繼個炸蝦丸,另一道hea做得緊要嘅菜式。玉環瑤柱脯,大細不一都算,瑤柱跟啲節瓜內籠唔啱呎吋又有,瑤柱凸出晒過節瓜亦有,而啲小棠菜都已經有心裁好晒啦,點知擺盤都「求其」成咁。味道,只可講無咩差池,不過,茨汁有點漿。
bowl清蒸游水海石斑
成晚做得有番少少水準就喺條魚同隻雞,石斑幾夠斤兩,清蒸就最好,食番到魚嘅鮮味,蒸得啱啱好,肉質細嫩,近骨位都無唔熟。
bowl德興一品報喜雞
其實即喺炸子雞,雖然斬出嚟個樣排得未夠工整,但做得皮脆肉滑,脂肪又少,夠甘香。
bowl蟹籽海皇炒飯
所謂「海皇炒飯」都只喺楊州炒飯海鮮版,加咗少少蝦仁、帶子粒、蟹柳咁,海鮮餡料唔算高質,都喺好普通貨色;至於「蟹籽」,認真欠奉,幸好飯粒分明,無糊爛嘅問題,算叫食得落口。
bowl蓮蓉壽桃
估唔到個「壽桃」蓮蓉包做得有一手,無論賣相、味道都絕對稱得上上好。包身好鬆軟,入口熱辣,蓮蓉清甜軟綿,有親友唔嗜甜,小弟絕唔介意食多一個。
bowl鮮果拼盆
如果用得「拼盆」二字,就麻煩唔該俾多款生果嚟啦,全碟只有西瓜,雖然啲西瓜清甜少少起沙,不過,都仲喺覺得佢哋慳皮。
一班親戚志在應節聚一聚,佢哋一向對食無要求,平平哋慳番啲就仲好!德興嘅質素有目共睹,賣相欠奉,概括嚟講,味道平平,中規中矩,一啲集團式酒樓最平一席都要二、三千之時,佢仲喺兩千唔使,要明白一分錢一分貨嘅道理。一餐完結,又喺散場之時,又要等下個大節,不過,幾個月嘅時間,眨吓眼就過啦。

個人評分
味道:6/10
環境:6/10
服務:7/10
抵食:8/10
平均每人消費:HK$130

餐廳資料:
德興酒家 Tack Hsin Restaurant
深水埗欽洲街94號黄金中心1樓
2708 2777

沒有留言:

發佈留言