2013年9月14日星期六

鴻星海鮮酒家 Super Star Seafood Restaurant:玩嘢動物點心

「鴻星」晌小弟心目中一向喺間飲茶、食飯都頗貴嘅酒家,不過,素質唔錯,而且,佢嘅動物創意點心就一直好深刻印象。由於今次茶友嘅組合包括好幾個家庭,有兩個好細個嘅小朋友,所以,負責嘅搞手就揀咗嚟鴻星飲茶。
旺角始終喺旺角,就算新世紀依邊亦變得越嚟越多人,尤其大概一年前依度翻新過,就更加墟撼。幸好,店內環境又唔喺太過逼,我哋一行6大2細,被安排咗張大枱,都坐得鬆動舒服,再者,絨面梳化椅,又真喺幾好坐。
收費方面,由小點到頂點8個級別,平日定假日,正價定茶市優惠,都一清二楚。
茶芥 $10位、酸菜 $5位
早茶時段(即喺12:00pm前離座埋單計)免收酸菜,否則平日收$4位,星期六、日、假期就收$5位,酸菜喺乜?炸魚乾仔是也!
既然多少都為啲動物創意點心而嚟,當然,都揀少少嚟氹吓啲細路仔。睇勻所有點心紙,總共有7款依類點心,分別喺小鹿斑比、獅子王、青蛙王子、小飛象、小企鵝、奶皇小蜜蜂及棉花白兔仔,款款都做得生動別緻,最後揀咗後兩者。
bowl棉花白兔仔 $20
一客4件嘅白兔仔棉花糖,唔單只做得維妙維肖,更給人得意可愛之感,無怪乎一上枱,小朋友都搶住要。棉花糖入口非常軟綿,咬落唔黐牙,又沾滿椰絲。
bowl奶皇小蜜蜂 $24
另一款造型十分傳神嘅動物點心,好趣繳又肥嘟嘟嘅小蜜蜂,以杏仁片作為兩對小翼,真喺頗有心思。甘香而有煙糯嘅外皮,內裡喺填得滿滿嘅奶皇,既香且滑。
其他嘅廣東點心,就一人揀啲心水,免得有人無啖好食嘛。
bowl純鮮蝦餃皇 $34
老套一句就真喺皮薄餡靚,確實外皮摺紋清晰,薄透而口感黏糯,餡料滿滿載著鮮蝦,爽彈而鮮甜。
bowl潮州粉果 $20
粉果就做得有點失色,因為外皮較粉,幾黐牙,餡料做得粗枝大葉,又唔夠均勻。
bowl鴛鴦燒賣 $27
鴛鴦,一為牛肉燒賣,一為魚肉燒賣,各款兩件。試咗前者,牛肉打得鬆軟,此外,就唔覺有咩突別之處,大抵慣咗叫完蝦餃就手剔埋燒賣吧!
bowl酥炸魷魚鬚 $46
魷魚鬚選材較粗身,所以,啲魷魚鬚口感唔會太乾太韌,咬落軟熟,再者,粉漿簿,兼且炸得甘香酥脆,確喺好食。
bowl棉花雞 $38
雞肉蒸得幾嫩滑,而「棉花」(魚肚)口感腍爽,索咗啲雞油,添多份油香鮮品。
bowl蜜汁叉燒包 $27
初時籠叉燒包嚟到,以為嚟錯,因為純以外觀,個包法似菜肉包一類多過似叉燒包嗰種火山型,當然,一咬就知無嚟錯。由於個叉燒包相比一般為細,所以,餡料亦唔多,還好味道不俗,又無乜肥肉。
bowl珍珠糯米雞 $31
一客兩件,所以比出面有啲一客三件嘅為大,由於小弟無試到糯米雞,所以,不評。
bowl豉油皇煎腸粉 $33
個豉油味好香濃,而且,煎得「勻巡」入味,唯一要挑剔都只喺啲腸粉欠缺焦香,唔似煎腸粉,似炒腸粉。
bowl牛肉煲仔飯 $28
雖然飯焦欠奉,但飯粒煮得乾身分明,軟綿適中,淋上甜豉油都已經好好食,而且牛肉餅蒸得鬆軟,好香蔥味。
整體鴻星嘅點心做得有水準,當然,部份有啲未夠稱心,不過,個人口味不盡相同,至少同枱朋友個個都覺得好味啦!

個人評分
味道:8/10
環境:7/10
服務:7/10
抵食:8/10
平均每人消費:HK$77

餐廳資料:
鴻星海鮮酒家 Super Star Seafood Restaurant
旺角太子道西193號新世紀廣場6樓601號舖
2628 0890

沒有留言:

發佈留言