2013年9月1日星期日

COCO:精緻、精巧、精品!

去探老友,又點可以兩手空空,既然出開尖沙咀睇展覽,就想起不如嚟位處The Mira酒店大堂內嘅餅店COCO,買幾件凍餅跟老友一齊下午茶,試吓佢啲即磨咖啡,慢慢閒聊。
COCO都喺第一次幫襯,開放式設計,跟酒店大堂連成一體,而裝修時尚型格。一列幾組餅櫃,有大個裝蛋糕、朱古力、凍餅、杯子蛋糕,全部都設計獨特、賣相精緻,整齊排列晌玻璃餅櫃中,猶如一間矚目嘅精品店。除甜點以外,餐廳亦有提供咖啡及其他飲品。
目標喺凍餅,所以,都無乜多花時間睇其他嘢。是日凍餅一共有8款,老實講,款款都做得精巧細緻,賣相吸引,真喺一時間選擇困難候群症又出現。定價上,始終都喺酒店級數,一件件裝蛋糕閒閒哋都要$40+,所以,如銀根鬆動大可不妨晌度嘆個下午茶,輕輕鬆偷得浮生半日閒,再想好享受啲,甚至嚟個高茶都得添。
為3款凍餅影相之時,就等待老友嘅即磨咖啡,雖然咖啡沒有加壓,但味道依然醇香。順帶一提,蛋糕除咗黏在銀色卡紙上,亦有雙面膠紙固定晌餅盒內,而杯子蛋糕更放晌個別特製餅盒固定,唔會輕易被左搖右擺,值得一讚。
bowlCocOpera $45
COCO嘅招牌凍餅,以知名嘅法國歌劇院蛋糕為藍本,淨睇外觀已叫人賞心悅目,一共6層嘅CocOpera,絕對喺心機及耐性之作,由下而上:薄層杏仁海綿蛋糕餅底、咖啡朱古力硬漿(ganache)、薄層杏仁海綿蛋糕、果仁牛油忌廉、威化脆脆、純黑朱古力漿,偏甜喺必然,但味道及質感富層次而多變,有杏仁、咖啡嘅香,又有朱古力嘅濃甜,亦有牛油忌廉嘅香滑,確喺一款既滋味,而有個性嘅甜品。如果面層嘅鏡面朱古力做得更滑溜、更爧身,就無懈可擊嘞!
bowlBlueberry Chic $42
一叢紫色外表,配襯埋新鮮嘅藍莓及銀箔為裝飾,堪稱外型高貴、脫俗。以朱古力餅乾為餅底,滿以為餅身只喺單單藍莓芝士之時,切開先發現內有乾坤,原來裡面夾有兩屠鮮藍莓果蓉。藍莓芝士部份帶有濃郁芝士味,但又不失藍莓香,味道上兩者兼備,頗為平衡,而藍莓果蓉鮮活帶微酸,一齊都嚟得有個性。
bowlMatcha-Azuki $36
有別一般好美式嘅杯子蛋糕,扮到花喱花碌,相反,依個杯子蛋糕Matcha-Azuki,賣相就比較清秀,唔花巧,只喺糝上少少黑芝麻及放片朱古力片已矣。黑芝麻作為蛋糕底,加上紅豆蓉餡心,再唧上花形抹茶忌廉,就呈現晌面前。杯子蛋糕底芝麻味挺濃,不過質感略嫌太濕潤,亦有少少粗糙感,幸好紅豆蓉清甜好味,而抹茶忌廉柔滑如絲,好似食緊軟雪糕咁,再者,抹茶嘅濃香又喺功不可沒嘅一環。
「精緻」喺想講佢哋嘅賣相,「精巧」喺想講餅廚嘅手功,「精品」就自不然講味道、質素。總括而言,好睇又好食,貴.得嚟喺值!

個人評分
味道:9/10
環境:8/10
服務:8/10
抵食:8/10
平均每人消費:HK$41

餐廳資料:
COCO
尖沙咀彌敦道118號The Mira Hong Kongl地下
2315 5566

沒有留言:

發佈留言