老牌車厘哥夫：聯朋結糖（一）

繼續又寫吓食友所贈嘅零食小心意，依次嘅零食喺對面大海嘅紐結糖，無獨有偶，前後收到3份紐結糖，兩份喺嚟自澳門（車厘哥夫及正牌車厘哥夫），另一份喺嚟自本土嘅ABC餅屋，再加埋晌屋企附近多多餅店嘅自購，就索性一次過寫晒，分4篇出文，名為聯朋結糖（一）、（二）、（三）、（四），因為都喺識多咗友善嘅食友（聯朋），先至成日有咁多零食（結糖）啫。

講開Nougat，澳門興用「紐結糖」，本地「紐結」、「鳥結」都有用，甚至乎「了結」都見過，但「了結」意思有啲「唔老嚟」喎。不過，都喺譯音字，大家明喺乜就OK啦。而台灣就會用「牛軋糖」一詞，點解會咁叫，依種以麥芽糖、砂糖、奶油、奶粉、蛋白、堅果做成嘅糖果，晌維基百科有兩種起源說法嘅記錄：

1. 在1441年在在意大利克雷莫納發明的。在一個地方貴族的婚宴上，新人獲贈一種用蜂蜜、杏仁和蛋白製成的糖果。
2. 中國明朝商輅（鄉試解元舉人，依《明史》正統十年會試會元、殿試狀元，三次考試皆第一）為了感謝文昌帝君托夢使其三元及第，依照夢中作法所做出。以麥芽糖、花生、米等製造，並捏造成牛的模樣，所以叫做牛軋糖，但後來因為把糖捏成牛的模樣實在不容易，而且生產速度較慢，所以就直接切成長方形的模樣出售。其後有外國傳教士將此糖果流傳至西方，始成為外國至受歡迎的糖果之一。

孰真孰假，難以定斷，總之，依家嘅紐結糖就百花齊放，花樣百出。

講番食友所贈嘅澳門老牌車厘哥夫紐結糖，喺低糖產品，一包4粒，成份有液體葡萄糖、花生、砂糖、牛油、奶粉、蛋白，外形較為巗巉，色澤偏白。食味方面，質感硬脆，但內裡花生多有咬口，奶味不俗，而且確喺少甜，作為零食，眨吓眼就食晒！

餘下品牌嘅紐結糖，請另睇其他食評，連結如下：

聯朋結糖（二）：http://garycwm.blogspot.hk/2013/09/blog-post_19.html
聯朋結糖（三）：http://garycwm.blogspot.hk/2013/11/abc.html
聯朋結糖（四）：http://garycwm.blogspot.hk/2013/11/door-door-bakery.html

個人評分
味道：8/10
環境：7/10
服務：7/10
抵食：8/10
平均每人消費：HK$0（禮物）

餐廳資料：
老牌車厘哥夫
澳門氹仔舊城區官也街31號
(853) 2882 7662