2013年9月5日星期四

曼谷泰菜 Bangkok Thai Restaurant:曼有引力

數月前曾同幾位食友嚟曼谷泰菜試食,深覺水準不俗,傳統泰菜做得有板有眼,新創菜式亦有驚喜,難得泰藉廚師功夫紮實,但又唔守舊。之後,有朋友問過食泰菜有無好介紹,當然入九龍城有大把選擇,不過老友想港島區,又想就腳,就再次想起曼谷泰菜。

今次人少少,就無謂坐房咁大陣象嘞,雖然晌外面大廳,但一樣坐得舒服,摩登嘅裝修,以少少泰式擺設作為點綴,感覺唔會太滿天神佛,又不失點點泰式風情!侍應有泰藉,亦有本地人,所以唔怕落單溝通有困難!
 bowl香茅薑蜜(凍或熱) $38
先嚟一杯熱香茅薑蜜,喺店方嘅自家製作,亮點喺天然掛帥,少甜而帶有香茅清香,薑味添加出丁點辛辣,應該喺驅風「良葯」,哈哈!
bowl泰式蝦片 $15 
蝦片新鮮即炸,上次嚟食時人多真喺一籃唔夠喉,不過,今次人少啲一籃已可止止牙痕,跟上次一樣香脆可口帶點鹹蝦味。依家仲有埋外賣裝,真喺合晒心意呀!
 堂食泰式蝦片
 外賣裝泰式蝦片
bowl冬蔭公湯 $88(2位用)$168(4位用)$218(6-8位用)
雖然湯類有成6款,如酸辣椰汁雞湯、泰式魚肚羹都幾有特色,不過友人鍾情於冬蔭公,上次試過都知有水準,所以我又唔介紹飲多次喎。紅紅嘅冬蔭公湯,入口絕對酸香醒胃,重重嘅泰式香料,香茅、南薑、檸檬葉……等等,令味道複雜有層次,大頭蝦啖啖肉,鮮香好食。友人果真好鍾意冬蔭公湯,連添幾碗,相信佢都飲得好滿足。
 bowl泰式生蝦刺身 $98
一客8隻生蝦賣$98,其實都幾抵食,泰式生蝦最好趁凍食,攤暖咗就口感會差咗截。生蝦夾埋塊蒜片,沾點特製辣汁,食落蝦肉鮮甜爽口,如怕辣嘅加埋塊薄荷葉一齊食,可緩和一下辣度。
bowl荔枝蝦球 $88 
專燈推介俾友人,真喺值得一試再試嘅菜式,上次嚟喺新出菜式,純為試菜,所以價錢待定,依家知道定價$88,唔貴喎。原粒荔枝包住去殼鮮蝦酥炸,外層酥脆甘香,荔枝清甜多汁,蝦肉彈牙鮮甜,配搭合宜,依然值得推介!
bowl甜酸豬軟骨 $92
雖然似乎比較大路嘅小菜,但豬軟骨肉質鬆化,軟骨位有咬口,甜酸醬都做得甜酸有緻,但唔算好特別嘅菜式,所以唔需要刻意去試,除非你本人好喜歡食豬軟骨。
bowl黃咖喱牛腩煲 $98
食泰菜總鍾意點個咖喱,再加啲蒜蓉包一齊食。黃咖喱牛腩煲,牛腩大大舊認真貨真價實,兼且軟腍鬆化,而黃咖喱入口辣味溫和,帶濃濃椰香,實屬不俗。沾滿咖喱汁嘅蒜蓉包,有咖喱香,又有蒜蓉香,個法包又烘得脆,有啲百吃不厭嘅感覺呀。順帶一提,焗蒜蓉包另計,$33 / 5件。
bowl泰式海南雞 $138(半隻)$238(全隻)
新加坡嘅海南雞食過好幾次,但泰式嘅就少接觸,個人覺得最明顯分別喺新加坡嘅就伴黑豉油、辣椒醬及薑蓉,而泰式嘅就簡單一啲只有一款泰式醬汁,鹹鹹酸酸。雞隻望落皮光肉滑,望真啲皮薄肉厚,但柔軟嫩滑,而且去咗骨,方便食用,仲有入口帶點點香茅及薑味,相信喺跟新加坡海南雞嘅另一個分別。
bowl泰式鹹肉椰菜苗 $78
泰式鹹肉有啲似我哋廣東人食嘅燒肉,試過又唔會覺得好有特色咁,但鹹香惹味,而椰菜苗炒得非常爽脆,配搭埋啲鹹肉,喜歡重口味嘅人會幾鍾意。
bowl香芒椰汁糯米飯 $52.椰汁木薯 $48
個香芒椰汁糯米飯跟上次嘅造型唔一樣,睇埋其他食家嘅食評,真喺次次新款,不過,都離不開芒果、椰汁同糯米飯。糯米飯用上紫糯米溝白糯米,前者煙韌,後者軟糯,淋上濃濃椰漿,實在好味,而芒果砌出玫瑰花形,賞心悅目,再者呂宋芒確實蜜香清甜,令極個甜品更得我心。至於椰汁木薯,口感粉粉,同樣沾滿椰漿,椰香在口腔內游轉。兩款美味甜品下肚,亦為今餐有個美滿完結。
九龍城確實有好多高質泰菜館,但對某啲人嚟講,尤其港島人,交通上始終唔多方便。前後兩次嚐過「曼谷泰菜」嘅手勢,覺得水準保持到,加上價格合理,招呼服務都稱心,依啲可能就喺佢嘅吸引力吧!

個人評分
味道:8/10
環境:7/10
服務:8/10
抵食:8/10
平均每人消費:HK$200

餐廳資料:
曼谷泰菜 Bangkok Thai Restaurant
灣仔駱克道42-50號君悅居2樓
3102 1618

沒有留言:

發佈留言