丹麥餅店：熱狗情懷

屹立銅鑼灣嘉路連山道逾40多年嘅老舖「丹麥餅店」，因店舖早前以7,800萬元易手，而據報紙報導，該鋪位市值月租達12萬元，相對依家丹麥老細只喺交緊5萬多元月租，新業主又豈會唔蠢蠢欲動加租呢？雖然店舖晌易手前已跟舊業主續租，短期無乜加價壓力，但租期餘下年半左近，時間好快過，老細表明，如將來加租，不排除考慮加價，相信到時都有唔少街坊、市民支持。搬鋪可能喺另一條出路，所以小弟真喺好佩服七十多歲嘅老細，無打算執咗佢就算，早早作出兩手準備，晌對岸尖沙咀厚福街開分店，一來唔知舊鋪將來加租加成點，萬一舊鋪真喺頂唔住都有間新店作後著，二來晌另一區開新店亦可試試水溫，睇吓「丹麥餅店」個老招牌吸引力如何，還是只喺得街坊生意！

這晚出開尖沙咀，又無飯開，所以過嚟丹麥餅店支持吓。印象中記得晌厚福街，小弟對尖沙咀都算熟啦，點解行勻都唔見，前後再兜多一轉。好彩見到有個哥仔邊行邊食住條熱狗，晌厚福街尾轉入條巷仔走出嚟，否則就錯過咗。丹麥新店鋪位細細，鋪後喺廚房，鋪面已經變成水吧，客人落完單就要晌鋪前巷仔等候。而所有食物，就印備晒晌鋪面右側嘅膠海報上。

 鋪位細細，一眼睇晒！ 

 膠海報列明所以出品及價錢

外賣包裝得企企理理

炸洋蔥圈 $15
由於即叫即炸，所以等候需時，不過保證到手新鮮熱辣。即場試食一件，甘香鬆脆，拎到返屋企，都仲OK，而洋蔥切得頗粗身，所以炸出嚟嘅洋蔥圈幾大件，唯一問題就喺有啲鹹，應該喺粉漿出問題吧。

港式熱狗（單腸） $12

熱狗腸就晌鋪面右邊不斷烤烘，有單就即翻烘熱狗包，塗上牛油加香腸就成，而想加茄醬定芥辣，就晌鋪前自行取用就得喇。雖然熱狗無咩驚天味道，但依舊有種港式快餐嘅古舊風味，有時老鋪就喺想食番依種古早情懷。

 自助嘅茄醬及芥辣 

熱咖啡 $11

色澤較為深沉，但咖啡幽香依然，配上黑白淡奶，雖則未至於滑如絲，起碼都唔會叫人失望。

雖然小弟對丹麥餅店無乜集體回憶，更談唔上有咩感情，不過老鋪總有其存在價值，執一間就少一間，故此都希望「丹麥」能永遠長存！

個人評分
味道：7/10
環境：6/10
服務：8/10
抵食：7/10
平均每人消費：HK$38

餐廳資料：

丹麥餅店
尖沙咀厚福街7A號C舖
2722 1133