2013年7月4日星期四

龍苑中菜廳 Loong Yuen Cantonese Restaurant:與龍共舞.新嚐杭菜

金域假日酒店嘅Bistro on the MileDelicatessen Corner(假日美食店)都曾於多年前幫襯過,感覺都非常之好,今次有幸一試酒店嘅中菜廳「龍苑」,實在多謝公關哥哥及酒店方面嘅邀請,未知中菜水準又如何?觀乎之前嘅網上食評,都喺評價不俗,所以,殷切期待呀!
經過門口嘅「酒櫃屏風」就進入店子內廳,裝修時尚簡約,又不失中式雅氣,原來前年先至裝修過,內廳除有不同大細嘅圓枱,旁邊亦設有4人卡位,適合不同需要嘅人士。唔講真喺唔知,原來新裝修採用傳統四合院嘅風格嚟設計,宴會廳、貴賓廳、廚房設於餐廳三面,正正圍繞著內廳而形成一個庭院格局。酒店方面亦都細心安排,為我哋預備咗貴賓房,唔單止更舒適寧靜,晌咁優雅環境下「相機先食」再誇張啲都唔怕太礙眼,騷擾唔到其他食客更少份負擔!哈哈!
 正門後嘅內廳,簡約雅緻!
 內廳旁邊嘅4人卡位
貴賓房之一,自成一角,私隱度高。
主打粵菜嘅龍苑,原來都已經開業咗30多年,能晌尖沙咀區屹立咁耐,水準自然夠晒紮實。加上有新上任嘅中菜行政總廚陳永昌師傅壓陣,憑其30多年嘅酒店中菜經驗,20多年嘅行政總廚煉歷,以及對粵菜嘅熱誠,質素更有保證,所以,今晚除咗一試多款龍苑嘅招牌菜式之外,更先試為快晌七月特別呈獻嘅「杭州佳餚」(暫訂供應期至31/7)。需知杭州菜源遠流長,揉合咗寧波菜、滬菜特色,以配搭簡單嘅原材料同調味料製成,手勢精工,更成為中國八大新菜系之一,甚具特色!
 bowl糯米酥藕 $80
既然新嚐杭菜,首發嘅自不然喺杭州系前菜,其實今次推廣都有唔少杭州前菜,如杭城滷鴨、油燘春芛、如意蛋卷、西湖燻魚……等等,但店家揀嚟喺做工精細嘅糯米酥藕。入口清涼、帶有桂花糖香嘅蓮藕薄片,內裡釀入糯米,食起嚟糖化後嘅藕片帶點煙韌,但清甜幽香,而糯米黏糯柔綿,頗有驚喜嘅前菜。
bowl玉皇山嚮鈴 $128
第二道上場同為杭州特式菜嘅玉皇山嚮鈴,晌餐牌中列為熱菜,不過小弟就覺得似前菜多啲,如講開熱菜,出名嘅如西湖醋魚卷、龍井蝦仁、蝦爆鱔背……一樣有供應。據陳師傅講由於採用杭州四鄉腐皮製作,所以豆味極香,又唔油膩,而且「咔嚓」應聲碎開,口感超鬆脆,醺點茄汁更有不錯效果添!
bowl椒鹽豆腐粒 $70
第三道前菜嚟個惹味甘香嘅椒鹽豆腐粒,豆腐粒一口一粒,加上外皮既薄且脆,豆腐滑嫩非常,辣味唔太重,反而灑咗啲金蒜,感覺更香。伴有淮鹽及喼汁,小弟就至愛「椒鹽」配「喼汁」,鹹香中有點酸味作平衡,尤其酥炸之物,喼汁更好使好用。不得不提,載豆腐粒嘅喺印度胡椒餅,喺樓上酒店自助餐印度廚師嘅手作仔,超薄超脆,食得唔好嘥呀!
bowl紅酒燴牛尾配花卷 $290
雖然龍苑喺賣粵菜,但依道紅酒燴牛尾做法就較西式喇,席間陳師傅稍稍休息跟我哋互相交流,查實就喺我哋學嘢時間。原來,一道紅酒燴牛尾要花上兩日功夫,先要將牛尾清膏去脂,一大條牛尾得返半條左近,再撈麵份入爐先燒後烚,再下配料、調味煲佢3小時,焗一晚,第二日再煮汁,個汁又唔可以煮太耐,紅酒揮發晒就無酒香,得果酸味,所以真喺成擔功夫,平均每晚都只喺限售6份咋。端上枱香氣四溢,牛尾極之入味,肉味濃郁,肉質又腍又鬆化,好易離骨,連配料如甘筍同樣好食,滿滿酒香。配以花卷仔蘸紅酒汁同食,相信撈飯亦都一流,原來又可以跟天使麵添,真喺鬼馬。依道菜阿陳師傅話仲有個變奏版,就喺拆肉跟薄餅,認真多變呀。
bowl龍苑炸子雞 $160(半隻)/ $300(全隻)
炸子雞好多中菜館都有做,不過已極少好似龍苑咁跟七彩蝦片上,咁懷舊風味,陳師傅話以前跟開炸藕片,不過有啲老客仔要求,做得咪做囉,最緊要大家鍾意,咁又喺,我哋同枱嘅各位都為啲蝦片而興奮。炸子雞做得皮脆肉嫰,功夫果真紮實,而雞隻皮下脂肪又少,選材已睇出心機。
bowl摩利菌露筍竹笙卷 $140
屬廚師精選菜式嘅摩利菌露筍竹笙卷,賣相十分精緻,摩利菌、露筍、竹笙都喺口感清爽嘅素材,加上摩利菌(又名羊肚菌,捨國產貨$600 / kg,用上法國貨$2,000 / kg)有益腸胃、助消化、化痰理氣之效,絕對喺清淡健康嘅素菜菜式。摩利菌淡淡菌香,唔會太搶,雖多為西菜所用,但配露筍、竹笙感覺都幾清新。
bowl碧綠金沙蝦球 $270
份量十足,唔喺講啲蝦球好多,而喺蝦球實在好大隻,誇張少少真喺有小弟半個拳頭咁大。蝦球沾滿鹹蛋黃,外觀金碧輝煌,佐以西蘭花伴碟,賣相頗搶眼。蝦肉質感爽彈,而且蝦味鮮濃,配合鹹蛋黃嘅惹味,真喺色香味全。
bowl豆酥星斑 $320
豆酥星斑喺今晚所試嘅另一道杭州菜,不過「豆酥」依樣嘢據師傅講喺引自川菜,小弟印象上都喺第一次品嚐,原來豆酥同樣製作繁複,主要材料為黃豆,經烚、風乾、再炸、要搓、又剷……,唔喺繁,喺煩囉!豆酥味道鹹鹹哋,但又脆又香,幾得意,仲有可辣可唔辣;至於條星斑,蒸得恰好,肉質非常細嫩,好鮮味,佐以少少豆酥同食,鹹香中魚變得更鮮味。
bowl原個菠蘿咕嚕肉 $140
小弟都喺第一次見咕嚕肉以原個菠蘿上,店家就喺相強調做咕嚕肉所用嘅就喺原個嘅新鮮菠蘿肉,相中為雙份嘅原個菠蘿咕嚕肉,切勿誤會百零蚊有咁大份咕嚕肉啊!除咗新鮮菠蘿肉,仲有蕎頭、子薑,味道令人感覺酸甜開胃,加上紅椒、青椒,令賣相更色彩繽紛。咕嚕肉做得不俗,炸漿唔厚,肉排多汁,真喺越食越滋味。
bowl吳山酥油餅 $48
帶有杭州風味嘅甜品有傳統製法嘅酒釀丸子,以及吳山酥油餅,店家為我哋準備咗後者。何謂「吳山」,實為杭州一座名山,滿山梯田,主要種植龍井,甚有特色,故此依道酥油餅做成外形如小山,一層層如梯田,造型精巧,非常討好。酥油餅入口好鬆化,又帶有重重麵粉香,因為加入咗金華火腿茸及蔥,所以味道甜中帶鹹,又有點點蔥香,甜鹹甜鹹好有個性。
一道甜品又豈能滿足我哋一班饞嘴嘅甜鬼,餐廳另備有名為「春令滋潤甘露」嘅甜品餐牌,4款甜品包括:燕窩椰皇燉北海道3.6牛乳、陳皮燉香梨、木桶薑汁有機豆腐花及香芒楊枝甘露,如此滋潤美點,應能滋潤窩心。
bowl木桶薑汁有機豆腐花 $78
一份夠晒二人分享,原木桶上,即點即撞,所以豆腐花份外嫩滑,淡淡豆香外,薑味亦夠明顯,採用有機黃豆,感覺更有營。
bowl陳皮燉香梨 $68
潤肺化痰嘅陳皮燉香梨,梨香自然,果肉微爽,滲出幽幽陳皮甘香,淨食可能會覺得有點寡,不過下點糖漿,倍感清潤甜蜜。
bowl馬蹄沙 $30
馬蹄沙喺上述餐牌以外,店方特意介紹嘅懷舊甜品,依家坊間都較少見,仲記得以前細個,一到夏天街邊小販檔就會有馬蹄露賣,清甜冰凍,感覺好正。今日食番依個馬蹄沙,細個回憶多少都返咗嚟,而且一樣好正,馬蹄粒幼細清甜,蛋花細緻,又加入蘆薈粒,增加口感,仲下咗少少鮮檸汁,雖然唔重,但有畫龍點睛之效,真想添食呀!
雖然此行目的喺新嚐杭州特色菜,但店家嘅招牌菜又豈能錯過,故此仲有部份類別杭州菜未有機會一試,如湯羮類(「雞火蒓菜湯」、「四寶斬魚丸」……)及杭州自家麵食(「杭城三絲炒拉麵」、「蝦爆鱔麵」……),但已令一眾食友非常滿足。此段推廣期間,逢週五晚(7:00pm8:00pm)更加插廚師即場拉麵表演,不單舌尖,連眼晴都有一份好享受。再次多謝公關嘅安排,以及餐廳嘅款待,讓我哋歡聚在龍苑,喜嚐於杭菜!

個人評分
味道:9/10
環境:8/10
服務:9/10
抵食:9/10
平均每人消費:HK$0(試食邀請)

餐廳資料:
龍苑中菜廳  Loong Yuen Cantonese Restaurant
尖沙咀彌敦道50號金域假日酒店低層1樓
2315 1006

1 則留言:

  1. Dear Blogger,

    We are the PR company and would like to invite to join

    預告片﹕http://www.youtube.com/watch?v=Jyv1hcMDM2Q

    微電影在29/7有分享會,火火導演同泥鯭會分享拍攝心情等事,

    日期:29/7/2013

    時間:1530-1630

    地點:Backstage Live Restaurant

    地址:1/F.,Somptueux Central中環威靈頓街52號

    出席嘉賓:火火/泥鯭/稻香代表

    主持:李漫芬(TVB)

    Gift: 稻香精美月餅一盒!

    名額10個, 有興趣可發email: henry@zoapcon.com or 90419925 聯繫

    http://blog.qooza.hk/fcxvvt03?eid=26597673

    回覆刪除