完熟Classic心太軟（軟心朱古力）$46依個心太軟屬店內Valrhona朱古力甜品系列之一，一般街外食到嘅心太軟都喺伴個雪糕球加幾片生果，甜牙牙個心太軟就大堆頭啲，士多啤梨粒、桃粒、果仁碎、薄脆及朱古力威化卷，色彩繽紛。當一刀切開，會發覺朱古力漿緩緩流出，有別一般好澎湃咁瀉出嚟，其實店家刻意用上「完熟」二字已有啲天機，再括住「軟心朱古力」，而棄用「流心」一詞，都應該明白店家用意。據店主講，為使大家感受唔同層次嘅朱古力香味，晌度食到嘅心太軟無用到半生熟嘅麵粉漿，反而喺完熟嘅朱古力，保證真材實料。唔明？等小弟解釋吓，整過心太軟嘅人都知，基本上未焗之前嘅心太軟喺一啲朱古力麵粉漿，藉著時間嘅控制，達到外層熟透成為糕身，內裡仲未熟得透而成為半溶嘅朱古力漿，仲記得嗰時工聯會阿sir教落，雪一雪先焗，裡面仲容易成為唔會熟透嘅朱古力漿添。雖然喺軟心，唔喺流心，但用上85%Valrhona做外層，55%Valrhona做餅心，朱古力味果然濃郁強勁，雲呢嗱雪糕及配料都已經成為其次，不過，仍有一點希望店方留意，條朱古力威化卷入口腍晒，實屬美中不足呀！溫馨提示，製作需時，要耐心等候十分鐘左右。
芭娜娜提拉米蘇窩夫（內置芭娜娜及Tiramisu芝士）$56窩夫一向都挺鍾意，有時自助餐見有窩夫機都會臨尾自家制一份窩夫伴生果、雪糕。窩夫系列中店方預備咗芭娜娜提拉米蘇窩夫，芭娜娜即喺香蕉英文個諧音，但提拉米蘇部份就有個嶄新嘅組合，而且個賣相好有立體感。一邊喺原味窩夫層層疊，上面加上馬卡風芝士漿，再糝谷古粉，雖然窩夫屬密籠厚身，脆口度差啲啲，但好有蛋香味，而馬卡風芝士嘅特性就喺芝士味唔會好濃，但口感柔軟清甜；另一邊廂喺一層夾一層嘅手指餅配馬卡風芝士漿，面面放有一件焦糖香蕉，如果側旁伴碟嘅香蕉都焦糖埋就仲正，依部份都一樣好食，浸過咖啡酒嘅手指餅微微濕潤，配以香蕉、芝士漿，口感層次豐富！喺今日小弟嘅心水推介之一。
芭娜娜提拉米蘇Pancake（內置芭娜娜及Tiramisu芝士）$49輪到班戟系列出場，7款班戟試了其中2款，分別喺芭娜娜提拉米蘇Pancake及蕉蕉芭娜娜Pancake。而依個芭娜娜提拉米蘇Pancake跟上面所試嘅窩夫可謂有點異曲同工，以班戟取代窩夫而矣，另外就加咗好多杏仁片。唔鍾意窩夫嘅人，不妨考慮依個班戟，厚厚上下兩層嘅班戟皮夾滿香蕉果肉同馬卡風芝士漿，果肉夠熟夠甜，食得實在。
蕉蕉芭娜娜Pancake（內置Caramel芭娜娜）$42齋香蕉班戟又如何？正如一般鮮果班戟，班戟皮+香蕉+鮮忌廉+杏仁片+糖漿嘅傳統方程式，無咩鬼馬嘢搞，最多視乎你揀咗士多啤梨、菠蘿、芒果定香橙。店方強調班戟會選用日本低筋麵粉配合有機蜜糖做成，仲要蛋白、蛋黃分開處理達至班戟做得鬆軟，真喺頗有誠意。確實，班戟皮做得幾鬆軟，內裡嘅焦糖香蕉配合埋柔滑嘅忌廉，真喺唔錯！
流心芒果粒粒布丁 $40流心布丁系列一共有4款，款款都有心思，先試喺流心芒果粒粒布丁。雖然以芒果汁畫咗啲花瓣形，但睇件布丁做得唔夠平滑，少少巖巉，影響咗少少賣相。不過，講到內涵就真材實料到極，一切開內裡100%嘅純芒果汁嘭嘭聲流晒出嚟，差啲影唔徹相呀，「流心」一詞所言非虛；而整件布丁，佈滿芒果粒粒，又多又大粒又甜，布丁本身亦都軟滑，加上店主話布丁喺完熟，唔會用上生雞蛋，所以讓客人食得較安心。芒果迷都應該唔會錯過吧！
荔枝流心布丁 $40荔枝布丁本身已經較少有，而做埋流心布丁就更有驚喜，亦喺小弟是日第二個心水推介。推介在於驚喜，荔枝味布丁好清甜，流心嘅荔枝汁亦都令人嗒落好清爽，內裡嘅粒粒荔枝果肉，令整個布丁無論香味、口感更添豐富，夏天食起嚟更讓人覺得清新怡人。周邊撒下嘅桂花碎，甚有畫龍點睛之效，令清甜嘅荔枝帶有點點桂花香，確實有趣。初時以為布丁之上喺一球雲呢嗱雪糕，原來喺荔枝雪芭，真喺驚喜處處。
薑汁梳乎里（雲呢拿）$40薑汁梳乎里屬餐牌中嘅特色甜品類，當中仲有芒果腸粉、法式蘋果撻、金寶蘋果批、楊枝甘露……等等共11款，喺因為歸納唔到某一大系列，就統稱為特色甜品類。以雲呢拿梳乎里配薑汁（小杯），初嚟到個梳乎里夠挺夠鬆，不過我哋掛住猛影相，影到佢塌晒都未起動，哈哈！單睇賣相外型絕對不俗，表面烘得金黃，入口又如何？食嚟頗鬆軟，薑味都算OK，不過小弟唔多鍾意依個做法，薑汁溶入梳乎里一次過拎去焗，總好過之後再溝落去！溫馨提示，因梳乎里即叫叫做，需時15分鐘左右，要留心！
Baileys併黑糯米配北海道3.6奶凍 $46醉心系列喺指加上Baileys或Marsala帶酒精成份嘅甜品，依款黑糯米配北海道3.6奶凍跟餐牌相有好多差別，最初仲以為嚟錯。奶凍用咗北海道3.6牛乳做成，確喺幾滑幾重奶香，不過，何解黑糯米無咗，換嚟喺脆珍珠，上面又私人醒咗好多栗米薄脆。因為一晌都唔好酒，所以側跟小杯嘅Baileys（威士忌+牛奶+朱古力）無乜點加落個奶凍度。
Baileys併脆珍珠配北海道3.6奶凍 $46今回個奶凍改用莫卡咖啡味，依然挺身軟滑富奶香，更多一朕輕柔嘅朱古力咖啡香，更合小弟心意呀。脆珍珠咬落幾過癮，脆卜卜，不過，依然無加到Baileys酒同食。但喺都有單單就咁試少少Baileys，酒精度感覺唔高，似飲緊有酒味嘅朱古力奶囉！
宇治金時雪糕砂冰（紅豆綠茶）$32除甜品，甜牙牙都有好多飲品選擇，最吸引當然喺一列特色飲品，所以，就算唔嚟食甜品，飲吓嘢消吓暑都唔錯喎。小弟揀嘅喺編號R3嘅宇治金時雪糕砂冰，其實佢所有甜品及飲品都有個編號，嗌編號落單就可以減少叫錯。個砂冰夠晒冰凍，出面有幾火爐，一啖就已經透心涼，砂冰本身嘅綠茶味已經唔弱，加埋個綠茶雪糕（餐牌張相喺雲呢嗱雪糕嚟），正！杯底沈澱咗好多紅豆，上面又有好多涼粉，真喺爽呀！
當日因材料及入單問題，未能試到Valrhona朱古力木糠布丁批及阿拉斯加火焰雪山，實在有點點可惜，不過，葵芳店離小弟家咁近，總有再拜訪嘅日子！
個人評分
味道：8/10
環境：8/10
服務：8/10
抵食：8/10
平均每人消費：HK$0（試食活動）
餐廳資料：
甜牙牙 Sweet Tooth
葵芳興芳路223號新都會廣場地下167號鋪
2750 1771
沒有留言:
發佈留言