Palace Café：好友狂嚐曲（五）

一連試咗幾款曲奇，有咖啡店出品、有麵包店出品、亦有餅店出品，但點講都好，都屬於本土製作。今次嚐到食友嘅曲奇小禮物，則喺「來路貨」，仲要嚟自法蘭西，品牌名字叫La Sablésienne，我估都唔喺太多人識，如果有興趣了解吓佢，不妨登入以下網址：www.sablesienne.com。此產品晌中環嘅Palace Cafe有寄售，除此之外，仲有其他公平貿易嘅產品賣，有興趣可以去逛一逛！

La Sablésienne嘅產品，據官方網站介紹，焦點在於選材都用上最好、最優質嘅，冀望帶出最自然及最有風味，故此，所有產品都喺無化學成份、無防腐劑、無人造色素。此外，睇到盒面個「AB」認證（agriculture biologique），上網查一查，原來叫「有機農業」（又稱有機農法或有機耕種），主要嘅精神喺屏除基因改良嘅種子、農藥、化學肥料、基因改造作物、植物生長調節劑等非天然物質嘅使用。有機農業方法晌國際上有監管組織，並在法律上於多個國家推行；而其內容好大程度喺基於國際有機農業運動組織（IFOAM），一個晌1972年成立，由世界各地有機農業組織合組而成嘅國際組織（摘自維基百科）。所以，品質應有一定嘅保證！

題外話講多咗，言歸正傳，講番盒曲奇。盒內有兩小包曲奇，每小包內共有3塊朱古力味曲奇，每塊大概都有直徑5厘米右，所以都算幾大塊吓。質感雖然唔算好鬆脆，但朱古力味就非常濃郁突出，曲奇內仲有啲朱古力粒粒。既喺認證產品，又喺來自外國，所以每包零售價唔平，所以支持有機，當然要比平常付出多少少啦！

個人評分
味道：7/10
環境：8/10
服務：8/10
抵食：5/10
平均每人消費：HK$0（禮物）

餐廳資料：
Palace Café
中環港景街1號國際金融中心商場二期1樓
2167 7321