山區裡的走走趯趯: 新星海鮮酒家 New Star Seafood Restaurant：俏俏新升

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2013年6月15日星期六

新星海鮮酒家 New Star Seafood Restaurant：俏俏新升

又喺幾個月一聚嘅死佬飯局，本來今次有提議大搞，拉隊入屯門三聖邨或清水灣布袋澳食海鮮，但人多難就期，約嚟約去，都無一個日子夾到，而「民意」又想齊晒人先搞，所以，死佬海鮮飯局就拖住先。繼而先搞個小飯局聚一聚，人數不設下限，嚟得幾多就幾多人，結果都有成11人，查實都只差兩位死佬嚟唔到。地點費事諗，反正唔志在食，志在出嚟呻吓依樣、呻吓嗰樣，所以揀番我哋嘅火鍋飯堂「新星」！

依次被安排坐大堂尾，最好啦，我哋一班麻甩佬講嘢鬼剎咁嘈。因為就番啲晏收工嘅人，所以多數揀9:00pm後無時限任飲任食，成人依舊收$88位，但湯底、醬油、檯上小食另計，仲有就要加一。無加價，但俏俏新升咗啲乜呢？就喺個醬油錢，以前喺數款醬油收$10 / $20碟，依家就改為人頭費$10位，由店員捧個醬油盆過嚟，6款醬油料（香茜、蒜蓉、辣椒、麻醬、沙嗲醬、豆板醬）隨意撈，相比起以前，醬料費會俾多咗！

湯底依舊都喺嗰12款，價錢都無變：粟米銀蘿豬軟骨（$68）、花彫醉雞（$88）、香茜皮蛋馬蹄（$55）、蕃茄薯仔粟米（$58）、沙嗲（$60）、香茜皮蛋拼沙嗲（$68）、有機田園（$58）、滋補羊腩（$98）、枝竹鯇魚（$78）、海鮮豆腐（$78）、胡椒豬肚（$65）及鴛鴦（$58），各式其式，平平哋揀咗胡椒豬肚湯底同鴛鴦湯底，原來對上一次嚟又喺揀依兩款。

胡椒豬肚湯底 $65

一大鍋胡椒豬肚湯，都幾重胡椒香，枝竹及鹹酸菜唔少，豬肚亦都幾爽口。

鴛鴦湯底 $58

鴛鴦就喺清湯搭沙嗲，前者只喺清雞湯加啲黃芽白，後者則幾香沙嗲味。

雖然話任食，不過都唔喺所有嘢任食，點菜紙上截有堆火鍋配料喺收費散叫，如特級肥牛粒、手打芝心肉丸、帶子片、日本廣島蠔、翡翠蟹籽墨魚滑……等等。不過，任食嘅火鍋配料亦唔少，足64款選擇，當中亦有唔少好嘢，如海蝦、鮮滑牛肉、羊肉片、鮮滑雞片、鮮魷、新鮮魚雲、魚滑、牛筋丸、香菇貢丸……等等。

我哋前後叫咗4盆嘢，新星唔會逐樣配料一份份咁上，而喺一張單執埋一大碟咁上（偶有都會散件上），望落感覺確喺幾好睇；經驗所知佢哋通常按人頭大概咁執，所以你填多少份都改變唔到入面大廚執多少，此外，甩漏少少就預咗。新星嘅任食火鍋都幾旺場，頭輪好爆，食9:00pm後雖然可以食到作哋收工，而且又平啲；但另一個風險就喺賣晒貨，好似我哋食咗一輪鮮蝦，再點已經話賣晒。