2013年5月12日星期日

夏麵館 Xia Mian Guan:下面管不好,出菜無牌章!

走嚟夏麵館食晏算喺有啲摸錯,事緣睇見信用卡有啲優惠,點3份午餐獲贈美食一款,又唔見佢條款有講明只適用星期一至五,點知原來星期六、日及公眾假期喺無午餐供應,咁即喺無嘢送啦!但既然嚟到,一切隨遇而安算啦。

一踏入門口,兩旁木架放有好多「夏麵館」大碗,又用上好多通花木窗做間隔,木枱襯酸枝小木椅,細上又掛咗啲彩色水墨畫,感覺幾雅緻。餐廳正中間一列梳化4人卡位,應該喺最好坐嘅位置,不過較特別喺餐廳最右靠牆一排半開放式廂房,有啲自成一角嘅感覺。
但服務好一般,啲侍應唔太醒目,斟茶又倒瀉水,最唔鍾意喺試菜嘅次序亂咁嚟,既然個套餐分咗前菜、湯羹、小菜、炒麵 / 年糕及甜品,第一樣送上喺個湯羹,都無緊要,但跟住送嚟喺個年糕,點都唔多好;若非落單時要求個甜品叫先起,恐怕晨咁早上埋個甜品都唔出奇。而下面寫個別菜式嘅評價時,個先後就喺當日出菜嘅次序。此外,上菜嘅節奏太快喇,佢啲枱又唔特別大張,一陣間就堆到滿枱都喺嘢食,有啲唔方便!
翻翻餐牌,由前菜、點心、湯羹、拌麵、兩麵黃、湯麵、煨麵、小菜、飯、年糕,以至甜品,都幾多種類選擇。一向套餐都會實惠啲,所以見佢有2、3、4人套餐,再計吓度吓,又確喺抵啲,雖然我哋一行4人(小弟、老婆、舅仔及未來弟婦,佢哋幾個都唔喺大食之人),但睇佢個3人套餐都幾豐富,包2款前菜、1款湯羹、3款小菜、1份炒麵或湯年糕,仲有1客甜品,原價$348,依家有八折收$272,另收加一服務費,再加多客小籠包(舅仔例點嘅上海點心),實夠晒我哋食。下面嘅單價抄埋出嚟,喺方便大家參考,其實計過一次,將下面套餐菜式嘅單價加埋晒,「面值」$340,即喺跟佢個套餐原價差唔多,所以若非八折價,根本套餐個價錢就等於散叫時嘅「成本價」。
bowl酸辣湯 $48
湯羹有兩個選擇,除酸辣湯,仲有冬雲豆腐羹,貪前者酸爽醒胃,所以要酸辣湯,個湯份量豈止3人呀,都幾大鍋,可滔出4-5碗。而且又幾足料,木耳絲、竹筍絲、冬菇絲、豆腐絲……,可惜酸辣度未夠強,辣多少少應該更好,猶幸個濃稠度啱啱好。
bowl津白肉絲湯年糕 $38
前菜、小菜乜都未食,第二道菜就喺依個湯年糕,套餐內嘅炒麵 / 年糕類同樣二揀一,另一個選擇喺金牌菜肉炒飯,老婆鍾意食年糕多過炒飯,所以揀咗湯年糕。咪睇佢咁大兜,年糕喱側煙韌,但得好少,絕大部份都喺津白,有少少大頭菜,肉絲都欠奉,湯頭普通,較為清淡。
 bowl夏伯伯涼拌茄子 $24
卒之上番個前菜,套餐包兩款前菜,其一喺夏伯伯涼拌茄子或香菇麵筋,另一款喺熱爆燻魚或雞絲粉皮。涼拌茄子做得頗出色,茄子軟腍,口感清涼,涼拌醬汁鹹甜有致,濃香惹味。
bowl干煸四季豆 $42
未上另一道前菜,先整碟小菜過你食,出菜次序實在夠晒亂。小菜(一):干煸四季豆或清炒 / 蒜蓉 / 上湯浸時菜,雖則同樣喺干煸四季豆,但唔喺常見嘅用欖菜,而喺蒜蓉辣椒炒,雖然同樣惹味,四季豆乾身爽口,但就有啲未及風味嘅感覺。
bowl回鍋肉 $52
小菜(二)有回鍋肉或賽螃蟹二選一,回鍋肉可算得上滬菜中表現出濃油赤醬嘅典範之一,惹味唔使多講,不過,嫌佢大部份都喺椰菜,豬肉少,且頗肥,竹筍亦落得手緊。唔知套餐關係,抑或散叫都喺咁?
bowl和合大排骨 $68
小菜(三)喺菜心獅子頭或和合大排骨嘅選擇,揀後者純因都想點番一樣香口嘢。和合大排骨就喺炸排骨配腐皮卷,估唔到都幾大碟,有6大件炸排骨,又有6件腐皮卷,兩者都炸得甘香,尤其腐皮卷,非常脆口,而排骨咬落鬆軟,最合意喺少油不膩!
bowl鮮肉小籠包 $28
今餐唯一嘅散點食物,賣相不俗,皮薄透湯,確實外皮十分之薄,夾起嚟都要小心翼翼。湯汁豐滿,一咬爆汁,味道鮮香,而鮮肉餡清鮮甜美,蘸點醋味道更鮮。
bowl熱爆燻魚 $42
遲嚟嘅前菜,但可算寶物沉歸底,簡單一個字:正!有別一般冷盤前菜,燻魚上枱帶微暖,以調味汁浸漬後油炸,雖然「燻魚」之名有啲取巧,但以味道而言,又真喺幾好食。肉質柔韌,但又啱會「乾睜睜」,醬油味鮮濃。
bowl高力豆沙 $26
做得大大球嘅高力豆沙,外層鬆軟有蛋香,而內裡填得豆沙滿滿,兼且清甜帶有朕朕桂花香,認真喺個意外驚喜。
總結一下,食物水準平穩不俗,尤其以上海菜嘅濃油赤醬本色,佢哋已算做得少鹽少油,又不失滬式風味;環境亦予人舒適,價錢亦算做大眾化,喺服務一環差啲,唔知喺上層管理,定喺下層本有心態,以服務性行業而言,喺一個要處理嘅問題嚟,希望佢哋可以改進一下啦。

個人評分
味道:7/10
環境:8/10
服務:5/10
抵食:7/10
平均每人消費:HK$83

餐廳資料:
夏麵館 Xia Mian Guan
荃灣大壩街4-30號荃灣廣場103 - 105號舖
3101 9090

沒有留言:

發佈留言