2013年5月17日星期五

百樂門宴會廳 Paramount Banquet Hall:我的星期六美孚早餐 ~ 輕鬆嘆茶

晌美孚有兩間百樂門,一間近荃灣線就地鐵上蓋嘅百樂門囍宴,另一間則近西鐵線嘅百樂門宴會廳,小弟由屋企行去,兩間都喺咁上下距離。不過,我就鍾意去後者多啲,因為基本上唔使等位,而且高樓底,環境比百樂門囍宴更闊落寬敞,至於食物水準,屋企人話百樂門囍宴好啲,我就覺得兩者差唔多。
眾所周知,百樂門都喺專做婚宴,所以個場都裝修得美輪美奐,酒樓正中間「主場」樓底超高,吊晒一連串巨型水晶燈,另一則位置又可間為獨立廂房,幾彈性。雖然位置俾人感覺有啲吊腳,但間唔時都真喺見人晌度擺婚宴。
是日,同老婆,拉埋舅仔落嚟輕鬆嘆茶,一餐頂兩餐,早餐+晏晝。先嚟5款點心,唔夠再叫!影低個「消費指南」俾大家參考,另收茶錢$8位,上枱小食又$8碟,加一服務費就更加喺指定動作啦。
啲點心又上得幾快,等十零分鐘,就近乎一次過上晒,OK,起動!
bowl香煎芋頭糕(優點)$10.8
第一碟嚟喺香煎蘿蔔糕,不過唔敢食,因為嚟錯呀!哈哈!我哋都怕喺自己剔錯,再問一問侍應喺嚟錯定剔錯,查番單喺佢哋錯,快手即換。芋頭糕都唔錯,芋頭幾粉香,糕身又唔太削,煎得都挺香脆。
bowl咸水角拼春卷(優點)$13.8
做人要有優點,嗌點心就要揀優點,午市都有少部分優惠美點,上述個香煎芋頭糕同依個咸水角拼春卷都喺。嗌點心炸嘢都喺唔少得,難得依款嘢一碟有齊咸水角、春卷兩款點心,各樣兩件。送上枱時都夠熱,咸水角有點黏牙,而春卷就好食啲,夠脆夠香。
bowl潮式蒸粉果(小點)$14.8
一籠3件,啱啱好我哋3個人分,唔使讓嚟讓去,外皮稍嫌厚,亦覺得沙葛切得太大粒。
bowl皮蛋瘦肉粥(大點)$24.8
1.大大碗,裝到滿;2.粥底綿;3.餡料多,皮蛋、瘦肉落得無手緊,絕對收貨啦。
bowl翡翠帶子腸(大點)$24.8
腸粉就好一般,腸粉皮拉得厚,口感唔夠滑,翡翠喺翠玉瓜,太少喇,睇外觀已見到翠玉瓜唔多,雖然帶子細細粒,但鋪得平勻,味道還可以喎。
bowl香芋煎薄罉(大點)$24.8
唔想叫炒粉飯麵,所以點個煎薄罉頂吓肚,雖然叫做香芋煎薄罉,但芋頭粒奇少,而且個薄罉煎得有啲燶。如果多啲蔥粒,又多番啲芋頭粒,理應會唔錯嘅。
幾個人慢慢食,嘆吓茶,傾吓偈,輕輕鬆鬆都算喺少少慢活!

個人評分
味道:7/10
環境:8/10
服務:8/10
抵食:8/10
平均每人消費:HK$50

餐廳資料:
百樂門宴會廳 Paramount Banquet Hall
美孚景荔徑8號盈暉臺盈暉家居城1樓126號舖
2328 8398

沒有留言:

發佈留言