Eden Rose Restaurant：意想不到再臨伊甸嚐晚宴

早前嚟過Eden Rose食晏，寫咗篇食評取名為「新推午餐更親民」。喜獲店家邀請嚟試晚餐，由於餐廳環境有氣派又不失格調，午餐定價親民，食物質素又高，所以本身對佢印象好唔錯，能再臨伊甸一試佢個晚餐，自然非常期待。有此機會，喜出望外之餘，實在有感榮幸。

環境方面晌度唔再累贅，因為上篇食評已有詳細介紹，只喺見到以前晌水吧位之下嘅絲絨梳化椅被移去挨住靠牆，但環境依然有情調，叫人坐得舒服。不過唯一有落差就喺個「街景」，因為之前嚟喺日頭景，對住偌大玻璃窗外嘅希慎，諗住夜景相信都幾璀璨迷人，原來又唔喺喎，哈哈！

之前所試嘅午餐，包沙律或餐湯，主菜6揀1，奉送冷熱飲品，另外可加$20享用是日甜品。今回要試嘅晚餐，顯然晌選項上複雜多少少，侍應拎著個ipad餐牌過嚟俾我哋碌上碌落睇睇。二人餐，包3款頭盤，餐湯3揀1，再嚟喺主菜1有意大利飯或墨汁意粉，而主菜2有燒白鱈魚、肉眼扒、黑毛豬嚟3揀1，結尾嘅甜品就3揀2，包埋啡茶，取價$898 + 10%，實在喺唔平，又睇睇跟質素喺咪對秤。若然唔使食到咁豐富，又或對二人餐個價有啲卻步，不妨散點，由頭盤、餐湯、小食、主菜、意大利飯或意粉、甜品……等等都有多項選擇。正當跟朋友躊躇揀咩好、試咩好之時，因為好多款菜式都甚感興趣，原來大廚已為我哋安排好晒，咁就省事得多喇，當中有部分喺二人餐內嘅菜式，有部分則喺散點菜式。

意大利香草蒜蓉包．蕃茄沙沙
例牌作為餐前小食，跟上次一樣，麵包鹹香鬆軟，蕃茄莎莎酸香鮮活，一濃一清，有心思嘅配搭！依然有添食嘅衝動，只因大廚已安排甚多菜式，不宜一早搏命，要留前鬥後嘛！

頭盤方面，二人餐包3款頭盤，包括：意式生牛肉伴雜菜沙律、慢煮三文魚伴配荷蘭汁（2客）、酥皮焗蟹肉盒（2客）。今晚所安排嘅喺生牛肉及蟹肉盒，另加原汁燴龍蝦雲吞3款頭盤。

意式生牛肉伴雜菜沙律（二人餐頭盤之一，無散叫，所以單價欠奉）
生牛肉足有9薄片，已加咗少少洋蔥、黑橄欖、巴馬臣芝士片提味，牛肉非常之薄，入口嫩滑有牛肉嘅原味，而味道又唔寡。仲配以乾蔥粒芥末汁，以試管冰鎮上，剎是有趣。此外，簡簡單單伴意大利黑醋火箭菜，甘苦嘅火箭菜經醇厚嘅黑醋調和，就變得不再簡單。

酥皮焗蟹肉盒（二人餐頭盤之一，散叫價$128）
第二道上場嘅頭盤喺酥皮焗蟹肉盒，二人餐會一人一客（即喺一件），遺留咗問佢哋散叫一客有幾多件。焗蟹肉盒賣相好小巧，以紙酥皮（或叫飛佬皮filo pastry）摺成「小盒」，口感極之脆，上面堆滿蟹肉，啖啖蟹鮮。碟邊一抹隱若嘅熱情果醬，無搶去主角嘅焦點，佐以蟹肉，味道變得更有層次，值得推介。

原汁燴龍蝦雲吞（散叫菜式，4件/ $88，6件/ $108）
第三道頭盤無揀到二人餐嘅慢煮三文魚配荷蘭汁，改以晌散點餐牌中出現嘅原汁燴龍蝦雲吞。意大利雲吞頗大件頭，雲吞皮喺自家製，帶點柔韌；而裡面嘅龍蝦肉，爽得嚟較實淨；雲吞上嘅魚籽淨食會偏鹹，但跟雲吞同食，就合拍晒。而整個菜最突出絕對喺個「原汁」，濃厚鮮香，龍蝦香味澎湃呀，正！

無論二人餐又好，散叫又好，都喺有3款湯作選擇，包括是日餐湯、黑松露菌忌廉湯及龍蝦湯，是日餐湯只喺什菜湯，自不然比下去，黑松露菌忌廉湯及龍蝦湯當然成為首選。

黑松露菌忌廉湯（散叫價$68）
湯面點點黑黑可以話其貌不揚，但幽幽菌香撲鼻，香濃得緊要，湯面仲要放多撮黑松露醬，用料一啲唔手軟，飲落口內仲有朕餘韻。一般做野菌忌廉湯，菇菌都會打到細碎淨盡，但Eden嘅出品卻刻意保留大量菌粒，雖然少份幼滑，但口感不錯，倒有種食粥嘅感覺，哈哈！

龍蝦湯（散叫價$78）
以龍蝦殼先經烤焗至拎去熬湯，龍蝦味未飲已甚為突出，呷一口誇張啲講真喺蝦味跳躍鮮活，加上質感柔滑，實屬水準之作。唯可惜出現偏鹹情況，已即時跟經理反映，經理亦隨即走入廚房了解實情，再作跟進。喜見經理接受食客意見，並迅速行動，咁先可以令出品盡善盡美。

輪到主菜登場，二人餐有兩份主菜，主菜1晌黑松露麵包蟹意大利飯或欖油海鮮炒墨魚汁意粉中任擇1款，而主菜2則晌燒智利白鱈魚伴雜菜魚湯、紐西蘭肉眼扒配美國焗薯、燒西班牙黑毛豬配青蘋果沙沙伴芥末子燒汁中3揀1。大廚嘅安排除招牌嘅麵包蟹意大利飯，仲有燒西班牙黑毛豬，以及從散叫餐牌中所推介嘅菠菜茸焗石班共3道主菜。

黑松露麵包蟹意大利飯（散叫價$228）
依個意大利飯喺店家嘅招牌菜之一，除此之外，仲有兩款意大利飯供應：雜菌燴意大利飯（$128）及黑松露帶子意大利飯（$138）。菜式外觀較為平實，唔花巧，以蟹蓋盛載意大利飯。由於蟹蓋倒轉咗，加上燈光影響，我哋都疑惑喺咪真嘅麵包蟹，定抑或用麵包所做成嘅蟹殼，不過一刀切落就知龍與鳳，確喺如假包換嘅真麵包蟹，而作為襯托用嘅都一樣喺真石春。意大利飯濕潤而咬口煙韌，飯內充滿鮮拆蟹肉同菌粒，蟹蓋內又有好多蟹膏，整體味道唔錯，食落又唔太滯口，至於以小湯匙載住嘅黑松露醬，撈飯嚟食，感覺豪氣啲之外，極有提味嘅作用，就似食炒飯加啲XO醬咁，正呀！

燒西班牙黑毛豬配青蘋果沙沙伴芥末子燒汁（二人餐內選項，無散叫，參考單價欠奉）
屬店家嘅新菜式，亦喺小弟今晚最鍾意嘅主菜，主因喺味道上濃香中帶清爽。原件燒黑毛豬扒已切成細細件，方便客人食用，黑毛豬果然味濃，甚有豬肉味，而且肉質緊緻得嚟又挺鬆軟。配上青蘋果沙沙及芥末子燒汁，前者令整體味道增加清爽，減褪油膩感，而後者令黑毛豬肉晌味道上添加一份層次。伴菜嘅烤薯、烤瓜菜亦燒得恰好，既香口又唔會太乾身，所以，成件事就喺好好食！

菠菜茸焗石班（散叫菜式，$158）
若非面面嘅菠菜茸有啲過鹹，依個菠菜茸焗石班亦成為另一道鍾意嘅主菜虤。雖然賣相真喺有啲麻麻，不過，藏晌芝士菠菜茸之下個焗石班非常之正，煎封過再焗做到外脆內嫩，啲魚肉真喺頗柔嫩，碟邊嘅忌廉汁加咗啲啲肉桂粉提味，蘸魚食唔錯。而表面嘅菠菜茸刴得細碎縝密，又加入蒜粒，搭上芝士，其實就幾好，衰在過鹹咗。石班之下仲有菠菜（唔喺菠菜茸）及薯茸，薯茸又刻意唔打得太爛太茸，多點咬感，所以幾鍾意依道菜。

接近尾聲，嚟到甜品時段又喺另一個期待。二人餐嘅甜品選揀有焦糖燉蛋、朱古力芭菲及草莓吉士千層酥，本應3揀2，但大廚已安排好咗3款都俾我哋試晒。

草莓吉士千層酥（散叫價$48）
諗住上次食過，唔會有咩特別，點知又唔喺喎，以全新姿態出場。上次賣相喺一貫千層酥嘅長條型，而今次改以圓柱型，感覺更別緻。續以紙酥皮作為上下兩層「千層酥」，中間夾有自家制吉士及士多啤梨，酥皮依舊超脆，士多啤梨清甜，但吉士有很大反差，蛋香有，但質感死實，都有少少失望架。事後跟店長阿Roy傾過個吉士問題，佢解釋喺廚房啲師傅仔負責整，想俾機會佢哋學嘢，當然依個對佢哋喺好事，不過個人覺得都唔應該成為一個理由，因為大廚都總要把把關，睇實所有出品嘅質素，相信佢試過依件草莓吉士千層酥之後，佢都覺得唔OK唔敢俾客食喎！

焦糖燉蛋（散叫價$48）
相比起個千層酥，個燉蛋保持到水準，焦糖比上次更夠薄夠脆，燉蛋香滑。

朱古力芭菲（散叫價$68）
之前睇唔少人讚，卒之都有機會一試。雖則賣相算唔上突出，但甚有玩味，先淋上黑朱古力漿，面層嘅朱古力薄片會慢慢溶化，而圓柱型嘅「芭菲」口感有啲慕絲跟雪糕嘅混合體，稍為雪實啲嘅慕絲，冰凍挺實，內裡原來有個小小中空位，加入冧酒、忌廉、榛子仁所做嘅酒心，頗有心思。朱古力味濃郁強勁，又帶點酒香，墊底嘅瑪莉餅碎亦唔好嘥，撈勻啲朱古力漿一樣好味。朱古力粉絲必食推介！

意大利焦糖鮮奶咖啡（散叫價$34）
原本打算要一杯意大利榛子鮮奶咖啡，可惜無供應，但焦糖鮮奶咖啡我都鍾意。一層一層嘅心形拉花依然喺鮮奶咖啡嘅特色，豐厚嘅奶泡，醇厚嘅口感，咖啡伴甜品，總喺叫人更滿足嘅結尾！

我哋一行3人對今餐嘅安排非常滿意，雖然食物方面有啲瑕疵，而服務方面亦有啲甩漏嘅情況，因為嚟咗啲新員工，不過都睇得出店家都想做到最好。希望晌食物質素上繼續睇緊啲，而新員工嘅培訓加把勁，在此再次多謝店家嘅邀請及款待！

個人評分
味道：8/10
環境：9/10
服務：7/10
抵食：8/10
平均每人消費：HK$0（試食邀請）

餐廳資料：
Eden Rose Restaurant
銅鑼灣軒尼斯道499號永光商業大廈19樓
2836 6880