2013年5月5日星期日

厚興瑜記手撕雞:斬料新貴

「斬料,斬料,斬大舊叉燒,油雞鹵味樣樣都要,斬大舊叉燒」,廣告歌仔都曾經有得唱,以前加餸斬料,非燒臘莫屬,叉燒、燒肉、燒鵝、油雞……。當然,燒臘晌香港依然大行其道,歷久不衰,好有代表性嘅廣東美食。不過,屋企附近開咗檔厚興瑜記,斬料就自然多個選擇。間唔中經過都見有少少人龍,確實人氣不少。
唔講唔覺,美孚已經喺香港嘅第16間分店,據講依家全港已開超過40間分店,走勢都幾強勁,都仲未計晌大陸嘅分店添。店面貼咗好多報紙、雜誌嘅專訪,原來厚興瑜記成立咗超過20年,獨賣手撕雞,算得上喺手撕雞專門店嘅老字號。
店面貼咗好多報紙、雜誌嘅專訪。
店舖獨沽一味:賣正宗手撕雞(原味或香辣味),半隻賣$43,一隻賣$83,仲有拼盤揀,賣$80一盒,拼法喺手撕雞+雞腎 / 雞腳 / 雞尖(任揀兩款)。
鋪面貼滿價錢及推廣資訊
樣辦(左至右):原味、拼盤、香辣味。
店家標榜選用自家農場新鮮走地雞,蛋白質特別豐富,脂肪含量低,而且每日凌晨就真空到港,以秘製調味料製造。蛋白質喺唔喺特別豐富,要搵專人化驗先知,不過就幾敢肯定脂肪含量低喇,因為食落口真喺無乜肥膏,皮下脂肪好少,外皮都幾爽;成隻雞手撕好晒,無話骨巉巉,基本上都喺啖啖肉,再者雞肉挺滑,有少少鹹鮮,頗為入味,又糝滿芝麻,多添份麻香,果然幾好食,比起燒臘感覺健康啲。
包裝盒面有啲溫馨提示
雖然感覺無當初咁旺,但小弟買雞當日,都有唔少師奶、阿叔走嚟買雞加餸。雖則未有大排長龍,但都總喺一個接一個嚟幫襯。依家仲見佢哋搞咗好多優惠,日日唔同,務求繼續保持氣勢,咁就要辛苦櫥窗後嘅阿姐,不斷將雞隻拆骨。
題外話
早前小弟其中一篇食評「我的美孚下午茶餐 ~ 意法日下午茶」(美孚東海堂)文中曾有一句咁寫:「最後糝埋唂咕粉」,其後有食友問我個「糝」字喺咪打錯咗,想打個「滲」字,我話唔喺呀。「糝」,音可讀「審」,以動詞用可解為灑、撒,好似食腸粉要糝芝麻,醃豬肉要糝啲鹽。今次又再用個「糝」字,所以順便解釋吓,如有錯漏,請指正並多多包涵!

個人評分
味道:8/10
環境:5/10
服務:5/10
抵食:8/10
平均每人消費:HK$83

餐廳資料:
厚興瑜記手撕雞
美孚吉利徑47號B2地舖
5313 9817

沒有留言:

發佈留言