2013年5月7日星期二

季季紅風味酒家:蝦蝦笑生日乳香豬

還未嚟過「季季紅」,但三月中就去咗一趟屬同一集團嘅「家常便飯」,出席Openrice大搞嘅試食活動,上次嘅試食會可能喺奧海城新店出台,仲未正式開業,兼且一下子要應付80多人嘅製作,好幾道餸菜都未如理想,創意新菜蝦禾米蛋卷,更喺希望越大就失望越大。以「家常便飯」灣仔店嘅食評睇,應該好唔錯,仲記得細妹都晌藍地總店食過佢嘅蝦禾米乳香豬,仲大讚特讚,所以對季季紅本店仍有一定期望。期望終於變成期待,經食友引薦,卒之晌今晚嚟到季季紅灣仔店出席「生日季季豬宴」,一嚐其招牌蝦禾米乳香豬,以及多款巧手圍村風味菜式。
由入門口開始,經兩組扶手電梯,以至進入堂座大廳,都以鮮橙紅色為主調,周圍久不久就見到小豬嘅擺設,貫徹酒家以豬聞名嘅特色。大廳嘅裝修其實有少少傳統,尤其啲櫈,頗有懷舊味道,近窗一排卡位,其他就喺大大細細嘅圓枱,排列得比一般酒家鬆動。不過,是晚飯局則安排晌獨立廂房,自成一角,零騷擾,而且地方頗大,足可擺上兩圍酒席。
bowl餐前小食
外間常見都喺花生、鹹菜之類,季季紅嘅就喺豬頭肉,滷過嘅豬頭肉切成小片,鹹香柔韌,都好耐無食過喇!
bowl鎮店蝦禾米乳香豬
第一道菜上場,當然喺鎮店名菜「蝦禾米乳香豬」。據經理講,乳豬仔用上未足月嘅廣西長白公豬,貪佢肉瘦脂肪少,肉紋順溜幼細皮夠薄;而做法將混有蝦米、芋頭、火腿嘅米飯炒香,塞滿乳豬仔內腔,紮實後再燒香至金黃皮脆。依家仲搞吓「花臣嘢」,戴晒生日帽插埋蠟燭,化身為生日豬,總覺得生日豬個概念麻麻,但人多高興開餐前唱首生日歌又何妨吖!要品嚐隻「乳香豬」,仲有好多功夫,由專人幫隻豬仔拆線剪肉,再鋪番得整整齊齊,砌番個豬仔樣先為止大功告成。乳豬皮果然夠脆,一咬咔嚓應聲碎開,皮下脂肪都真喺相對少,但外皮都仍帶少少油,而瘦肉部份調味幾好,無經常食到乳豬或燒肉過鹹嘅毛病,雖然喺未足月嘅乳豬仔,但肉味都唔差喎。「蝦禾米」部份又如何?炒飯晌燒乳豬仔嘅過程吸收咗肉汁同油香,小弟都擔心會過油,但估唔到入口又幾爽身喎,仲有份鹹香,總算無點失望!溫馨提示,乳香豬連炒飯幾足份量,無得十鬆啲人都唔好隨便叫成隻!
 乳香豬生日盒變身套餐
 插咗蠟燭,唱番首生日歌先,想西式定中式?
恭祝你福壽與天齊,慶賀你……
 乳香豬「解體」實錄
bowl冰鎮原隻鮑魚伴萵苣
鮑魚採用南非孔雀鮮鮑,因為唔喺乾鮑,所以鮑魚味唔會點濃,主要食其爽彈柔韌,原隻鮑魚灼熟再冰鎮,觀感如玉石,以刀叉切薄片蘸日本芥辣嚟食,夏天食依道菜就最好,好有透心涼嘅感覺。而配菜萵苣又幾有新鮮感,萵苣喺乜?其實就喺油麥菜嘅心,食落清甜爽脆。整道菜以鮑魚、萵苣相間圓形排到,中間又擺放唔少蔬菜做嘅裝飾,賣相已可以執到唔少分。
bowl豬肺頂蝴蝶腩菜膽湯
食完個乳香豬,有個冰鎮鮑魚涼一涼都仲未夠,嚟個湯水潤一潤就最好不過。經理話依個喺店內嘅招牌湯水,以大量豬骨去熬製,完全無加味精,單單就咁加入豬肺、蝴蝶腩(黐住豬肺側邊嘅肉)及大白菜同煲成老火湯,所以入口就喺豬肺同白菜味,感覺幾甜潤。另外,一整碟湯渣奉上,以証真材實料無欺場,可惜無得添飲。
bowl潮式滷水拼盆
季季紅唔喺賣咩名貴菜式嘅酒家,都喺想以大眾化價錢提供俱色香味嘅圍村佳餚,所以,依碟有齊豬耳、豬頭肉、豬肚、豬脷、豬腸嘅滷水「豬寶」,一樣可以上到大枱列為酒席菜式。基本上都滷得入味,而豬腸亦洗得乾淨,豬燥味有一點點,不過好此道嘅人唔會覺得喺咩問題,正如食得羊嘅人都唔羶。但喺,個人而言,依道菜佐啤酒比當餸菜就咁食較合適啲。
bowl紅菜頭西芹雲耳鮮淮山
食咗咁多肉,又內藏,嚟番個素菜平衡吓都要喇。今回個素菜幾特別,紅菜頭、鮮淮山都喺少食嘅嘢。血紅色嘅紅菜頭,味道未必人人鍾意,咬落「實實哋」,但就好有營養價值,含豐富礦物質,補血功能強,纖維極高幫助消化,仲可以抗氧化、防癌、抗衰老、抗自由基,你話幾厲害呢!唔好以為小弟咁識嘢,都喺聽大家講嘅啫,所以我都密密食多幾件,哈哈。此外,西芹、雲耳、鮮淮山……等,入口爽脆,而且西芹起晒絲,唔會食到一口渣,雖則賣相唔討好,但健康至緊要。
bowl鬆子五柳大桂皇
大桂皇用上野生桂花魚,眼前嘅大桂皇應該都有3、4斤重,桂花魚可塑性高,炒球、炆腩都得,但原條嘅最好就用嚟做松子魚,十字鎅花如松果,賣相悅目吖嘛。睇相都見師傅手功上乘,出嚟嘅效果坑紋夠深,又無甩漏嘅情況,否則鎅得淺松果坑紋唔突出,鎅得深炸起後魚肉可能會散甩唔好睇;最貼心喺即場先淋上自家製嘅五柳醬(醃制蔬菜製成嘅傳統廣東醬汁),更覺鮮艷搶眼。食此菜要訣,就喺淋完醬汁要快手新鮮食,咁先食得到外層甘香鬆脆,內裡魚肉細嫩,味道酸甜有緻,感覺酸香醒胃。喺喎,題外話講一講,何解菜名以「鬆子」為名?常見都喺「松子魚」,有時間考究吓先!
bowl砵酒焗爽蠔
蠔隻喺自家晌元朗生曬,所以質素穩定有保證,原來採用半乾濕嘅蠔嚟做依道菜,優點喺食落似生蠔咁腍滑,但又較之為蠔味稍濃一點。蘸粉漿脆炸再焗,入口蠔身又算不上好爽,但大大件蠔肉肥美好有咬口,蠔味亦不俗。
bowl玫瑰頭抽黃金雞
做法跟做豉油雞差唔多,但黃金雞色澤比常見嘅豉油雞仲要深色,原來用咗玫瑰露、頭抽……等純醬油嚟做,無加水,故此味道比較醇香。肉質方面,難得咁入味但又唔嚡,皮下脂肪又唔多,果然喺自家農場嘅走地雞呀,認真唔錯!
bowl楊枝甘露.杞子桂花糕
最後嘅「美點雙輝」唔喺普普通通嘅紅豆沙、合桃酥之類,而喺楊枝甘露同杞子桂花糕,我依類甜品鬼見愁,咩甜點都啱,而今晚兩款飯後甜品就更啱小弟心水。之不過,以小弟個人尺度,就唔多合格喇。楊枝甘露晌味道上絕對無問題,西米多,柚肉多,芒果肉亦都香甜,只喺打個芒果汁底唔知點解咁多「忌廉粒」浮浮吓,我嗰碗已經唔算嚴重,但就極之影響賣相。桂花糕做晒坑紋邊,都睇到有花少少心機,不過,實在太多桂花,雖則清香,但桂花嘅梗枝叫人食起嚟有啲巉口嘅感覺。
對整晚嘅菜式都好滿意,尤其個紅菜頭同大桂皇,喺兩款甜點失色啲。以三千零蚊一圍嘅定價,試到多款手本招牌嘢,算食得過喎!

灣仔店開咗成年,發覺劣評都唔少,大部份集中晌開店初期,尤其喺茶市市段,食物質素有不少問題,而最多投訴喺個服務,晚市亦偶有劣評。雖然季季紅賣嘅喺風味菜,點心唔喺佢哋手本,但作為一家酒家,難以靠一豬走天涯,既然衝出咗屯門,仲開咗好幾間分店,自然想做大佢,希望店方繼續努力,有問題嘅地方得以修正,點心、燒味、小菜……等等都精益求精,菜式保持著有今晚嘅水準,好讓食客都食過翻尋味。晌度再次多謝店家款待!

個人評分
味道:8/10
環境:8/10
服務:8/10
抵食:8/10
平均每人消費:HK$0(試食邀請)

餐廳資料:
季季紅風味酒家
灣仔灣仔道3號尚翹峰第1座1樓, 2樓, 地下B1號舖
2976 4000

沒有留言:

發佈留言