18 Grams：好友狂嚐曲（一）

一到假日，香港唔同地區都有唔少農墟，晌港島東鰂魚涌太古坊糖廠街都有一個，名為「Island East Markets」（港島東農墟），不過據了解就搞得唔喺好定時。如果有開檔嘅日子，農墟裡面有成40多個攤檔賣本地新鮮有機嘢，仲有其他手作飾物，加埋音樂表演，都幾嘉年華咁架，有興趣嘅朋友不妨晌瞼書留意佢哋嘅動向。

早前五月份就搞咗個「為食起革命」嘅活動，席間有嘢食，有嘢賣，好姊妹見18Grams竟然有單售曲奇賣，醒咗一包俾小弟，實在好多謝，因為依包曲奇喺節目限定，走均幾間18Grams都唔會有（至少暫時唔會有），完全喺為個活動先搞吓嘅手作仔，想再買番都買唔到呀。

一包曲奇裡邊包括咗4款口味（包裝無註明，喺咩味就只有靠自己食出嚟），每款有5塊，所以一包共有20塊。簡單透明包裝，貼有18Grams標誌。沖杯咖啡，跟老婆嘆個下午茶先。

牛油黑芝麻曲奇、綠茶杏仁曲奇、朱古力果仁曲奇、杏仁曲奇
雖然牛油味唔算好重，但幾款曲奇都做得頗鬆脆。個人較鍾意牛油黑芝麻曲奇同朱古力果仁曲奇，前者藏有密密嘅黑芝麻粒，嗒到芝麻嘅香味；而後者除咗有果仁，仲有朱古力粒晌裡邊。塊塊可以一口一件，好易食唔停口！

一包廿塊嘅曲奇，食得有幾狂？何解個標題叫「好友狂嚐曲」？因為一連收到幾位好友嘅餽贈，無獨有偶，都喺曲奇，所以近來好友狂賞曲，小弟就狂嚐曲！總之就多謝各方好友，謝謝你哋嘅心意！

個人評分
味道：8/10
環境：8/10
服務：8/10
抵食：8/10
平均每人消費：HK$0（禮物）

餐廳資料：
18 Grams
旺角登打士街56號家樂坊地庫B04號舖
2770 1339